ନୂଆଦିଲ୍ଲୀ,୨୪।୧୦: ଋଷ ଓ ୟୁକ୍ରେନ୍ ଭିତରେ ଆରମ୍ଭ ହୋଇଥିବା ଯୁଦ୍ଧ ଦୁଇ ବର୍ଷରୁ ଅଧିକ ସମୟ ବିତିସାରିଛି। ଅନ୍ତର୍ଜାତୀୟ ସ୍ତରରେ ଏହା ବର୍ତ୍ତମାନ ସବୁଠାରୁ ବଡ ଚିନ୍ତାର ବିଷୟ। ଏବେ ଯୁଦ୍ଧକୁ ନେଇ ଏଭଳି ଏକ ଡାଟା ଆସିଛି, ଯାହାକୁ ନେଇ ଜାତିସଂଘ ଚିନ୍ତା ପ୍ରକାଶ କରିଛି। ମଙ୍ଗଳବାର ଜାତିସଂଘ ପକ୍ଷରୁ କୁହାଯାଇଛି ଏହି ଦୁଇ ବର୍ଷରେ ୟୁକ୍ରେନର ଜନସଂଖ୍ୟା କମି ଯାଇଛି ଓ ୨୦୧୪ରୁ ଏପର୍ଯ୍ୟନ୍ତ ୧ କୋଟି ଲୋକ କମ୍ ହୋଇଯାଇଛନ୍ତି।
ଋଷ ପ୍ରଥମ ଥର ୨୦୧୪ରେ ୟୁକ୍ରେନ୍ ଉପରେ ଆକ୍ରମଣ କରିଥିଲା। ଇଷ୍ଟର୍ଣ୍ଣ ୟୁରୋପ ଆଣ୍ଡ ସେଣ୍ଟ୍ରାଲ ଏସିଆ ପାଇଁ ୟୁଏନ୍ ପପୁଲେସନ୍ ଫଣ୍ଡର ରିଜନାଲ ଡାଇରେକ୍ଟର ଫ୍ଲୋରେସ୍ ବାଉର କହିଛନ୍ତି, ୨୦୧୪ ରୁ ଏପର୍ଯ୍ୟନ୍ତ ପୁରା ୟୁକ୍ରେନର ଜନସଂଖ୍ୟା ୧ କୋଟି ହ୍ରାସ ପାଇଛି। ସେଭଳି ୨୦୨୨ ଆକ୍ରମଣ ପରେ କେବଳ ଦୁଇ ବର୍ଷରେ ଜନସଂଖ୍ୟାରେ ୮୦ଲକ୍ଷ ହ୍ରାସ ପାଇଛି। ତେବେ ରିପୋର୍ଟରେ ଏହା ମଧ୍ୟ କୁହାଯାଇଛି ଯେ, ଏହି ସଂଖ୍ୟା ଜନଗଣନାରୁ ନିଆଯାଇ ନାହିଁ। ଏହି ସମୟରେ ୟୁକ୍ରେନ୍ରେ ଜନଗଣନା ହୋଇନାହିଁ।
ୟୁଏନ୍ ପପୁଲେସନ ଫଣ୍ଡ ଜାତୀୟ ପରିସଂଖ୍ୟାନ କାର୍ଯ୍ୟାଳୟ ପକ୍ଷରୁ କହିଛି ୨୦୧୪ ରୁ ୟୁକ୍ରେନ୍ର ଜନସଂଖ୍ୟା ୪ କୋଟି ୫୦ ଲକ୍ଷ ଥିଲା। ସେତେବେଳେ ଋଷ କେବଳ କ୍ରିମିୟା ଉପରେ କବଜା କରିଥିଲା, କିନ୍ତୁ ଫେବୃଆରୀ ୨୦୨୨ ରେ ଋଷର ଆକ୍ରମଣ ବଡ଼ ସ୍ତରରେ ହୋଇଥିଲା। ଏଥିରେ ପୁରା ୟୁକ୍ରେନ୍ ଉପରେ ଆକ୍ରମଣ ହୋଇଥିଲା ସେତେବେଳେ ଜନସଂଖ୍ୟା ହ୍ରାସ ପାଇ ୪ କୋଯି ୩୦ ଲକ୍ଷ ହୋଇଯାଇଥିଲା, କିନ୍ତୁ ୨୦୨୪ ପର୍ଯ୍ୟନ୍ତ ଏହି ସଂଖ୍ୟା ୩ କୋଟି ୫୦ ଲକ୍ଷରେ ପହଁଞ୍ଚି ଯାଇଥିଲା। ଫ୍ଲୋରେସ୍ ବାଉର ସାମ୍ବାଦିକଙ୍କୁ କହିଛନ୍ତି, ଜନସଂଖ୍ୟାରେ ଏଭଳି ପରିବର୍ତ୍ତନ ପାଇଁ ବହୁ ଫାକ୍ଟର ଦାୟୀ। ବାର୍ଥ ରେଟ୍ ଓ ପଳାୟନ ଜନସଂଖ୍ରା ହ୍ରାସର ମୁଖ୍ୟ କାରଣ। ସେ କହିଛନ୍ତି, ୟୁକ୍ରେନ୍ ସବୁଠାରୁ କମ୍ ବାର୍ଥ ରେଟ୍ ଥିବା ୟୁରୋପୀୟ ଦେଶ ମଧ୍ୟରୁ ଅନ୍ୟତମ। ଏଠାରେ ହାରାହାରି ଜଣେ ମହିଳା କେବଳ ଗୋଟିଏ ସନ୍ତାନ ଜନ୍ମ କରନ୍ତି। ସେଠାରେ ପୁରା ଦୁନିଆରେ ସବୁଠାରୁ କମ୍ ବାର୍ଥ ରେଟ୍।
