ନୂଆଦିଲ୍ଲୀ: ବାଂଲାଦେଶ ପୁଣି ଥରେ ଅଶାନ୍ତ ହୋଇପଡ଼ିଛି । ଶେଖ ହସିନା ସରକାରର ପତ୍ତନ ପରେ ଏବେ ରାଷ୍ଟ୍ରପତି ମହମ୍ମଦ ଶାହାବୁଦ୍ଦିନଙ୍କ ଇସ୍ତଫା ଦାବି ଜୋର ଧରିଛି । ଉତ୍ତ୍ୟକ୍ତ ଛାତ୍ରଛାତ୍ରୀ ବଙ୍ଗଭବନକୁ ଘେରିବା ସହ ଶାହାବୁଦ୍ଦିନଙ୍କୁ ଇସ୍ତଫା ଦେବା ପାଇଁ ସାତ ଦିନର ଅଲଟିମେଟମ ଦେଇଛନ୍ତି । ଗତ ସପ୍ତାହରେ ଏକ ସାକ୍ଷାତକାରରେ ଶାହାବୁଦ୍ଦିନ କହିଥିଲେ ଯେ, ଅଗଷ୍ଟରେ ଶେଖ ହସିନା ଦେଶ ଛାଡିବା ପୂର୍ବରୁ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇଥିବା ନେଇ ତାଙ୍କ ପାଖରେ କୌଣସି ପ୍ରମାଣ ନାହିଁ । ଏହି ବୟାନ ପରେ ଛାତ୍ରଛାତ୍ରୀମାନେ ଉତକ୍ଷିପ୍ତ ହୋଇପଡ଼ିଥିଲେ ।
ବାଂଲାଦେଶର ଅନ୍ତରୀଣ ସରକାର ବୁଧବାର କହିଛନ୍ତି ଯେ, ରାଷ୍ଟ୍ରପତିଙ୍କୁ ପଦରୁ ହଟାଇବା ନେଇ ସେ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନେଇନାହାନ୍ତି । ସେପଟେ ଅନ୍ତରୀଣ ସରକାର ଶେଖ ହସିନାଙ୍କ ନେତୃତ୍ୱାଧୀନ ଆୱାମୀ ଲିଗ୍ ପାର୍ଟିର ଛାତ୍ର ଶାଖା ବାଂଲାଦେଶ ଷ୍ଟୁଡେଣ୍ଟସ୍ ଲିଗ୍ (ବିସିଏଲ୍)କୁ ଆତଙ୍କବାଦ ନିରୋଧୀ ଆଇନ ଅନୁଯାୟୀ ନିଷିଦ୍ଧ କରିଛନ୍ତି । ବିଜ୍ଞପ୍ତିରେ କୁହାଯାଇଛି ଯେ ଆୱାମୀ ଲିଗ୍ ସରକାରର ଗତ ୧୫ ବର୍ଷ ମଧ୍ୟରେ ଛାତ୍ର ସଂଗଠନ ଅନେକ ଅନୈତିକ କାର୍ଯ୍ୟକଳାପରେ ଲିପ୍ତ ରହିଛି ।
ଅନ୍ୟପଟେ ରାଷ୍ଟ୍ରପତିଙ୍କ ଇସ୍ତଫା ଦାବି କରି ହୋଇଥିବା ବିକ୍ଷୋଭର ଟିଭି ଫୁଟେଜରେ ବିକ୍ଷୋଭକାରୀମାନେ ବିଭିନ୍ନ ବ୍ୟାନରରେ ପୋଲିସ ସହ ଧସ୍ତାଧସ୍ତି କରୁଥିବା ଦେଖିବାକୁ ମିଳିଛି ।ରାଷ୍ଟ୍ରପତି ଭବନରେ ବିକ୍ଷୋଭକାରୀଙ୍କୁ ବ୍ୟାରିକେଡ୍ ଭାଙ୍ଗିବାରୁ ରୋକିବା ପାଇଁ ସୁରକ୍ଷା ବାହିନୀ ଗୁଳି ଚଳାଇବାରୁ ଦୁଇ ଜଣ ଆହତ ହୋଇଛନ୍ତି। ହିଂସାତ୍ମକ ଭିଡ଼କୁ ହଟାଇବା ପାଇଁ ବ୍ୟବହୃତ ଗ୍ରେନେଡ୍ରେ ଅନ୍ୟ ଜଣେ ବ୍ୟକ୍ତି ଆହତ ହୋଇଛନ୍ତି । ବିକ୍ଷୋଭକୁ ଦୃଷ୍ଟିରେ ରଖି ରାଷ୍ଟ୍ରପତିଙ୍କ ବାସଭବନ ଚାରିପଟେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି ।