ଛତ୍ରପୁର, ୧୨/୧୦ : ରାଜ୍ୟର ଅନ୍ୟତମ ପ୍ରମୁଖ ପର୍ଯ୍ୟଟନସ୍ଥଳ ଛତ୍ରପୁର ନିକଟ ତାମ୍ପରା ହ୍ରଦ ଏବେ ଶ୍ରୀହୀନ ଅବସ୍ଥାରେ ପହଞ୍ଚିଛି । ଗୋଟିଏ ପଟେ ତାମ୍ପରାରେ ବେଆଇନ ନିର୍ମିତ ଭିତ୍ତିଭୂମିକୁ ନେଇ ଗ୍ରୀନ୍ ଟ୍ରିବ୍ୟୁନାଲ୍ର ଝଟ୍କା, ଅନ୍ୟପଟେ ପରିଚାଳନାଗତ ବିଭ୍ରାଟରୁ ତାମ୍ପରା ତାର ଆକର୍ଷଣ ହରାଇଛି । ସୌନ୍ଦର୍ଯ୍ୟକରଣ ପାଇଁ କାଠରେ ସୁନ୍ଦର ଭାବେ ନିର୍ମିତ ହୋଇଥିବା ଭିତ୍ତିଭୂମି ଉଇ ଖାଇ ନଷ୍ଟ ହେବାକୁ ବସିଲାଣି । ଏହା କେତେବେଳେ ଯେ ଭୁଶୁଡି ପଡିବ ଓ ପର୍ଯ୍ୟଟକ ଆହତ ହେବେ ସେହି ଆଶଙ୍କା ଉପୁଜିଲାଣି । କାଟପଟ୍ଟା ପୋଲର ଅବସ୍ଥା ମଧ୍ୟ ଅନୁରୂପ । ସେହି ନିକଟରେ ଲାଗିଥିବା ଡେକୋରେଟିଭ୍ ଲାଇଟ୍ଗୁଡିକ ଭାଙ୍ଗି ମାଟିରେ ଗଡୁଛି । ଦିନ ଥିଲା ଦୈନିକ ୨ରୁ ୩ ହଜାର ପର୍ଯ୍ୟଟକ ତାମ୍ପରା ହ୍ରଦକୁ ବୁଲିବାକୁ ଆସୁଥିଲେ । ଏଠି ଜଳକ୍ରୀଡାର ମଜା ଉଠାଇବା ସହ ପାର୍କରେ ଚଲାବୁଲା କରି ସମୟ ଅତିବାହିତ କରୁଥିଲେ । ସପ୍ତାହାନ୍ତ ଛୁଟି ଶନିବାର, ରବିବାର ଏବଂ ବିଭିନ୍ନ ଛୁଟିଦିନରେ ଏହି ସଂଖ୍ୟା ୫ ହଜାର ପର୍ଯ୍ୟନ୍ତ ବୃଦ୍ଧି ପାଉଥିଲା ବୋଲି ଏଠାକାର ବ୍ୟବସାୟୀମାନେ ମତବ୍ୟକ୍ତ କରୁଛନ୍ତି । କିନ୍ତୁ ବର୍ତ୍ତମାନ ଏହି ସଂଖ୍ୟା ୨୦୦କୁ ଖସି ଆସିଛି । ଜଳସ୍ତର ହ୍ରାସ ସାଙ୍ଗକୁ ପରିଷ୍କାର ପରିଚ୍ଛନ୍ନତାର ଦୁରାବସ୍ଥା ଏକ ସମସ୍ୟା ପାଲଟିଛି ।
ଜାତୀୟ ରାଜପଥ ସହ ତାମ୍ପରାକୁ ସଂଯୋଗ କରୁଥିବା ଦୁଇଟି ରାସ୍ତାରେ ଷ୍ଟ୍ରିଟ୍ ଲାଇଟ୍ ଜଳୁନାହିଁ । ସୌନ୍ଦର୍ଯ୍ୟକରଣର ବିକଳ ଚିତ୍ର ଦେଖି ପର୍ଯ୍ୟଟକ ମୁହଁ ଫେରାଇ ନେଉଛନ୍ତି । ଏବେ ପର୍ଯ୍ୟଟନ ଋତୁ ଆରମ୍ଭ ହୋଇଯିବ । ହେଲେ ତାମ୍ପରା ହ୍ରଦର ସ୍ଥିତି ନସୁଧୁରିଲେ ବିଗତ ବର୍ଷରେ ଯେଭଳି ବହୁ ପର୍ଯ୍ୟଟକ ଆସୁଥିଲେ ଓ ଭଲ ବେପାର ହେଉଥିଲା ତାହା ସମ୍ଭବପର ହେବନି ବୋଲି ଆଶଙ୍କା କରାଯାଉଛି । ତାମ୍ପରା ପୋତି ହୋଇ ଆସୁଥିବାରୁ ବୋଟିଂ ବ୍ୟବସ୍ଥା ଅଚଳ ହୋଇ ପଡିଛି । ଏହାର ପରିଚାଳନା ଦାୟିତ୍ୱ ବିଡିଏ ନିକଟରେ ଥିଲା । କିନ୍ତୁ ଏହି ଦାୟିତ୍ୱରେ ସେମାନେ ନଥିବା ସୂଚନା ଦେଇଛନ୍ତି ବିଡିଏ ସଚିବ ରମେଶ ଚନ୍ଦ୍ର ହାଁସଦା । ଏହି ପ୍ରକଳ୍ପ ଦାୟିତ୍ୱରେ ଥିବା ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ମଧୁମିତାଙ୍କ ପ୍ରତିକ୍ରିୟା ଜାଣିବାକୁ ତାଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲେ ମଧ୍ୟ ସମ୍ଭବ ହୋଇପାରିନାହିଁ । ତେବେ ଜିଲ୍ଲାପାଳ ଦିବ୍ୟଜ୍ୟୋତି ପରିଡା କହିଛନ୍ତି ଯେ- ସେ ଏହି ବିଷୟରେ ଜାଣିଛନ୍ତି । ପ୍ରତିକାର ବ୍ୟବସ୍ଥା କରାଯାଇ ତାର ଆକର୍ଷଣ ଫେରାଇ ଆଣିବାକୁ ଚିନ୍ତା କରାଯାଉଥିବା ସେ ପ୍ରକାଶ କରିଛନ୍ତି ।
