କୋକସରା,୨୬/୦୫: ଦିର୍ଘ ୧ ବର୍ଷ ପରେ ନିଜର ହଜିଥିବା ଭାଇକୁ ଫେରି ପାଇଛି ଭଉଣୀ ଓ ପରିବାର ଲୋକେ। ଗତ ୨୦୨୪ ଏପ୍ରିଲ ୨୮ ତାରିଖରୁ ଢେଙ୍କାନାଳ ଜିଲ୍ଲା ଫରଜଙ୍ଗ ବ୍ଲକ କନ୍ଦସିଆ ଗ୍ରାମର ସ୍ବର୍ଗତ ଲକ୍ଷ୍ମଣ ସାହୁଙ୍କ ମାନସିକ ବିକାର ଗ୍ରସ୍ତ ପୁଅ ମାତୃ ପ୍ରସାଦ ଘରୁ ବାହାରି ନିଖୋଜ ଥିଲେ। ଏନେଇ ପରିବାର ଲୋକେ ସ୍ଥାନୀୟ ପରଜଙ୍ଗ ଥାନାରେ ନିଖୋଜ ମାମଲା ମଧ୍ୟ ରୁଜୁ କରିଥିଲେ। ତେବେ ଦିର୍ଘ ମାସ ପରେ ମଧ୍ୟ ମାତୃ ପ୍ରସାଦର କୌଣସି ଖୋଜଖବର ମିଳିନଥିଲା।
ସୂଚନା ମୁତାବକ, ଗତ ୨ ଦିନ ତଳେ କୋକସରା ବ୍ଲକର ଜଣେ ଗଣମାଧ୍ୟମ ପ୍ରତିନିଧି ହିରଣ୍ୟ ବେହେରା ଖବର ସଂଗ୍ରହ ପାଇଁ ଯାଉଥିବା ସମୟରେ ଡ଼ହଗାଁ ପଞ୍ଚାୟତ ନୂଆଗୁଡା ରାସ୍ତା ରେ ଜଣେ ମାନସିକ ବିକାର ଥିବା ଯୁବକଙ୍କୁ ଦେଖି ତାଙ୍କୁ ପଚାରି ଭିଡିଓ ଉତ୍ତୋଳନ କରି ତାଙ୍କ ପରିଚୟ ସହ ସୋସିଆଲ ମିଡିଆ ଫେସବୁକରେ ପୋଷ୍ଟ କରିଥିଲେ। ତେବେ ସଂଯୋଗ ବଶତଃ ସୋସିଆଲ ମିଡିଆରୁ ଏହି ପୋଷ୍ଟ ଦେଖି ପରିବାର ଲୋକେ ଗଣମାଧ୍ୟମ ପ୍ରତିନିଧିଙ୍କୁ ଯୋଗାଯୋଗ କରିଥିଲେ।
ଏନେଇ ଗଣମାଧ୍ୟମ ପ୍ରତିନିଧି ଶ୍ରୀ ବେହେରା କୋକସରା ବ୍ଲକ ଉପାଧ୍ୟକ୍ଷ ରାଜୀବ ଅଗ୍ରୱାଲଙ୍କୁ ଯୁବକ ବିଷୟରେ କହିବା ପରେ ବ୍ଲକ ଉପାଧ୍ୟକ୍ଷ ଯୁବକଙ୍କୁ ତାଙ୍କ ଘରେ ରଖି ସେବା ଶୁଶ୍ରୁଷା କରି ବ୍ଲକ ପ୍ରଶାସନ ସହିତ ଯୁବକର ଚିକିତ୍ସା ଓ ଥଇଥାନ ବ୍ୟବସ୍ଥା ପାଇଁ ଯୋଗାଯୋଗ କରିଥିଲେ। ତେବେ ସୋସିଆଲ ମିଡିଆରେ ଖବର ଦେଖି ସୋମବାର ମାତୃ ପ୍ରସାଦଙ୍କ ପରିବାରରୁ ଭଉଣୀ ନିରୂପମା ସାହୁ, ସମ୍ପର୍କୀୟ ଭାଇ ଚିନ୍ମୟ ବିଶ୍ୱାଳ, ସୁଧୀର ବିଶ୍ୱାଳ, ଅବିନାଶ ସାହୁ ବ୍ଲକ ଉପାଧ୍ୟକ୍ଷ ରାଜୀବ ଅଗ୍ରୱାଲଙ୍କ ଲଡୁଗାଁ ସ୍ଥିତ ବାସଭବନରେ ପହଞ୍ଚିଥିଲେ। ବର୍ଷେ ପରେ ହଜିଥିବା ଭାଇକୁ ପାଇ ଭଉଣୀ କୋହରେ ଆତ୍ମହରା ହୋଇ ପଡିଥିବା ବେଳେ ଗଣମାଧ୍ୟମ ପ୍ରତିନିଧି ଓ ବ୍ଲକ ଉପାଧ୍ୟକ୍ଷଙ୍କୁ ଅନେକ କୃତଜ୍ଞତା ଜଣାଇଥିଲେ। ପରେ ବ୍ଲକ ଉପାଧ୍ୟକ୍ଷ, ଗଣମାଧ୍ୟମ ପ୍ରତିନିଧି ମାତୃ ପ୍ରସାଦକୁ ତାଙ୍କ ଭଉଣୀ ଓ ସମ୍ପର୍କୀୟଙ୍କୁ ହସ୍ତାନ୍ତର କରିଥିଲେ।
