ମହାବିରୋଡ଼,୨୧/୬: ଢେଙ୍କାନାଳ ଜିଲ୍ଲା କଙ୍କଡାହାଡ଼ ବ୍ଲକ କାନ୍ତୋଲ ସରପଞ୍ଚଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆସିବା ପରେ ଶନିବାର ଭୋଟ ଗ୍ରହଣ ହୋଇଛି। କାନ୍ତୋଲ ଗ୍ରାମ ପଞ୍ଚାୟତ କାର୍ଯ୍ୟାଳୟଠାରେ ଅନୁଷ୍ଠିତ ଭୋଟ ଗ୍ରହଣରେ ଅନାସ୍ଥା ସପକ୍ଷରେ ୮ ଜଣ ସଦସ୍ୟ ଭୋଟ ଦେଇଥିବା ବେଳେ ବିପକ୍ଷରେ କେହି ସଦସ୍ୟ ଭୋଟ ଦେଇନାହାନ୍ତି। ୨୦୨୨ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ କାନ୍ତୋଲ ଗ୍ରାମ ପଞ୍ଚାୟତରେ କାମିନୀ ଦେହୁରୀ ସରପଞ୍ଚ ଭାବେ ନିର୍ବାଚିତ ହୋଇଥିଲେ। ମାତ୍ର ସରପଞ୍ଚଙ୍କ କାର୍ଯ୍ୟକଳାପରେ ଅସନ୍ତୁଷ୍ଟ ହୋଇ ତାଙ୍କ ବିରୋଧରେ ୱାର୍ଡ ସଦସ୍ୟାମାନେ କାମାକ୍ଷାନଗର ଉପଜିଲ୍ଲାପାଳଙ୍କ ନିକଟରେ ଅନାସ୍ଥା ପ୍ରସ୍ତାବ ଆଗତ କରିଥିଲେ।
ପୂର୍ବ ସ୍ଥିରୀକୃତ ଯୋଜନା ଅନୁସାରେ ଶନିବାର କାନ୍ତୋଲ ଗ୍ରାମ ପଞ୍ଚାୟତ କାର୍ଯ୍ୟାଳୟଠାରେ ଅନାସ୍ଥା ପ୍ରସ୍ତାବ ନେଇ ଭୋଟ ଗ୍ରହଣ ହୋଇଥିଲା। ସରପଞ୍ଚ କାମିନୀ ଦେହୁରୀ, ନାଏବ ସରପଞ୍ଚ ରମେଶ ଦେହୁରୀଙ୍କୁ ମିଶି ୮ ଜଣ ୱାର୍ଡ ସଦସ୍ୟ, ସଦସ୍ୟା ଉପସ୍ଥିତ ଥିଲେ ।ଏହି ଭୋଟ ଗ୍ରହଣରେ ୧୨ ଜଣଙ୍କ ମଧ୍ୟରୁ ୮ ଜଣ ସଦସ୍ୟ, ସଦସ୍ୟା ଓ ସରପଞ୍ଚ ଭାଗ ନେଇଥିଲେ। ନିର୍ବାଚନ ଅଧିକାରୀ କାମାକ୍ଷାନଗର ଉପଜିଲ୍ଲାପାଳଙ୍କ କାର୍ଯ୍ୟାଳୟର ଡେପୁଟି କଲେକ୍ଟର ଜ୍ୟୋତିରୂପା ଶତପଥୀ ନିର୍ବାଚନ ପରିଚାଳନା କରିଥିବା ବେଳେ ଗ୍ରାମ ପଞ୍ଚାୟତ ଉନ୍ନୟନ ଅଧିକାରୀ ଏସ ନୈବେଦ୍ୟ ଲଲାଟେନ୍ଦୁ, କାନ୍ତୋଲ ପଞ୍ଚାୟତ ନିର୍ବାହୀ ଅଧିକାରୀ ସସ୍ମିତା ସେଠୀ ସହଯୋଗ କରିଥିଲେ। ଫଳାଫଳ ଜିଲ୍ଲାପାଳ ଘୋଷଣା କରିବେ ବୋଲି ନିର୍ବାଚନ ପରିଚାଳନା କରୁଥିବା ଅଧିକାରୀ ପ୍ରକାଶ କରିଛନ୍ତି।
