କୋଲକାତା: ରଜାଭବନର ଛବି ଖରାପ କରିବାକୁ ଚେଷ୍ଟା କରିଥିବା ଅଭିଯୋଗରେ କୋଲକାତା ପୋଲିସ କମିଶନର ବିନୀତ ଗୋୟଲ ଏବଂ ଡିସିପିଙ୍କ ବିରୋଧରେ କେନ୍ଦ୍ର ଗୃହ ମନ୍ତ୍ରାଳୟ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଆରମ୍ଭ କରିଛି । ବିନୀତ ଗୋୟଲ ଏବଂ ଡିସିପି ଇନ୍ଦିରା ମୁଖାର୍ଜୀଙ୍କ ବିରୋଧରେ ରାଜ୍ୟପାଳ ସିଭି ଆନନ୍ଦ ବୋଷଙ୍କ ରିପୋର୍ଟ ପରେ କେନ୍ଦ୍ର ଗୃହ ମନ୍ତ୍ରାଳୟ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରକ୍ରିୟା ଆରମ୍ଭ କରିଥିବା ଜଣାପଡ଼ିଛି । ରାଜ୍ୟପାଳଙ୍କ ଅଭିଯୋଗ କ୍ରମେ ସିପି ଏବଂ ଡିସିପିଙ୍କ କାର୍ଯ୍ୟକଳାପ ଜଣେ ଅଧିକାରୀଙ୍କ ଭଳି ନୁହେଁ ବୋଲି ରାଜ୍ୟପାଳ ଅଭିଯୋଗ କରିଛନ୍ତି ।
ନିର୍ବାଚନ ପରବର୍ତ୍ତୀ ହିଂସାର ପୀଡ଼ିତଙ୍କୁ ପୋଲିସ ରାଜ୍ୟପାଳଙ୍କୁ ଭେଟିବାକୁ ଦେଇନଥିଲା । ଏନେଇ ରାଜ୍ୟପାଳଙ୍କ ନିର୍ଦ୍ଦେଶକୁ ପୋଲିସ ବେଖାତିର କରିଥିଲା ବୋଲି ସିଭି ବୋଷ ଜୁନ୍ରେ ଗୃହ ମନ୍ତ୍ରାଳୟକୁ ଦେଇଥିବା ରିପୋର୍ଟରେ ଦର୍ଶାଇଥିଲେ । ରାଜ୍ୟପାଳଙ୍କ ରିପୋର୍ଟ ପରେ ଏବେ ଆଇପିଏସ୍ ଅଧିକାରୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଲାଗି କେନ୍ଦ୍ର ଗୃହ ମନ୍ତ୍ରାଳୟ ପ୍ରକ୍ରିୟା ଆରମ୍ଭ କରିଛି । ଏହାର ଏକ କପି ରାଜ୍ୟ ସରକାରଙ୍କୁ ପଠାଇ ଦିଆଯାଇଛି ।
ସେପଟେ ରାଜଭବନରେ କାର୍ଯ୍ୟରତ ଅନ୍ୟ କେତେକ ପୋଲିସ ଅଧିକାରୀଙ୍କ ବିରୋଧରେ ମଧ୍ୟ ଅଭିଯୋଗ ଆଣିଛନ୍ତି ରାଜ୍ୟପାଳ । ଏପ୍ରିଲ-ମେ ୨୦୨୪ରେ ରାଜଭବନରେ ମହିଳାଙ୍କୁ ଦୁର୍ବ୍ୟବହାର ହୋଇଥିବା ନେଇ ସେମାନେ ଦାବି କରିଥିଲେ । ପୋଲିସ ଅଧିକାରୀମାନେ ନିୟମ ଉଲ୍ଲଂଘନ କରିଛନ୍ତି ବୋଲି ସିଭି ବୋଷ ଅଭିଯୋଗ ଆଣିଛନ୍ତି । ରିପୋର୍ଟରେ ରାଜ୍ୟପାଳ ଲେଖିଛନ୍ତି ଯେ, କୋଲାକାତା ପୋଲିସ ରାଜଭବନ କର୍ମଚାରୀଙ୍କୁ ପରିଚୟ ପତ୍ର ପ୍ରଦାନ କରୁଛି । ଏହା ସହ ରାଜଭବନକୁ ଗଲା ବେଳେ ଏବଂ ଆସିବା ବେଳେ ସେମାନଙ୍କୁ ଚେକ୍ କରାଯାଉଛି । ଏନେଇ ରାଜଭବନ ଆପତ୍ତି ଉଠାଇଥିଲେ ବି ପୋଲିସ ମାନୁ ନାହିଁ ।
ସେପଟେ ନିର୍ବାଚନ ପରବର୍ତ୍ତୀ ହିଂସାରେ ପୀଡ଼ିତଙ୍କୁ ନେଇ ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀଙ୍କ ନେତୃତ୍ବରେ ଏକ ପ୍ରତିନିଧି ମଣ୍ଡଳୀକୁ ରାଜଭବନକୁ ଯିବାକୁ ଦିଆଯାଇନଥିଲା । ସେ ଆହୁରି ମଧ୍ୟ ଲେଖିଛନ୍ତି ଯେ, ରାଜଭବନରେ କାର୍ଯ୍ୟ କରୁଥିବା ଜଣେ ମହିଳା କର୍ମଚାରୀଙ୍କ ଯୌନ ଶୋଷଣ କରାଯାଇଥିବା ଅଭିଯୋଗ କରି ରାଜ୍ୟପାଳଙ୍କ ଛବି ଖରାପ କରିବାକୁ ଚେଷ୍ଟା କରାଯାଇଛି । କୋଲକାତା ପୋଲିସ କମିଶନର ଏବଂ ଡିସିପି ଇନ୍ଦିରା ମୁଖାର୍ଜୀ ଏକ ଟିମ୍ ଗଠନ କରିବା ସହ ବାରମ୍ବାର ସାମ୍ବାଦିକ ସମ୍ମଳନୀ କରି ରାଜ୍ୟାପାଳଙ୍କ ବିରୋଧରେ ଅପରାଧିକ ମାମଲା ହେବା ଦରକାର ବୋଲି ଦାବି କରିଥିଲେ । ତେବେ ଏସବୁ ଘଟଣାକୁ ନେଇ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ରାଜ୍ୟପାଳ ଜଣାଇଥିଲେ ବି ଫଳ ଶୂନ । ସେପଟେ ବିନୀତ ଗୋୟଲ କେନ୍ଦ୍ର ଗୃହ ମନ୍ତ୍ରାଳୟର କାର୍ଯ୍ୟାନୁଷ୍ଠାନ ସଂପର୍କରେ କିଛି ଜାଣିନାହାନ୍ତି ବୋଲି କହିଛନ୍ତି । ଇନ୍ଦିରା ମୁଖାର୍ଜୀ ମଧ୍ୟ ସମାନ କଥା ଦୋହରାଇଛନ୍ତି ।
