ଢେଙ୍କାନାଳ,୧୮/୬: ଢେଙ୍କାନାଳ ସହରରେ ସିରିଜ୍ ଲୁଟ୍। ମଙ୍ଗଳବାର ରାତିରେ ଏକାଧିକ ଘରେ କଳାକନା ବୁଲାଇଦେଲେ ଦୁର୍ବୃତ୍ତ। କଣ୍ଟାନାଳୀ ବାଇପାସ୍ରେ ସୁଧାଂଶୁ ଧଳଙ୍କ ଘରୁ ଝରକା ଭାଙ୍ଗି ସୁନା ଅଳଙ୍କାର ଚୋରି କରିନେଇଥିବା ବେଳେ ନିକଟରେ ଅନ୍ୟ ୨ଟି ଘରୁ ମଧ୍ୟ ଚୋରି ହୋଇଥିବା ଅଭିଯୋଗ ହୋଇଛି।
ସୂଚନା ଅନୁସାରେ, କଣ୍ଟାନାଳୀ ବାଇପାସ୍ରେ ଥିବା ସୁଧାଂଶୁ ଧଳଙ୍କ ପରିବାର ଦୁଇ ତିନି ଦିନ ହେବ କୌଣସି କାମରେ ବାହାରକୁ ଯାଇଥିଲେ। ମଙ୍ଗଳବାର ରାତିରେ କିଛି ଦୁର୍ବୃତ୍ତ ତାଙ୍କ ଘର ପଛ ପାର୍ଶ୍ଵ ଗ୍ରୀଲ ତାଡି ଗଡ୍ରେଜ୍ ତାଲା ଭାଙ୍ଗି ସୁନା ଗହଣା ଲୁଟି ନେଇଛନ୍ତି। ଆଜି ସକାଳୁ ପଡୋଶୀ ଗ୍ରୀଲ୍ ଭଙ୍ଗା ଯାଇଥିବା ଦେଖି ଚୋରି ହୋଇଥିବା ଖବର ଦେଇଥିଲେ। ସୁଧାଂଶୁଙ୍କ ପରିବାର ପହଞ୍ଚିବା ପରେ ଗଡ୍ରେଜ୍ରେ ଥିବା ସୁନା ହାର, କାନଫୁଲ ୪ ହଳ, ଚୁଡ଼ି ସମେତ କିଛି ଟଙ୍କା ଚୋରି ହୋଇଯାଇଥିବା ଜଣାପଡିଥିଲା।
ସେହିପରି ସୁଧାଂଶୁଙ୍କ ଘର ନିକଟ ଶୁଶାନ୍ତ ବେହେରା ଓ ବିଶ୍ୱମ୍ବର ସାହୁଙ୍କ ଘରୁ ମଧ୍ୟ ଚୋରି ହୋଇଛି। ଶୁଶାନ୍ତ ସମ୍ବଲପୁର ଯାଇଥିବାରୁ ତାଙ୍କ ଘର ତାଲା ପଡ଼ିଥିଲା। ଦୁର୍ବୃତ୍ତମାନେ ତାଙ୍କ ଘରକୁ ମଧ୍ୟ ଟାର୍ଗେଟ୍ କରିଥିଲେ। ଏନେଇ ତାଙ୍କୁ ଖବର ଦିଆଯାଇଥିଲେ ସୁଦ୍ଧା ଖବର ଲେଖାହେବା ସୁଦ୍ଧା ସେମାନେ ଘରେ ପହଞ୍ଚି ନଥିବାରୁ କ’ଣ ଚୋରି ହୋଇଛି ତାହା ଜଣାପଡିନାହିଁ । ପୁଲିସ ପହଞ୍ଚି ତଦନ୍ତ କରୁଛି।
