ନରସିଂହପୁର,୨୧/୦୫ : ବିଶୁଦ୍ଧ ପାଣି ପାଇଁ କଟକ ଜିଲ୍ଲା ନରସିଂହପୁର ବ୍ଲକର ପାଇକବାରବାଟୀ ହନ୍ତସନ୍ତ । ପାନୀୟ ଜଳ ପାଇଁ ବାରମ୍ବାର ଅଭିଯୋଗ କଲା ପରେ କୌଣସି ସୁଫଳ ମିଳୁନଥିଲା । ଫଳରେ ବାଧ୍ୟ ହୋଇ ସେମାନେ ବୁଧବାର ପଞ୍ଚାୟତ କାର୍ଯ୍ୟାଳୟ ସାମ୍ନାରେ ଗଣଧାରଣା ଦେଇଛନ୍ତି । ପଞ୍ଚାୟତରେ ଥିବା ୧୭ଟି ୱାର୍ଡରୁ ୧୫ଟି ୱାର୍ଡକୁ ପହଞ୍ଚିନି ଏଲ୍ ଆଣ୍ଡ ଟିର ପିଇବା ପାଣି । ଏନେଇ କମ୍ପାନୀ କର୍ତ୍ତୃପକ୍ଷ ଓ ବିଡିଓଙ୍କୁ ଅଭିଯୋଗ କରିବା ସତ୍ତ୍ୱେ କୌଣସି ସୁଫଳ ନମିଳିବାରୁ ହାଣ୍ଡି, ଡେକଚି, ବାଲ୍ଟି ଧରି ଗଣଧାରଣାରେ ବସିଛନ୍ତି ଲୋକେ । ବିଶୁଦ୍ଧ ପାନୀୟ ଜଳ ନମିଳିବା ଯାଏଁ ଆନ୍ଦୋଳନ ଜାରି ରହିବ ବୋଲି କହିଛନ୍ତି ଗ୍ରାମବାସୀ ।
ସୂଚନା ମୁତାବକ, ପାଇକବାରବାଟୀ ପଞ୍ଚାୟତର ଦୁର୍ଗା ପ୍ରସାଦ, ହଟିଆପଲ୍ଲୀ, ମଲ୍ଲିକସାହି ଓ ଗଣଗଣାରେ ଏପର୍ଯ୍ୟନ୍ତ ପାନୀୟ ଜଳ ପହଞ୍ଚି ପାରିନାହିଁ । ଯେଉଁଥିପାଇଁ ଲୋକେ ନାହିଁ ନଥିବା ଆସୁବିଧାର ସମ୍ମୁଖୀନ ହେଉଛନ୍ତି । ଖରା ଦିବେ ପିଇବା ପାଣି ନପାଇ ଡହଳ ବିକଳ ହେଉଛନ୍ତି । ଏନେଇ ବାରମ୍ବାର ଅଭିଯୋଗ କରିଥିଲେ ସୁଦ୍ଧା ଶୁଣୁନି ଏଲ୍ ଆଣ୍ଡ୍ ଟି କମ୍ପାନୀ । ଏବାବଦରେ ବିଡିଓଙ୍କୁ ଅଭିଯୋଗ କରିବା ପରେ ଗ୍ରାମବାସୀ ମାନେ ଡେକେଚି ଓ ବାଲ୍ଟି ଧରି ଗଣଧାରଣାରେ ବସିଛନ୍ତି । ଯେ ପର୍ଯ୍ୟନ୍ତ ଶୁଦ୍ଧ ପାନୀୟ ଜଳ ନମିଳିଛି, ସେ ପର୍ଯ୍ୟନ୍ତ ଏ ଧାରଣା ଜାରି ରହିବ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି ।
