ନୂଆଦିଲ୍ଲୀ, ୦୧/୦୨: ସଂସଦରେ ମୋଦି-୩.୦ ସରକାରଙ୍କ ପ୍ରଥମ ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପିତ ହୋଇଛି। ଆଜି ଅର୍ଥାତ ଶନିବାର ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୫-୨୬ ଆର୍ଥିକ ବର୍ଷର ବଜେଟ୍ ଉପସ୍ଥାପିତ କରିଛନ୍ତି। ଏହି ବଜେଟରେ ଯୁବବର୍ଗ ଏବଂ ମହିଳାଙ୍କ ଉପରେ ବିଶେଷ ଧ୍ୟାନ ଦିଆଯାଇଥିବା ବେଳେ ଗରିବ, ମଧ୍ୟବିତ୍ତ ,କୃଷକମାନଙ୍କ ପାଇଁ ଅନେକ ବଡ଼ ବଡ଼ ଘୋଷଣା କରିଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ । ଏହି ଘୋଷଣା ମଧ୍ୟରୁ ଇଲେକ୍ଟ୍ରିକ୍ ଗାଡ଼ିରେ ବ୍ୟବହୃତ ଲିଥିୟମ୍ ଏୟାର ବ୍ୟାଟେରୀ ଉତ୍ପାଦନରେ ରିହାତି ମଧ୍ୟ ସାମିଲ ରହିଛି । ଏଥିରେ ଇଲେକ୍ଟ୍ରିକ୍ ଗାଡ଼ିଗୁଡ଼ିକ ଶସ୍ତା ହେବା ନେଇ ଆଶା କରାଯାଉଛି।
ଏହା ମଧ୍ୟ ପଢନ୍ତୁ- AI ଶିକ୍ଷା ପାଇଁ ୫୦୦ କୋଟି; ଉଚ୍ଚମାଧ୍ୟମିକ ସ୍କୁଲରେ ହେବ ବ୍ରଡବ୍ୟାଣ୍ଡ ବ୍ୟବସ୍ଥା
ବଜେଟ୍ ଉପସ୍ଥାପନ ସମୟରେ ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଯେ, କୋବାଲ୍ଟ ପାଉଡର ଏବଂ ବର୍ଜ୍ୟବସ୍ତୁ, ଲିଥିୟମ୍-ଆୟନ ବ୍ୟାଟେରୀର ସ୍କ୍ରାପ୍, ସୀସା, ଜିଙ୍କ ଏବଂ ଅନ୍ୟାନ୍ୟ ୧୨ଟି ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥକୁ ଛାଡ଼ କରାଯିବ । ଏହା ବ୍ୟତୀତ ଇଲେକ୍ଟ୍ରିକ୍ ଗାଡ଼ି ପାଇଁ ଲିଥିୟମ୍-ଆୟନ ବ୍ୟାଟେରୀ ଉତ୍ପାଦନ ପାଇଁ ୩୫ ଅତିରିକ୍ତ ବସ୍ତୁର ସୀମା ଶୁଳ୍କରୁ ଛାଡ଼ କରାଯିବ। ପ୍ରକାଶ ଥାଉକି, ଅର୍ଥମନ୍ତ୍ରୀ ନିର୍ମଳା ସୀତାରମଣ ଅନେକ ଜିନିଷ ଉପରେ ମଧ୍ୟ କଷ୍ଟମ୍ ଡ୍ୟୁଟି ହ୍ରାସ କରିବାକୁ ଘୋଷଣା କରିଛନ୍ତି । ଯାହାଦ୍ବାରା କିଛି ଜିନିଷର ମୂଲ୍ୟରେ ହ୍ରାସ ହୋଇପାରେ ବୋଲି ଆଶା କରାଯାଉଛି। ବିଶେଷ କରି ଇଲେକ୍ଟ୍ରୋନିକ୍ସ, ଔଷଧ, ମୋବାଇଲ ବ୍ୟାଟେରୀ, ମୋବାଇଲ ଫୋନ୍, ଏଲଇଡ଼ି ଟିଭି, ଲେଦର ଜାତୀୟ ଜିନିଷ ଏବଂ ବୈଦ୍ୟୁତିକ ଯାନ ସହ ଜଡିତ ବିଭିନ୍ନ ଜିନିଷଗୁଡ଼ିକ ଶସ୍ତା ହେବା ନେଇ ବଜେଟରେ ଘୋଷଣା କରାଯାଇଛି।
