ଢେଙ୍କାନାଳ,୨୭/୦୫: ଢେଙ୍କାନାଳ ଜିଲ୍ଲା ୫୫ ନମ୍ବର ଜାତୀୟ ରାଜପଥର କଲେଜ ବାଇପାସ ରାସ୍ତା ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା। ବାଇକ୍କୁ ଧକ୍କା ଦେଲା ତେଲ ବୋଝେଇ ଟ୍ୟାଙ୍କର । ଫଳରେ ଘଟଣାସ୍ଥଳରେ ଜଣେ ମହିଳାଙ୍କର ମୃତ୍ୟୁ ହୋଇଥିବା ବେଳେ ମହିଳାଙ୍କ ସ୍ୱାମୀ ଓ ଶିଶୁପୁତ୍ର ଆହତ ହୋଇଛନ୍ତି । ଆହତଙ୍କୁ ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ସେପଟେ ଦୁର୍ଘଟଣାକୁ ନେଇ ଆନନ୍ଦ ନଗରଠାରେ ଜାତୀୟ ରାଜପଥକୁ ଅଞ୍ଚଳବାସୀ ଅବରୋଧ କରିଥିବା ଜଣାପଡ଼ିଛି ।
ସୂଚନା ଅନୁସାରେ, ପରଜଙ୍ଗ ଥାନା ବରିହାପୁର ଗାଁର ରଶ୍ମିରଞ୍ଜନ ଖୁଣ୍ଟିଆ, ପତ୍ନୀ ଲୁଚି ଖୁଣ୍ଟିଆ, ଦୁଇବର୍ଷର ଶିଶୁପୁତ୍ର ଏକ ବାଇକରେ କଟକ ଅଭିମୁଖେ ଯାଉଥିଲେ। ଢେଙ୍କାନାଳ କଲେଜ୍ ବାଇପାସ ରାସ୍ତାର ଆନନ୍ଦ ନଗର ବିଜୁ ଭବନ ସମ୍ମୁଖରେ ପଛପଟୁ ଦ୍ରୁତଗତିରେ ଆସୁଥିବା ଏକ ତେଲ ଟ୍ୟାଙ୍କର ଧକ୍କା ଦେଇଥିଲା । ବାଇକରୁ ତିନି ଜଣ ଛିଟିକି ପଡ଼ିଥିବାବେଳେ ଲୁଚିଙ୍କ ଉପରେ ଟ୍ୟାଙ୍କର ଚକା ଚଢ଼ି ଯାଇଥିଲା। ଘଟଣାସ୍ଥଳରେ ତାଙ୍କର ଶୋଚନୀୟ ମୃତ୍ୟୁ ଘଟିଥିଲା। ସେହିପରି ସ୍ୱାମୀ ରଶ୍ମିରଞ୍ଜନ ଓ ଶିଶୁପୁତ୍ର ସାମାନ୍ୟ ଆହତ ହୋଇଥିଲେ । ଅଞ୍ଚଳବାସୀଙ୍କ ସହଯୋଗରେ ସେମାନଙ୍କୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଏହାର ପ୍ରତିବାଦରେ ସ୍ଥାନୀୟ ଲୋକେ ବିଜୁ ଭବନ ସମ୍ମୁଖରେ ରାସ୍ତାରୋକ କରିଥିଲେ । ଫଳରେ ୫୫ ନମ୍ବର ଜାତୀୟ ରାଜପଥରେ ଯାନବାହନ ଚଳାଚଳରେ ବ୍ୟାଘାତ ସୃଷ୍ଟି ହୋଇଥିଲା। ପୁଲିସ ପହଞ୍ଚି ଲୋକଙ୍କୁ ବୁଝାସୁଝା କରିବା ସହିତ ତେଲ ଟ୍ୟାଙ୍କରକୁ ପୁଲିସ ଜବତ ରଖିଛି ।
