ନୂଆଦିଲ୍ଲୀ: ଅପରେସନ ସିନ୍ଦୂରକୁ ରାଜନୀତିକରଣ କରୁଛି ବିଜେପି। ଆଜି ବିଜେପି ଉପରେ ଏଭଳି ଅଭିଯୋଗ ଆଣିଛନ୍ତି ମମତା ବାନାର୍ଜୀ। ସେ ଏହାକୁ ଭୁଲ ବୋଲି ମଧ୍ୟ କହିଛନ୍ତି। ରାଜନୈତିକ ଆକର୍ଷଣ ବୃଦ୍ଧି କରିବା ପାଇଁ ଅପରେସନ ସିନ୍ଦୂର ନାମ ରଖାଯାଇଛି। ସେ କହିଛନ୍ତି ଯେ ବିରୋଧୀ ଦଳ ଅପରେସନ ସିନ୍ଦୂରକୁ ନେଇ ମୋଦି ସରକାରଙ୍କୁ ସମର୍ଥନ କରିଛନ୍ତି। ବିଦେଶ ଯାଇଥିବା ବିରୋଧୀ ଦଳର ପ୍ରତିନିଧି ମାନେ ଏହାର ବହୁତ ପ୍ରଶଂସା କରିଛନ୍ତି । କିନ୍ତୁ ଏଠାରେ ବିଜେପି ଏହାର ରାଜନୈତିକ ଫାଇଦା ନେବାକୁ ଚେଷ୍ଟା କରୁଛି। ସେ ସ୍ପଷ୍ଟ ଭାବରେ କହିଛନ୍ତି ଯେ,ବେଙ୍ଗଲ କେବେ ବିଜେପି ପାଖକୁ ଯିବ ନାହିଁ। ନବାନ୍ନାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ମମତା ବାନାର୍ଜୀ ଆଜି ଏହା କହିଛନ୍ତି।
ମମତା ମୁର୍ଶିଦାବାଦ ଘଟଣା ପାଇଁ ଭାରତୀୟ ଜନତା ପାର୍ଟିକୁ ଦାୟୀ କରିଛନ୍ତି। ସେ କହିଛନ୍ତି ଯେ, ତାଙ୍କ ପାଖରେ ଏହାର ପ୍ରମାଣ ଅଛି ଏବଂ ଯଦି କାଗଜପତ୍ର ଆବଶ୍ୟକ ହୁଏ, ତେବେ ସେ ତାହା ଦେବେ। ସେହି ସମୟରେ, ସେ ଅଲିଦ୍ବାରପୁରରେ ପ୍ରଧାନମନ୍ତ୍ରୀ ମୋଦୀଙ୍କ ଦ୍ୱାରା ଆୟୋଜିତ ସାଧାରଣ ସଭାକୁ ମଧ୍ୟ ଟାର୍ଗେଟ କରି କହିଛନ୍ତି ଯେ, ଏହି କାର୍ଯ୍ୟକ୍ରମରେ ଆସାମ ଏବଂ କୁଚ୍ ବିହାରରୁ ଲୋକଙ୍କୁ ଅଣାଯାଇଥିଲା।
ମମତା ବାନାର୍ଜୀ ପ୍ରଧାନମନ୍ତ୍ରୀ ମୋଦୀଙ୍କୁ କଟାକ୍ଷ କରି କହିଛନ୍ତି ଯେ, ଗୋଟିଏ ସମୟରେ ତାଙ୍କୁ ଚା ବିକାଳୀ କୁହାଯାଉଥିଲା। ତା'ପରେ ତାଙ୍କୁ ଚୌକିଦାର କୁହାଯାଉଥିଲା। ଏବେ ସେମାନେ ସିନ୍ଦୂର ବିକ୍ରୟ କରିବା କଥା କହୁଛନ୍ତି। କେବଳ ବେଙ୍ଗଲରେ ନୁହେଁ, ସବୁଠି ସେମାନେ ସିନ୍ଦୂର ବିକ୍ରୟ କରୁଛନ୍ତି। ଏହା ହେବା ଉଚିତ୍ ନୁହେଁ।
ବିଜେପିକୁ ଟାର୍ଗେଟ କରି ମମତା କହିଛନ୍ତି ଯେ,ଯେଉଁ ଦଳର ନେତା ମାନେ ମହିଳାଙ୍କୁ ଅପମାନ କରନ୍ତି, ସେମାନଙ୍କୁ ପ୍ରଥମେ ଦଳରୁ ବହିଷ୍କାର କରିବାକୁ ପଡିଥାଏ,କିନ୍ତୁ ବିଜେପି ଶାସିତ ରାଜ୍ୟରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନାହିଁ।
