ୱାଶିଂଟନ,୧୨/୦୩: ହ୍ୱାଇଟ୍ ହାଉସ୍କୁ ଡୋନାଲ୍ଡ ଟ୍ରମ୍ପଙ୍କ ପ୍ରତ୍ୟାବର୍ତ୍ତନ ସମଗ୍ର ବିଶ୍ୱ ଅର୍ଥନୀତିକୁ କରିଛି ଅସ୍ଥିର । ଟ୍ରମ୍ପଙ୍କ ଆକ୍ରାମକ ବାଣିଜ୍ୟ ନୀତି ନୀତି ନିର୍ଦ୍ଧାରଣକାରୀଙ୍କ ନିଦ ଉଡ଼ାଇ ଦେଲାଣି । ବିଶ୍ୱ ବଜାରରେ ବଢ଼ିଚାଲିଛି ଅନିଶ୍ଚିତତା । ଏହାସହିତ ଭୁ-ରାଜନୈତିକ ସମସ୍ୟାରୁ ଆମେରିକା ଅର୍ଥନୀତି ମାନ୍ଦାବସ୍ଥା ଆଡ଼କୁ ଅଗ୍ରସର ହେଉଥିବା ଆଶଙ୍କା କରାଯାଉଛି ।
କିନ୍ତୁ ଏ ବର୍ଷ ଆମେରିକା ଅର୍ଥନୀତି ଏକ ମାନ୍ଦାବସ୍ଥା ଦେଖିବ ଅବା ନୁହେଁ ସେ ନେଇ କୌଣସି ବୟାନ ଦେବାକୁ ମନା କରିଦେଇଛନ୍ତି ରାଷ୍ଟ୍ରପତି ଟ୍ରମ୍ପ । ଫକ୍ସ ନ୍ୟୁଜ୍ର ଏକ ସାକ୍ଷାତ୍କାରରେ ସେ କହିଲେ ଯେ, ଏଭଳି ପୂର୍ବାନୁମାନ କରିବାକୁ ମୁଁ ପସନ୍ଦ କରେନାହିଁ । ଏହା ଟ୍ରାଞ୍ଜିସନ ବା ପରିବର୍ତ୍ତନର ସମୟ । ଆମେ ଆମେରିକାକୁ ସମ୍ପତ୍ତି ଫେରାଇ ଆଣିବାକୁ ଉଦ୍ୟମ କରୁଛୁ । ଏଥିପାଇଁ କିଛି ସମୟ ଲାଗିବ । ଧୈର୍ଯ୍ୟହରା ହେବା ଉଚିତ ନୁହେଁ । ଏଭଳି କୌଣସି ପୂର୍ବାନୁମାନ ଉପରେ ବିଶ୍ୱାସ ନ କରିବା ପାଇଁ ଟ୍ରମ୍ପ ଆହ୍ୱାନ ଦେଇଛନ୍ତି ।
ଟ୍ରମ୍ପ ପ୍ରଶାସନର ଶୁଳ୍କ ଏବଂ ଅର୍ଥନୈତିକ ପଲିସିରେ କଡ଼ା ଆଭିମୁଖ୍ୟକୁ ନେଇ ନିବେଶକ ଚିନ୍ତିତ । ଏହା ଏକ ମାନ୍ଦାବସ୍ଥାକୁ ଡାକି ଆଣିବ ବୋଲି ଏମାନେ ଆଶଙ୍କା ପ୍ରକାଶ କରିଛନ୍ତି । ଟ୍ରମ୍ପ କ୍ଷମତାକୁ ଆସିବା ପରେ ବଡ଼ ବଡ଼ ବ୍ୟବସାୟିକ ସହଯୋଗୀଙ୍କ ସହ ଆମେରିକାର ଶୁଳ୍କ ବିବାଦ ବିଶ୍ୱର ସର୍ବବୃହତ୍ ଅର୍ଥନୀତି ପାଇଁ ମାନ୍ଦାବସ୍ଥା ଡାକିଆଣିବ ବୋଲି ଆଶଙ୍କା କରାଯାଉଛି । ଏହା ଉପରେ ଟ୍ରମ୍ପ କହିଛନ୍ତି ଯେ, ଏହା ଟ୍ରାଞ୍ଜିସନ୍ ସମୟ । ସେ ନେଉଥିବା ଅର୍ଥନୈତିକ ପଲିସିର ସକାରାତ୍ମକ ଫଳାଫଳ ଆସିବାକୁ କିଛି ସମୟ ଲାଗିବ ।
ପ୍ରକାଶଯୋଗ୍ୟ, ଆଟ୍ଲାଣ୍ଟା ଫେଡେରାଲ ରିଜର୍ଭ ଗତ ସପ୍ତାହରେ ଆଶଙ୍କା ପ୍ରକାଶ କରିଥିଲା ଯେ, ପ୍ରଥମ ତ୍ରୟମାସରେ ଆମେରିକା ଅର୍ଥବ୍ୟବସ୍ଥା ଖସିପାରେ । ଅର୍ଥନୀତି ଲଗାତର ଧୀମା ରହିବା ସହ ଏକ ମାନ୍ଦାବସ୍ଥା ଅନୁମେୟ । ଷ୍ଟକ୍ ବଜାରରେ ଅସ୍ଥିରତା ଦେଖିବାକୁ ମିଳିପାରେ ।
ଅର୍ଥନୀତି ପାଇଁ ସତର୍କ ସଂକେତ ବଢୁଛି । ନଭେମ୍ବର ନିର୍ବାଚନ ପରଠାରୁ ସବୁଠାରୁ ଖରାପ ସପ୍ତାହ ଦେଖିଛି ଆମେରିକୀୟ ଷ୍ଟକ୍ ବଜାର । ଉପଭୋକ୍ତା ଚାହିଦା କମିଛି । ଦରଦାମ ବୃଦ୍ଧିକୁ ନେଇ ଗ୍ରାହକ ଚିନ୍ତିତ । କାନାଡା, ମେକ୍ସିକୋ ଏବଂ ଚୀନ୍ ଆଦି ରାଷ୍ଟ୍ରଗୁଡ଼ିକ ଉପରେ ଟ୍ରମ୍ପଙ୍କ ଶୁଳ୍କ ବାଣ ଆମେରିକାରେ ବିଭିନ୍ନ ସାମଗ୍ରୀକୁ ମହଙ୍ଗା କରିଛି । ଅନିଶ୍ଚିତତା ଯୋଗୁ ସରକାରୀ ଏଜେନ୍ସିଗୁଡ଼ିକରେ ଗଣଛଟେଇ ବଢୁଛି । ଅରବପତି ଉପଦେଷ୍ଟା ଏଲନ୍ ମସ୍କ ଖର୍ଚ୍ଚକାଟ ପଦକ୍ଷେପ ଅନ୍ତର୍ଗତ ବିପୁଳ ସଂଖ୍ୟାରେ ଗଣ-ଛଟେଇ ରଣନୀତି କରୁଛନ୍ତି ।
ଆଟ୍ଲାଣ୍ଟା ଫେଡେରାଲ ରିଜର୍ଭ ଆକଳନ କରିଛି ଯେ, ୨୦୨୫ର ପ୍ରଥମ ତ୍ରୟମାସରେ ଆମେରିକାର ଜିଡିପି ଅଭିବୃଦ୍ଧି ୨.୪% ଖସିପାରେ । କୋଭିଡ୍-୧୯ ମହାମାରୀ ପରଠାରୁ ଏହା ସବୁଠାରୁ ଦୁର୍ବଳ ପ୍ରଦର୍ଶନ ହେବ । ଅର୍ଥନୀତି ବିଷାରଦମାନେ ବି ଚିନ୍ତାରେ ଅଛନ୍ତି । ଗୋଲ୍ଡମ୍ୟାନ୍ ସାଚ୍ସ ଆସନ୍ତା ୧୨ ମାସ ମଧ୍ୟରେ ଆମେରିକାରେ ଏକ ମାନ୍ଦାବସ୍ଥା ଦେଖାଦେଇପାରେ ବୋଲି ଆଶଙ୍କା କରିଛି । ମୋର୍ଗାନ ଷ୍ଟାନ୍ଲି ମଧ୍ୟ ଦୁର୍ବଳ ଅର୍ଥନୈତିକ ଅଭିବୃଦ୍ଧି ଅନୁମାନ କରିଛି ।
ପ୍ରକାଶଯୋଗ୍ୟ, ଲଗାତର ଦୁଇଟି ତ୍ରୟମାସ ଜିଡିପି ଅଭିବୃଦ୍ଧି ଖସିଲେ ଅର୍ଥନୀତିରେ ମାନ୍ଦାବସ୍ଥା ବୋଲି ଗଣନା କରାଯାଇଥାଏ । କୋଭିଡ୍-୧୯ ମହାମାରୀ ବେଳେ ୨୦୨୦ ପ୍ରଥମ ଭାଗରେ ଆମେରିକାରେ ମାନ୍ଦାବସ୍ଥା ଦେଖିବାକୁ ମିଳିଥିଲା । ଉକ୍ତ ସମୟରେ ଲକ୍ଷ ଲକ୍ଷ ଆମେରିକୀୟ ନିଯୁକ୍ତି ହରାଇଥିଲେ । ଆମେରିକାରେ ମାନ୍ଦାବସ୍ଥା ହେଲେ ଏହାର ପ୍ରଭାବ ସମଗ୍ର ବିଶ୍ୱ ଅନୁଭବ କରିଥାଏ ।
