ମହାବିରୋଡ଼,୨୭/୦୫: ଢେଙ୍କାନାଳ ଜିଲ୍ଲା କଙ୍କଡ଼ାହାଡ଼ ବ୍ଲକ ଉର୍ବେଙ୍ଗି ଗ୍ରାମ ନିକଟରେ ଏକ ନମ୍ବର ବିହୀନ ଶାଳ କାଠ ବୋଝେଇ ଟ୍ରାକ୍ଟରକୁ ଜବତ କରିଛି ବନ ବିଭାଗ। ସୂଚନା ମୁତାବକ, ଗତକାଲି ବିଳମ୍ବିତ ରାତି ପ୍ରାୟ ୨ଟା ସମୟରେ କାମାକ୍ଷାନଗର ପଶ୍ଚିମାଞ୍ଚଳ ରେଞ୍ଜରୁ ଏକ ଟ୍ରକ୍ଟରରେ ଶାଳ କାଠ ଚୋରା ଚାଲାଣ ହେଉଥିଲା । ହେଲେ ସାହାଲା ଫରେଷ୍ଟ ବିଟ୍ ଉର୍ବେଙ୍ଗି ଗାଁ ନିକଟରେ ଟ୍ରାକ୍ଟରଟି ହଠାତ୍ ଓଲଟି ପଡ଼ିଥିଲା।ସେହି ସମୟରେ ବନ କର୍ମଚାରୀଙ୍କୁ ଦେଖି କାଠ ମାଫିଆ ଓ ଟ୍ରାକ୍ଟର ଚାଳକ ଗାଡ଼ି ଛାଡ଼ି ଚମ୍ପଟ ମାରିଥିଲେ। ବନ କର୍ମଚାରୀମାନେ କାଠ ବୋଝେଇ ଟ୍ରାକ୍ଟରକୁ ଜବତ କରି ରେଞ୍ଜ୍ କାର୍ଯ୍ୟାଳୟକୁ ଆଣିଥିଲେ ।
ଏ ସଂକ୍ରାନ୍ତରେ ରେଞ୍ଜ୍ ଅଧିକାରୀ କୈଳାସ ଚନ୍ଦ୍ର ସାହୁ କହିଛନ୍ତି, ଏକ ଫୁଟ୍ ସାଇଜର ୪୦ରୁ ୫୦ ଶାଳ ଷ୍ଟମ୍ପ ସହିତ ଟ୍ରାକ୍ଟର ଜବତ କରାଯାଇଛି । ଘଟଣାସ୍ଥଳରେ ଟ୍ରାକ୍ଟରଟି ଓଲଟି ପଡ଼ିଥିଲା। ଟ୍ରାକ୍ଟର ଚାଳକ ଓ କାଠ ମାଫିଆ ଫେରାର ଅଛନ୍ତି । ଗାଡ଼ିର ତଥ୍ୟ ଜାଣିବା ପାଇଁ ମୋଟର ଯାନ ନିରୀକ୍ଷକଙ୍କୁ ଅବଗତ କରାଯିବ । ଏହି ଘଟଣାର ଅଧିକ ତଦନ୍ତ ଜାରି ରହିଛି ବୋଲି ରେଞ୍ଜ ଅଧିକାରୀ ସୂଚନା ଦେଇଛନ୍ତି ।
