ଫିରିଙ୍ଗିଆ,୧୨/୯ : ପଶ୍ଚିମବଙ୍ଗରୁ ଆସି ଓଡ଼ିଶାରେ ପାଣି ପାଇପ ଚୋରି କରି ଫେରାର ହେଉଥିବାବେଳେ ମାଡ଼ି ବସିଲା ପୋଲିସ I ଏକ ଟ୍ରକ ସହ ଚୋରି ହୋଇଥିବା ପାଣି ପାଇପକୁ ପୋଲିସ ଜବତ କରିଥିବାବେଳେ ଏହି ଚୋରିରେ ସାମିଲ ଥିବା ୪ ଜଣ ଆନ୍ତରାଜ୍ୟ ଚୋରକୁ ଗିରଫ କରିବାରେ ପୋଲିସ ସଫଳ ହୋଇଛି । ଅନ୍ୟ ୩ଜଣ ଚୋର ଫେରାର ହୋଇଯାଇଥିବା ନେଇ ଫୁଲବାଣୀ ସଦର ଏସଡିପିଓ ସୁପ୍ରସନ୍ନ ମଲିକ୍ ସାମ୍ବାଦିକ ସମ୍ମିଳନୀ ଜରିଆରେ ସୂଚନା ଦେଇଛନ୍ତି । 

ପୋଲିସର ସୂଚନା ଅନୁସାରେ ଗତ କିଛି ମାସ ହେବ ରାଜ୍ୟ ସରକାରଙ୍କ ଜଳ ଓ ପରିମଳ ବିଭାଗ ଅଧୀନରେ କନ୍ଧମାଳ ଜିଲ୍ଲାରେ ମେଗା ଜଳ ଯୋଗାଣ ପ୍ରକଳ୍ପ କାମ ଆରମ୍ଭ ହୋଇଛି I ଏହିକ୍ରମରେ ଜିଲ୍ଲାର ଫିରିଙ୍ଗିଆ ଓ ଗୋଛାପଡା ଅଂଚଳରେ ମଧ୍ୟ ଏହି କାମ ଆରମ୍ଭ ହୋଇଥିବାବେଳେ କମିଟିକୁ ବିଭିନ୍ନ ଠିକା ସଂସ୍ଥା ଦ୍ୱାରା କରାଯାଉଛି I ତେବେ ଗୋଛାପଡା ଥାନା ଅଧୀନରେ ଥିବା ବନ୍ଧୁଲି ଓ ଖଜୁରୀଗାଁ ନିକଟରେ ଏହି ପାଣି ପାଇପ ଲାଇନ କାମରେ ବ୍ୟବହୃତ ହେଉଥିବା ଲୁହା ପାଇପ ତିଆରି ପାଣିପାଇପ ଗଛିତ କରି ରଖାଯାଇଥିଲା I ତେବେ ଗତ ୧୧ ତାରିଖରେ ଉକ୍ତ ଗଛିତ ଲୁହା ପାଇପକୁ କିଛି ଦୁର୍ବୃତ୍ତ ଚୋରି କରି ନେଇଥିବା ନେଇ ଏହି କାମ କରୁଥିବା ପିଏମ କଣ୍ଟେଣ୍ଟ ନାମକ ଠିକା ସଂସ୍ଥାର ମ୍ୟାନେଜର ଗୋଛାପଡା ଥାନାରେ ଲିଖିତ ଅଭିଯୋଗ କରିଥିଲେ I 

କମ୍ପାନୀ କର୍ତ୍ତୃପକ୍ଷଙ୍କ ଅଭିଯୋଗ କ୍ରମେ ଥାନାରେ କେଶ ନଂ ୧୬୦/୨୪ରେ ଏକ ଚୋରି ମାମଲା ରୁଜୁ କରିବା ସହ ଗୋଛାପଡ଼ା ଥାନା ଅଧିକାରୀ ପ୍ରଭାତ ବେହେରାଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇ ତଦନ୍ତ ଆରମ୍ଭ କରାଯାଇଥିଲା I ଏକ ବିଶେଷ ସୂତ୍ରରୁ ପଶ୍ଚିମବଙ୍ଗ ନମ୍ବର ଥିବା ଏକ ଟ୍ରାକରେ କିଛି ପାଣି ପାଇପ ଗୋଛାପଡାଠାରୁ ବୌଦ୍ଧ ଜିଲ୍ଲା କଣ୍ଟାମଲକୁ ସଂଯୋଗ କରୁଥିବା ରାସ୍ତାରେ ଯାଉଥିବା ସୂଚନା ମିଳିଥିଲା I ବିଳମ୍ବ ନ କରି ଗୋଛାପଡା ପୋଲିସ ଟିମ ଉକ୍ତ ରାସ୍ତାର ସୁଟାଣି ଘାଟି ନିକଟରେ ଟ୍ରକ ଟିକୁ ଜବତ କରିବାରେ ସଫଳ ହୋଇଥିଲେ I

ତେବେ ଟ୍ରକରୁ ଚୋରି ହୋଇଥିବା ଶହେ ପିସ ଲୁହା ପାଇପ ଜବତ ହୋଇଥିବାବେଳେ ଯାହାର ଆନୁମାନିକ ମୂଲ୍ୟ ୬ ଲକ୍ଷ୍ୟ ଟଙ୍କା ହେବ ବୋଲି ଅନୁମାନ କରାଯାଉଛି I ଗିରଫ ହୋଇଥିବା ଅଭିଯୁକ୍ତମାନେ ପଶ୍ଚିମବଙ୍ଗର ମୁରସିଦାବାଦ ଅଞ୍ଚଳର ବୋଲି ଜଣାପଡ଼ିଥିବାବେଳେ ସେମାନଙ୍କ ମାଧ୍ୟରେ ଟ୍ରକର ଡ୍ରାଇଭର ନା ପାଲଟୁ ରଏ ଓ ଅନ୍ୟ ତିନି ଜଣ ଅଭିଯୁକ୍ତଙ୍କ ନା ଏମଡି ନାକସ ଡୋଲୀ, ମାଇନୁର ହୁସେନ ଓ ଇସ୍ରା ଫଳ ବୋଲି ଜଣାପଡିଛି I ତେବେ ଗିରଫ ଅଭଯୁକ୍ତମାନଙ୍କୁ ଗୁରୁବାର କୋର୍ଟ ଚାଲାଣ କରାଯାଇଥିବାବେଳେ ପୋଲିସ ଅଧିକ ତଦନ୍ତ ଜାରି ରଖିଥିବା ସୂଚନା ଦେଇଛନ୍ତି ଏସଡିପିଓ ସୁପ୍ରସନ୍ନ ମଳିକ I