ନୂଆଦିଲ୍ଲୀ: ଫିଲିପାଇନ୍ସରେ ତାଣ୍ଡବ ରଚିଛି ବାତ୍ୟା ଟ୍ରାମି । ବାତ୍ୟା ପ୍ରଭାବରେ ପ୍ରାୟ ୨୬ ଜଣଙ୍କ ଜୀବନ ଯାଇଥବା ବେଳେ ଅନେକ ଗୁରୁତର ହୋଇଛନ୍ତି । ଦେଢ଼ ଲକ୍ଷ ଲୋକ ନିଜ ଘରଦ୍ବାର ଛାଡ଼ି ବାତ୍ୟା ଆଶ୍ରୟସ୍ଥଳରେ ରହିଛନ୍ତି । ବାତ୍ୟା ଟ୍ରାମି ଲ୍ୟାଣ୍ଡଫଲ କରିବା ପରେ ପ୍ରବଳ ବର୍ଷ ଲାଗିରହିଛି । ଏଥିଯୋଗୁଁ ବନ୍ୟା ପରିସ୍ଥିତି ସୃଷ୍ଟି ହୋଇଥିବା ବେଳେ ବିଭିନ୍ନ ସ୍ଥାନରେ ଭୂସ୍ଖଳନ ହୋଇଥିବା ନେଇ ସୂଚନା ମିଳିଛି । ବାତ୍ୟା ପରବର୍ତ୍ତୀ ବନ୍ୟାରେ ରାସ୍ତା ସବୁ ଧୋଇଯାଇଥିବା ବେଳେ କାର, ବସ ଆଦି ଭାସିଯାଇଛି ।
ବାତ୍ୟାର ଭୟାବହତାକୁ ଦୃଷ୍ଟିରେ ରଖି ସ୍କୁଲ ଏବଂ କଲେଜ ବନ୍ଦ ରହିଛି । ଫିଲିପାଇନ୍ସର ପୂର୍ବ ତଟରେ ବାତ୍ୟା ଟ୍ରାମି ମାଡ଼ ହେବା ପରେ ସ୍ଥିତି ଅଣାୟତ୍ତ ହୋଇପଡ଼ିଛି । ଲକ୍ଷାଧିକ ଲୋକଙ୍କୁ ଉଦ୍ଧାର ଲାଗି ପ୍ରଶାସନ ଚେଷ୍ଟା ଜାରି ରଖିଛି । ଜୀବନ ବିକଳରେ ଘରର ଛାତ ଉପରେ ରହିଯାଇଥିବା ଲୋକମାନଙ୍କୁ ମୋଟର ବୋଟ୍ ଦ୍ବାରା ଶୁଖିଲା ସ୍ଥାନକୁ ନିଆଯାଉଛି । ଏବେ ବି ଫିଲିପାଇନ୍ସର କେତେକ ସ୍ଥାନରେ ୯୦ କିଲୋମିଟର ଏବଂ ତାଠୁ ଅଧିକ ବେଗରେ ପବନ ପ୍ରବାହିତ ହେଉଛି ।
ବନ୍ୟା ଏବଂ ଭୂସ୍ଖଳନ ଦ୍ବାରା ବେଶୀ ପ୍ରଭାବିତ ହୋଇଛି ବିକୋଲ ପ୍ରଦେଶ । ଅଧିକାଂଶ ଲୋକ ବନ୍ୟା ପାଣିରେ ଭାସିଯାଇ ମୃତ୍ୟୁବରଣ କରିଛନ୍ତି । ବାତ୍ୟା ଟ୍ରାମି ଦ୍ବାରା ପ୍ରଭାବିତ ଲୋକଙ୍କ ସଂଖ୍ୟା ଖୁବ ଅଧିକ ହୋଇଥିବାରୁ ଉଦ୍ଧାର କାର୍ଯ୍ୟ ବିଳମ୍ବ ହେଉଛି । ତୁରନ୍ତ ଯେଉଁମାନଙ୍କୁ ଉଦ୍ଧାର କରାଯାଇ ପାରିବ ନାହିଁ ସେମାନଙ୍କ ପାଖକୁ ଖାଦ୍ୟ ଏବଂ ପାନୀୟ ପଠାଯାଉଛି । ବର୍ଷା ଲାଗି ରହଥିବାରୁ ଉଦ୍ଧାର କାର୍ଯ୍ୟ ବାଧାପ୍ରାପ୍ତ ହୋଇଛି ।
ଏହା ପୂର୍ବରୁ ସେପ୍ଟେମ୍ବରରେ ବାତ୍ୟା ୟାଗି ଫିଲିପାଇନ୍ସକୁ ଧ୍ବସ୍ତ ବିଧ୍ବସ୍ତ କରିପକାଇଥିଲା । ପ୍ରତିବର୍ଷ ଫିଲିପାଇନ୍ସ ପ୍ରାୟ ୨୦ଟି ଛୋଟ ବଡ଼ ବାତ୍ୟାର ସମ୍ମୁଖୀନ ହେଉଛି । ୨୦୧୩ରେ ଟାଇଫୁନ୍ ହେୟାନ୍ ଯୋଗୁ ୭୩୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା । ଏହି ବାତ୍ୟା ଅନେକ ଗାଁକୁ ଧ୍ବଂସ କରିଦେଇଥିଲା ।
