ସମ୍ବଲପୁର, ୨୧/୦୪: ଲୋକଙ୍କ ପାଖରେ ପହଞ୍ଚିବ ଲୋକଙ୍କ ସରକାର । ସମସ୍ୟାର ସମାଧାନ ପାଇଁ ଭୁବନେଶ୍ୱର ଯାଇ ମୁଖ୍ୟମନ୍ତ୍ରୀଙ୍କୁ ଦେଖା କରିବା ଆବଶ୍ୟକ ନାହିଁ । ଖୋଦ୍ ମୁଖ୍ୟମନ୍ତ୍ରୀ ଲୋକଙ୍କ ପାଖକୁ ଆସିଛନ୍ତି । ସୋମବାର ସମ୍ବଲପୁର ମହାନଗର ନିଗମ ଦୁର୍ଗାପାଲି କାର୍ଯ୍ୟାଳୟରେ ଅନୁଷ୍ଠିତ ହେବ ମୁଖ୍ୟମନ୍ତ୍ରୀଙ୍କ ଜନଶୁଣାଣି କାର୍ଯ୍ୟକ୍ରମ । ପ୍ରଥମ ଥର ରାଜଧାନୀ ବାହାରେ ହେବ ଏହି କାର୍ଯ୍ୟକ୍ରମ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସହ ୧୦ ଜଣ ମନ୍ତ୍ରୀ ଲୋକଙ୍କ ଅଭିଯୋଗ ଶୁଣିବେ । ଏହାର ସମାଧାନ କରିବେ । ଏହାକୁ ନେଇ ପ୍ରାଶାସନିକ ପ୍ରସ୍ତୁତି ଶେଷ ହୋଇଛି । ଜନଶୁଣାଣି କାର୍ଯ୍ୟକ୍ରମ ଅବ୍ୟବହିତ ପୂର୍ବରୁ ମୁଖ୍ୟମନ୍ତ୍ରୀ ଶ୍ରୀ ମାଝୀ ରବିବାର ଅପରାହ୍ଣରେ ସମ୍ବଲପୁରରେ ପହଞ୍ଚିଛନ୍ତି ।
ଭୁବନେଶ୍ୱରରୁ ଝାରସୁଗୁଡ଼ା ବିମାନ ବନ୍ଦରରେ ପହଞ୍ଚିବା ପରେ ସଡ଼କପଥରେ ସମ୍ବଲପୁର ଆସିଥିଲେ । ସ୍ଥାନୀୟ ବିଧାୟକ ଜୟନାରାୟଣ ମିଶ୍ର ଓ ଜିଲ୍ଲାପାଳ ସିଦ୍ଦେଶ୍ୱର ବଳିରାମ ବୋନ୍ଦର ତାଙ୍କୁ ସ୍ୱାଗତ କରିଥିଲେ । ମୁଖ୍ୟମନ୍ତ୍ରୀ ସମଲେଶ୍ୱରୀ ମନ୍ଦିର ପରିଦର୍ଶନ କରିଛନ୍ତି । ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଓ ଉପ-ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓଙ୍କ ସହ ମା’ସମଲେଇଙ୍କ ଆଶୀର୍ବାଦ ନେଇଛନ୍ତି ।
ହଜାରେ ଲୋକଙ୍କ ଅଭିଯୋଗ ଶୁଣିବେ ମୁଖ୍ୟମନ୍ତ୍ରୀ । ଏଥିପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି । ଦୁର୍ଗାପାଲିସ୍ଥିତ ଏସ୍ଏମ୍ସି କାର୍ଯ୍ୟାଳୟ ନିକଟରେ ବିଶାଳ ତମ୍ବୁ ଲଗାଯାଇଛି । ପ୍ରଚଣ୍ଡ ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ଫ୍ୟାନ୍, କୁଲର, ପିଇବା ପାଣି ବ୍ୟବସ୍ଥା ହୋଇଛି । ରାଜସ୍ୱ ଓ
ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ପ୍ରସ୍ତୁତି ସମୀକ୍ଷା କରିଛନ୍ତି । ଶ୍ରୀ ପୂଜାରୀ କହିଛନ୍ତି, ଅଭିଯୋଗ ପାଇଁ ଦୂରଦୂରାନ୍ତରୁ ଲୋକମାନେ ଆସିବେ । ସେମାନେ ଯେଭଳି ସୁରୁଖୁରୁରେ ଅଭିଯୋଗ କରିପାରିବେ ସେଥିପ୍ରତି ଗୁରୁତ୍ୱ ଦେବାକୁ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି ।
ଏଥର ରେକର୍ଡ ସଂଖ୍ୟକ ଆବେଦନ ହୋଇଥିଲା । ମାତ୍ର ୪ ଘଣ୍ଟାରେ ସମସ୍ତ ସ୍ଲଟ୍ ପୂରଣ ହୋଇଯାଇଥିଲା । ସମ୍ବଲପୁର, ବରଗଡ଼, ଝାରସୁଗୁଡ଼ା ସହ ରାଜ୍ୟର ବିଭିନ୍ନ ସ୍ଥାନରୁ ଲୋକ ଅଭିଯୋଗ ଶୁଣାଣି କାର୍ଯ୍ୟକ୍ରମରେ ସାମିଲ ହେବେ । ତୁରନ୍ତ ସମାଧାନ ହୋଇପାରୁଥିବା ଅଭିଯୋଗଗୁଡ଼ିକ ସଙ୍ଗେସଙ୍ଗେ ସମାଧାନ ହେବ । ଆଇନ୍ଗତ ସମସ୍ୟା ଥିବା ଅନ୍ୟ ଅଭିଯୋଗଗୁଡ଼ିକର ପର୍ଯ୍ୟାୟକ୍ରମେ ସମାଧାନ କରାଯିବ । ରାଜ୍ୟର ୧୦ ମନ୍ତ୍ରୀ ଉପସ୍ଥିତ ରହି ନିଜ ବିଭାଗ ଅନୁସାରେ ଅଭିଯୋଗ ଶୁଣାଣି କରିବେ । ଏହାସହ ୩ ଜଣ ଅତିରିକ୍ତ ମୁଖ୍ୟ ଶାସନ ସଚିବ ଆସୁଛନ୍ତି । ଏଥର ସାମୂହିକ ସମସ୍ୟା ଅଧିକ ଆସିଛି । ଝାରସୁଗୁଡ଼ା, ସୁନ୍ଦରଗଡ଼ ବିସ୍ଥାପନ ସମସ୍ୟା ଓ ବରଗଡ଼ କୃଷି ସମସ୍ୟାକୁ ନେଇ ଅଭିଯୋଗର ଶୁଣାଣି କରାଯିବ । ଏଭଳି ଅନ୍ୟ ସ୍ଥାନରେ ମଧ୍ୟ ମୁଖ୍ୟମନ୍ତ୍ରୀଙ୍କ ଜନଶୁଣାଣି କାର୍ଯ୍ୟକ୍ରମ ହେବ ।
ମୁଖ୍ୟମନ୍ତ୍ରୀଙ୍କ ଜନଶୁଣାଣି କାର୍ଯ୍ୟକ୍ରମକୁ ଦୃଷ୍ଟିରେ ରଖି ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି । ଏସ୍ଏମସି କାର୍ଯ୍ୟାଳୟ ପୁଲିସ୍ ଛାଉଣିରେ ପରିଣତ ହୋଇଛି । ୧୭ ପ୍ଲାଟୁନ ପୁଲିସ୍ ଫୋର୍ସ ମୁତୟନ ହେବେ ବୋଲି ସମ୍ବଲପୁର ପୁଲିସ୍ ପକ୍ଷରୁ ସୂଚନା ଦିଆଯାଇଛି । ଉତ୍ତରାଞ୍ଚଳ ପୁଲିସ୍ ଆଇଜି ହିମାଂଶୁ ଲାଲ୍,ଏସପି ମୁକେଶ ଭାମୂ ସୁରକ୍ଷା ବ୍ୟବସ୍ଥା ଯାଞ୍ଚ କରିଛନ୍ତି ।
