ରାଉରକେଲା,୨୩/୧୧: ଦୀର୍ଘ ୧୫ବର୍ଷ ପରେ ରାଉରକେଲା ସହରବାସୀ ଇନ୍ଦିରା ଗାନ୍ଧି (ଆଇଜି) ପାର୍କରେ ବାଘ ଦେଖିବାର ସୁଯୋଗ ପାଇବେ । ମହାରାଷ୍ଟ୍ର ପୁନେସ୍ଥିତ ରାଜୀବ ଗାନ୍ଧି ବାୟୋଲୋଜିକାଲ ଚିଡ଼ିଆଖାନାରୁ ଏଠାକୁ ଅତିଥି ହୋଇ ଆସିଛନ୍ତି ଦୁଇଟି କଲରାପତରିଆ। ତନ୍ମଧ୍ୟରୁ ଗୋଟିଏ ମାଈ ଓ ଅନ୍ୟଟି ଅଣ୍ଡିରା ।
ରାଉରକେଲା ଇସ୍ପାତ କାରଖାନା (ଆର୍ଏସ୍ପି) ଉଦ୍ୟାନ ବିଭାଗ ଦ୍ୱାରା ପରିଚାଳିତ ହେଉଛି ଆଇଜି ପାର୍କ । ଏହି ପାର୍କରେ ଥିବା ଚିଡ଼ିଆଖାନାରେ ପର୍ଯ୍ୟଟକଙ୍କ ମନୋରଞ୍ଜନ ପାଇଁ ଭାଲୁ, କୁମ୍ଭୀର, ମାଙ୍କଡ଼, ହରିଣ, ସମ୍ବର, ଅଜଗର, ନୀଳଗାଈ, ମୟୂର, ବିଭିନ୍ନ ପ୍ରଜାତିର ଚଢ଼େଇ ଅଛନ୍ତି । ୨୦୦୧ରେ ଏଠାରେ ଏକ ବାଘ ଥିଲା । ରୋଗରେ ପଡ଼ି ଏହାର ମୃତ୍ୟୁ ଘଟିଥିଲା । ସେହିଦିନଠାରୁ ବାଘ ଏନ୍କ୍ଲୋଜର ଖାଲି ଥିଲା । ବାଘ ଆଣିବା ଲାଗି ଆଇଜି ପାର୍କ କର୍ତ୍ତୃପକ୍ଷ ଅନେକ ଦିନରୁ ଉଦ୍ୟମ ଚଳାଇଥିଲେ । କିଛି ମାସ ତଳେ ଦୁଇଟି କଲରାପତରିଆ ଆଣିବା ଲାଗି ପୁନେସ୍ଥିତ ରାଜୀବ ଗାନ୍ଧି ବାୟୋଲୋଜିକାଲ ଚିଡ଼ିଆଖାନା କର୍ତ୍ତୃପକ୍ଷଙ୍କ ସହ ଆର୍ଏସ୍ପି ଅଧିକାରୀ ଆଲୋଚନା କରିଥିଲେ । ବନ ବିଭାଗର ଅନୁମତି ମିଳିବା ପରେ ଆରଏସ୍ପି ଉଦ୍ୟାନ ବିଭାଗର ଡିଜିଏମ୍ ଡା. ଅଭିଜିତ ବିଶ୍ୱାସଙ୍କ ନେତୃତ୍ୱରେ ୪ଜଣିଆ ଟିମ୍ ଗତ ସପ୍ତାହରେ ପୁନେ ଯାଇଥିଲେ । ଆବଶ୍ୟକ ପ୍ରକ୍ରିୟା ପରେ ଦୁଇଟି କଲରାପତରିଆ ଆଇଜି ପାର୍କକୁ ଆସିଛନ୍ତି । ଦୁଇଟି ସ୍ୱତନ୍ତ୍ର ଯନ୍ତାରେ ଗତ ଗୁରୁବାର ଭୋର୍ ୩ଟାରେ ବାଘ ଦୁଇଟି ଏଠାରେ ପହଞ୍ଚିଥିଲେ । ମାଈ କଲରାପତରିଆର ଆନୁମାନିକ ବୟସ ୭ ବର୍ଷ ଏବଂ ଅଣ୍ଡିରା କଲରାପତରିଆରଟି ୮ ବର୍ଷର ହେବ । ସେମାନଙ୍କୁ ଆଇଜି ପାର୍କ କ୍ୱାରେଣ୍ଟାଇନ୍ ସେଣ୍ଟରରେ ରଖାଯାଇଛି । ଉଦ୍ୟାନ ବିଭାଗର ସ୍ୱତନ୍ତ୍ର ଟିମ୍ ସେମାନଙ୍କ ଉପରେ ନଜର ରଖିଛନ୍ତି । ୨୧ ଦିନ କ୍ୱାରେଣ୍ଟାଇନ୍ରେ ରହିବା ପରେ ପ୍ରାୟ ୨ ଏକର ପରିଧିରେ ନିର୍ମିତ ଏନ୍କ୍ଲୋଜରରେ ସେମାନଙ୍କୁ ଛଡ଼ାଯିବ । ପରେ ଦର୍ଶକ ବାଘଙ୍କୁ ଦେଖିପାରିବେ ।
