ଢେଙ୍କାନାଳ,୮/୬: ଜମିଜମା ବିବାଦକୁ ନେଇ ପୁତୁରା ଉପରେ ପେଟ୍ରୋଲ ପକାଇ ଜାଳିଦେଲା ବଡବାପା। କେବଳ ସେତିକିରେ ମନ ଶାନ୍ତି ହେଲାନି ଯେ, ପୁତୁରାର ପାନ ଦୋକାନରେ ମଧ୍ୟ ନିଆଁ ଲଗାଇ ଦେଇଛି। ପୁଲିସ ଗିରଫଦାରୀ ଭୟରେ ଅଭିଯୁକ୍ତ ବଡବାପା କୀଟନାଶକ ପିଇ ଗୁରୁତର ହୋଇଛନ୍ତି। ଉଭୟ ପୁତୁରା ଓ ବଡବାପାଙ୍କୁ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି କରାଯାଇଛି। ଢେଙ୍କାନାଳ ଜିଲ୍ଲା ଭୁବନ ଥାନା ଇଲାକା ମହୁଲପାଳ ଗ୍ରାମରେ ଏହି ଘଟଣା ଘଟିଛି।
ମହୁଲପାଳ ଗ୍ରାମର ଚୈତନ୍ୟ ସାହୁ ଓ ତାଙ୍କ ପୁତୁରା ଟୁକୁନା ସାହୁଙ୍କ ମଧ୍ୟରେ ଜମିଜମା ବିବାଦ ରହିଛି। ଏହାକୁ ନେଇ ରବିବାର ସକାଳେ ଉଭୟଙ୍କ ପରିବାର ମଧ୍ୟରେ କଳି ଝଗଡା ଲାଗିଥିଲା। ପୁତୁରା ଟୁକୁନା ଘର ନିକଟରେ ଥିବା ପାନ ଦୋକାନ ଖୋଲିବାକୁ ଯାଉଥିବା ବେଳେ ବଡ଼ବାପା ଚୈତନ୍ୟ ତାଙ୍କ ଉପରକୁ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ। ଟୁକୁନା ପ୍ରାଣ ବିକଳରେ ଦୌଡ଼ି ଘର ମଧ୍ୟକୁ ପଳାଇ ଯାଇଥିଲେ। ଚୈତନ୍ୟଙ୍କ ମନ ଏତିକିରେ ଶାନ୍ତି ହୋଇନଥିଲା। ଟୁକୁନାଙ୍କ ଦୋକାନକୁ ନିଆଁ ଲଗାଇ ଜାଳି ଦେଇଥିଲେ। ପରିବାର ଲୋକ ଟୁକୁନାଙ୍କୁ ଗୁରୁତର ଅବସ୍ଥାରେ ପ୍ରଥମେ ଭୁବନ ମେଡିକାଲରେ ଭର୍ତ୍ତି କରିଥିଲେ। ତାଙ୍କ ଅବସ୍ଥା ଗୁରୁତର ଥିବାରୁ ପ୍ରାଥମିକ ଚିକିତ୍ସା ପରେ ଢେଙ୍କାନାଳ ମୁଖ୍ୟ ଚିକିତ୍ସାଳୟକୁ ଅଣାଯାଇଛି। ଏହି ଘଟଣା ଖବର ପାଇ ଭୁବନ ପୁଲିସ ଗ୍ରାମରେ ପହଞ୍ଚିଥିଲା। ମାତ୍ର ପୁଲିସ ଗିରଫଦାରୀ ଭୟରେ ଅଭିଯୁକ୍ତ ବଡବାପା ଚୈତନ୍ୟ କିଟନାଷକ ଔଷଧ ପିଇ ଦେଇଥିଲେ। ତାଙ୍କୁ ଗୁରୁତର ଅବସ୍ଥାରେ ଭୁବନ ମେଡିକାଲରେ ଭର୍ତ୍ତି କରାଯାଇଛି। ପୁଲିସ ଏହି ଘଟଣାର ଅନୁସନ୍ଧାନ ଚଳାଇଛି।
