ଭୁବନେଶ୍ୱର,୨୨/୦୩: ରାଜ୍ୟର ୭ ବିଶ୍ୱବିଦ୍ୟାଳୟରେ କୁଳପତି ନାହାନ୍ତି । ଏହି ବିଶ୍ୱବିଦ୍ୟାଳୟ ଗୁଡିକ ହେଲା ଉତ୍କଳ ବିଶ୍ୱବିଦ୍ୟାଳୟ, ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟ, ଖଲ୍ଲିକୋଟ ଏକକ ବିଶ୍ୱବିଦ୍ୟାଳୟ, ଜଗନ୍ନାଥ ସଂସ୍କୃତ ବିଶ୍ୱବିଦ୍ୟାଳୟ, ଗଙ୍ଗାଧର ମେହେର ବିଶ୍ୱବିଦ୍ୟାଳୟ ଓ କଳାହାଣ୍ଡିସ୍ଥିତ ମା’ ମାଣିକେଶ୍ୱରୀ ବିଶ୍ୱବିଦ୍ୟାଳୟ । ଦୀର୍ଘ ଦିନ ଧରି ଏହି କୁଳପତି ପଦବିଗୁଡିକ ଖାଲିପଡିଛି । କାମଚଳାରେ ପ୍ରଶାସନିକ କାର୍ଯ୍ୟଠାରୁ ନେଇ ଅନ୍ୟାନ୍ୟ ଶୈକ୍ଷିକ କାର୍ଯ୍ୟକ୍ରମ ଚାଲିଛି । ସେହିପରି ଉଚ୍ଚଶିକ୍ଷା ବିଭାଗ ଅଧୀନ ୧୭ଟି ବିଶ୍ୱବିଦ୍ୟାଳୟରେ ୧୩୫୩ ଅଧ୍ୟାପକ ନାହାନ୍ତି । ଏଠାରେ ମଞ୍ଜୁରିପ୍ରାପ୍ତ ୨୦୨୭ଟି ଅଧ୍ୟାପକ ପଦବି ଥିବା ବେଳେ ସେଥିମଧ୍ୟରୁ ମାତ୍ର ୬୭୪ଟି ପଦବିରେ ଅଧ୍ୟାପକ/ଅଧ୍ୟାପିକା କାର୍ଯ୍ୟ କରୁଛନ୍ତି । ବିଶ୍ୱବିଦ୍ୟାଳୟର ବିଭିନ୍ନ ବିଭାଗରେ ମୋଟ ୨୮୭୯ ଅଣଶିକ୍ଷକ କର୍ମଚାରୀ ପଦବି ରହିଛି । ସେଥିମଧ୍ୟରୁ ୭୯୮ଟି ପଦବି ପୂରଣ ଥିବା ବେଳେ ୨୦୮୧ଟି ପଦବି ଖାଲିଅଛି ।
ରାଜ୍ୟରେ ଏବେ ୬୬ଟି ସରକାରୀ ଡିଗ୍ରୀ ମହାବିଦ୍ୟାଳୟ ରହିଛି । ସେଥିମଧ୍ୟରୁ କେବଳ ଭୁବନେଶ୍ୱରସ୍ଥିତ ବିଜେବି ସ୍ୱୟଂଶାସିତ ମହାବିଦ୍ୟାଳୟରେ ନିୟମିତ ଅଧ୍ୟକ୍ଷ ନାହାନ୍ତି । ସରକାରୀ ଡିଗ୍ରୀ ମହାବିଦ୍ୟାଳୟଗୁଡିକରେ ମୋଟ ୨୪୦୭ ଗୋଟି ମଞ୍ଜୁରୀପ୍ରାପ୍ତ ଅଧ୍ୟାପକ ପଦବି ଥିବା ବେଳେ ଏଥିମଧ୍ୟରୁ ୪୩୬ ଅଧ୍ୟାପକ ପଦବି ଖାଲିପଡିଛି । ସମସ୍ତ ମହାବିଦ୍ୟାଳୟରେ ମୋଟ ୧୭୧୧ଟି ଅଣଶୈକ୍ଷିକ ମଞ୍ଜୁରୀପ୍ରାପ୍ତ ପଦବି ରହିଥିବା ବେଳେ ୭୩୧ଟି ପଦବି ଖାଲିରହିଛି । ରାଜ୍ୟରେ ରହିଥିବା ୪୮୮ ବର୍ଗର ପୂର୍ଣ୍ଣ ଅନୁଦାନପ୍ରାପ୍ତ ଡିଗ୍ରୀ ମହାବିଦ୍ୟାଳୟରେ ୮୩୨ଟି ଅଧ୍ୟାପକ ପଦବି ଓ ୩୯୮୨ ଅଣଶିକ୍ଷକ ପଦବି ମଧ୍ୟ ଖାଲିପଡିଛି । ତେବେ ଉଚ୍ଚଶିକ୍ଷା ବିଭାଗ ଅଧୀନ ବେସରକାରୀ ଅନୁଦାନପ୍ରାପ୍ତ ମହାବିଦ୍ୟାଳୟରେ ନିୟମିତ ଅଧ୍ୟକ୍ଷ ପଦବି ନାହିଁ ବୋଲି ଶୁକ୍ରବାର ବିଧାନସଭାରେ ଟଙ୍କଧର ତ୍ରିପାଠୀଙ୍କ ପ୍ରଶ୍ନରେ ଏହି ତଥ୍ୟ ରଖିଛନ୍ତି ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ।
