ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର କଂଗ୍ରେସକୁ ଜୋରଦାର ହମଲା କରିଛନ୍ତି । କହିଛନ୍ତି ଏହା ଦେଶର ସବୁଠୁ ବେଇମାନ ଓ ଦୁର୍ନୀତିଗ୍ରସ୍ତ ଦଳ। ସେ ଆହୁରି କହିଛନ୍ତି ଯେ, ସେମାନେ ଜମି ଲୁଟନ୍ତି, ମହିଳାଙ୍କ ସହ ଦୁର୍ବ୍ୟବହାର କରନ୍ତି ଏବଂ ସହରୀ ନକ୍ସଲଙ୍କୁ ସମର୍ଥନ କରନ୍ତି। ପ୍ରଧାନମନ୍ତ୍ରୀ ମୋଦି ଲୋକଙ୍କୁ ଚେତାବନୀ ଦେଇ କହିଛନ୍ତି ଯେ, ଯଦି ଆମେ ଭାଗ ଭାଗ ହୋଇଯିବା, ଆମକୁ ଭାଗ ଭାଗ କରୁଥିବା ବ୍ୟକ୍ତି ଉତ୍ସବ ପାଳିବେ।
ଉଲ୍ଲେଖନୀୟ ଯେ, ମହାରାଷ୍ଟ୍ରର ଠାଣେରେ ଏକ ସାର୍ବଜନୀନ କାର୍ଯ୍ୟକ୍ରମକୁ ସମ୍ୱୋଧିତ କରି ପିଏମ୍ ମୋଦି କହିଛନ୍ତି, 'କଂଗ୍ରେସ ଦେଶର ସବୁଠୁ ଦୁର୍ନୀତିଗ୍ରସ୍ତ ଦଳ। ହରିୟାଣା କଂଗ୍ରେସର ଜଣେ ନେତା ଡ୍ରଗ୍ସ ସହ ଧରା ପଡ଼ିଛି। ଏମାନେ ଶୋଷଣ କରିବା ପାଇଁ ନୂଆ ନୂଆ ଉପାୟ ଖୋଜନ୍ତି। ହିମାଚଳ ପ୍ରଦେଶରେ ତ’ ସେମାନେ ସବୁ ସୀମା ପାର୍ କରିଛନ୍ତି । ଶୌଚାଳୟ ଟ୍ୟାକ୍ସ ନାମକ ଏକ ନୂଆ ଟ୍ୟାକ୍ସ ପ୍ରସ୍ତାବ ଦେଇଛନ୍ତି, ଯାହା ଆମ କଳ୍ପନା ବାହାରେ। ଗୋଟିଏ ପଟେ ମୁଁ ଶୌଚାଳୟ ଉପଲବ୍ଧ କରାଉଛି ଏବଂ ଅନ୍ୟପଟେ ସେମାନେ ଶୌଚାଳୟ ଉପରେ ଟ୍ୟାକ୍ସ ଲଗାଉଛନ୍ତି। ସେମାନେ ଜମି ଲୁଟନ୍ତି ଏବଂ ମହିଳାଙ୍କ ସହ ଦୁର୍ବ୍ୟବହାର କରୁଛନ୍ତି। କଂଗ୍ରେସର ଆଜି ପର୍ଦ୍ଦାଫାସ ହୋଇଛି। ସେମାନେ ସହରୀ ନକ୍ସଲର ସଂଗଠନ ଚଲାଉଛନ୍ତି। କଂଗ୍ରେସ ଖୋଲା ଖୋଲି ଭାବେ ସେମାନଙ୍କ ସମର୍ଥନରେ ରହିଛି, ଯେଉଁମାନେ ଭାରତର ବିକାଶରେ ବାଧା ସୃଷ୍ଟି କରୁଛନ୍ତି ।'
ପ୍ରଧାନମନ୍ତ୍ରୀ କହିଛନ୍ତି, 'ସେମାନେ ସମାଜକୁ ଭାଗ ଭାଗ କରି କ୍ଷମତାକୁ ଆସିବା ମିଶନରେ ଅଛନ୍ତି। ଇତିହାସରୁ ଆମକୁ ଶିକ୍ଷା ନେବାର ଅଛି। ଆମକୁ ଏକଜୁଟ୍ ରହିବାର ଅଛି । ଯଦି ଆମେ ଭାଗ ଭାଗ ହୋଇଯିବା, ତେବେ ସେମାନେ ଉତ୍ସବ ପାଳନ କରିବେ। ସେମାନେ ଯେଉଁଠାକୁ ଯାଉଛନ୍ତି, ସେଠାରେ ବିନାଶ ହେଉଛି। ସେମାନେ ହିଁ ଦେଶକୁ ଗରିବୀ ଭିତରକୁ ଠେଲି ଦେଇଥିଲେ। ତାଙ୍କ ସହ ମେଣ୍ଟ କରୁଥିବା ଦଳ ବି ତୁଷ୍ଟିକରଣ କଥା କହିବା ଆରମ୍ଭ କରନ୍ତି। କଂଗ୍ରେସ ସାବରକରଙ୍କୁ ଅପମାନିତ କରିଥାଏ ।'