ବୌଦ୍ଧ,୧୬/୫ : ବୌଦ୍ଧ ଜିଲ୍ଲାପାଳଙ୍କ କାର୍ଯ୍ୟାଳୟ ସଦଭାବନା ସଭାଗୃହଠାରେ ଶୁକ୍ରବାର ସନ୍ଧ୍ୟାରେ ଜିଲ୍ଲା ନିର୍ବାଚନ ଅଧିକାରୀ ତଥା ଜିଲ୍ଲାପାଳ ସୁବ୍ରତ କୁମାର ପଣ୍ଡାଙ୍କ ଅଧ୍ୟକ୍ଷତାରେ ଭୋଟର ପଞ୍ଜିକରଣ ଦାୟିତ୍ୱରେ ରହିଥିବା ବୁଥସ୍ତରୀୟ ଅଧିକାରୀ,ସୁପରଭାଇଜର ଓ ପଞ୍ଜିକରଣ ଅଧିକାରୀମାନଙ୍କୁ ନେଇ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି । ବୈଠକରେ ୮୫ କଣ୍ଟାମାଳ ନିର୍ବାଚନ ମଣ୍ଡଳୀର ଭୋଟର ପଞ୍ଜିକରଣ ଅଧିକାରୀ ତଥା ଅତିରିକ୍ତ ଜିଲ୍ଲାପାଳ ଅନିରୁଦ୍ଧ ପଧାନ ଓ ୮୬ ବୌଦ୍ଧ ନିର୍ବାଚନ ମଣ୍ଡଳୀର ଭୋଟର ପଞ୍ଜିକରଣ ଅଧିକାରୀ ତଥା ଉପଜିଲ୍ଲାପାଳ ପ୍ରବୀଣ କୁମାର ବାଣୁଆ, ବୁଥସ୍ତରୀୟ ଅଧିକାରୀ, ସୁପରଭାଇଜରମାନଙ୍କ ସହିତ ଭୋଟର ତାଲିକା ପ୍ରସ୍ତୁତି ନେଇ ବିଭିନ୍ନ ବିଷୟରେ ଆଲୋଚନା କରିଥିଲେ ।
ବୈଠକରେ ମୁଖ୍ୟତଃ ଜିଲ୍ଲାରେ ଥିବା ଶହେ ବର୍ଷ କିମ୍ବା ତଦୁର୍ଦ୍ଧ ବୟସ୍କ ଭୋଟରମାନଙ୍କୁ ଚିହ୍ନଟ କରିବା ସହିତ ସେମାନଙ୍କ ଘରକୁ ଯାଇ ତଥ୍ୟ ସଂଗ୍ରହ କରିବାକୁ ନିର୍ଦ୍ଦେଶ ଦିଆଯାଇଥିଲା । ଫର୍ମ ୬,୭ ଓ ୮ ରେ ଆବେଦନ କରିଥିବା ଭୋଟରମାନଙ୍କ ଫର୍ମକୁ ଠିକ୍ ସମୟ ମଧ୍ୟରେ କିପରି ଫଇସଲା କରାଯିବ,ଅଧିକରୁ ଅଧିକ ମହିଳା ଭୋଟର ତାଲିକାଭୁକ୍ତ କରିବାକୁ ଆଲୋଚନା କରାଯାଇଥିଲା । ବୁଥସ୍ତରୀୟ ଅଧିକାରୀମାନେ ଠିକ୍ ଭାବରେ କାର୍ଯ୍ୟ ସଂପାଦନ କରୁଛନ୍ତିକି ନାହିଁ ତାହା ତଦାରଖ କରିବା ,ଇପି ରେସିଓ ଏବଂ ଜେଣ୍ଡର ରେସିଓ କିପରି ବୃଦ୍ଧି କରାଯାଇପାରିବ ସେ ସଂପର୍କରେ ଆଲୋଚନା କରାଯାଇଥିଲା ।
ଶେଷରେ ଡେପୁଟି କଲେକ୍ଟର(ନିର୍ବାଚନ) ତୃପ୍ତିମୟୀ ଜେନା ସମସ୍ତଙ୍କୁ ଧନ୍ୟବାଦ ପ୍ରଦାନ କରିଥିଲେ । ବୈଠକରେ ଅନ୍ୟମାନଙ୍କ ମଧ୍ୟରେ ବୌଦ୍ଧ ତହସିଲଦାର ଅନୀତା କୁମାର ସାହୁ,କଣ୍ଟାମାଳ ତହସିଲଦାର ଶ୍ୱେତପଦ୍ମା ଯୋଷୀ,ହରଭଙ୍ଗା ତହସିଲଦାର ବଳଦେବ ବେହେରା,ନିର୍ବାଚନ ବିଭାଗର ସରୋଜ ବେହେରା,ଜିତେନ୍ଦ୍ର ମେହେର,ରିତାଞ୍ଜଳୀ କହଁର ପ୍ରମୁଖ ଉପସ୍ଥିତ ଥିଲେ ।
