ନୂଆଦିଲ୍ଲୀ: ଆଇପିଏଲ୍ ୨୦୨୫ ପୂର୍ବରୁ ବଦଳିଛି ଗୁଜରାଟ ଟାଇଟନ୍ସର ମାଲିକାନା । ଟରେଣ୍ଟ ଗ୍ରୁପ୍ ଫ୍ରାଞ୍ଚାଇଜ୍ର ବଡ଼ ଅଂଶଧନ ଅଧିଗ୍ରହଣ କରିଛି । ଟରେଣ୍ଟ ଗ୍ରୁପ୍ କ୍ରୀଡ଼ା କ୍ଷେତ୍ରରେ ପ୍ରବେଶ କରିଛି । ଟରେଣ୍ଟ ଗ୍ରୁପ୍ ଇଣ୍ଡିଆନ୍ ପ୍ରିମିୟର ଲିଗ୍ ଫ୍ରାଞ୍ଚାଇଜ୍ ଗୁଜରାଟ ଟାଇଟାନ୍ସର ୬୭ ପ୍ରତିଶତ ଅଂଶଧନ ଅଧିଗ୍ରହଣ କରିଥିବା ସ୍ପଷ୍ଟ କରିଛି । ଟରେଣ୍ଟ ଗ୍ରୁପ୍ ପକ୍ଷରୁ କୁହାଯାଇଛି, ‘ଏହାର ହୋଲ୍ଡିଂ କମ୍ପାନୀ ଟରେଣ୍ଟ ଇନ୍ଭେଷ୍ଟମେଣ୍ଟସ୍ ପ୍ରାଇଭେଟ୍ ଲିମିଟେଡ୍ (TIPL) ମାଧ୍ୟମରେ ଇଣ୍ଡିଆନ୍ ପ୍ରିମିୟର ଲିଗ୍ (IPL) ଫ୍ରାଞ୍ଚାଇଜ୍, ଗୁଜରାଟ ଟାଇଟାନ୍ସର ୬୭ ପ୍ରତିଶତ ଅଂଶଧନ ଅଧିଗ୍ରହଣ ଲାଗି ଚୁକ୍ତି କରିଛି ।'
ଏହି ଗ୍ରୁପ୍, ଇରେଲିଆ କମ୍ପାନୀ ପ୍ରାଇଭେଟ୍ ଲିମିଟେଡ୍ ଠାରୁ ଅଧିକ ଶେୟାର କ୍ରୟ କରୁଛି । ଏହି କାରବାର ପାରମ୍ପରିକ ସର୍ତ୍ତାବଳୀ ଏବଂ ଅନୁମୋଦନ ଉପରେ ନିର୍ଭର କରେ । ଏହି ଚୁକ୍ତି ଉପରେ ଟରେଣ୍ଟ ଗ୍ରୁପର ନିର୍ଦ୍ଦେଶକ ଜିନାଲ ମେହେଟା କହିଛନ୍ତି, 'ଭାରତରେ ଖେଳ ପ୍ରମୁଖତା ହାସଲ କରୁଥିବାରୁ, ଟରେଣ୍ଟ ଏହି ଦ୍ରୁତ ପ୍ରଗତିଶୀଳ କ୍ଷେତ୍ରରେ ଅନେକ ସମ୍ଭାବନା ଦେଖୁଛି । ଗୁଜରାଟ ଟାଇଟାନ୍ସରେ ଅଧିକାଂଶ ଅଂଶଧନ ଅଧିଗ୍ରହଣ ସହିତ, ଆମେ ଆମର ଅଭିଜ୍ଞତାକୁ ଉନ୍ନତ କରିବା ଏବଂ ଆଗାମୀ ବର୍ଷଗୁଡ଼ିକରେ ନୂତନ ପଥ ଖୋଲିବାର ସୁଯୋଗ ପାଇବା ପାଇଁ ଉତ୍ସାହିତ ଅଛୁ ।' ଅନ୍ୟପଟେ CVCର ପରିଚାଳନା ପାର୍ଟନର ସିଦ୍ଧାର୍ଥ ପଟେଲ କହିଛନ୍ତି, ଆମେ ଏକ ଦୃଢ଼ ଆରମ୍ଭ ସହିତ ଭାରତୀୟ କ୍ରିକେଟରେ ପ୍ରବେଶ କରିଥିଲୁ- ପ୍ରଥମ ସିଜିନରେ IPL ଟାଇଟଲ୍ ଜିତିଥିଲୁ ଏବଂ ଦ୍ୱିତୀୟରେ ରନର୍ସ-ଅପ୍ ଭାବରେ ଶେଷ ଯାତ୍ରା କରିଥିଲୁ ।
୨୦୨୨ ମସିହାରେ ଇଣ୍ଡିଆନ୍ ପ୍ରିମିୟର ଲିଗ୍ରେ ଲକ୍ଷ୍ନୌ ସୁପର ଜାଏଣ୍ଟସ୍ ଏବଂ ଗୁଜରାଟ ଟାଇଟାନ୍ସ ଏଣ୍ଟ୍ରି କରିଥିଲେ । ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱରେ ଟାଇଟାନ୍ସ ପ୍ରଥମ ଥର ପାଇଁ ଆଇପିଏଲ୍ ଟାଇଟଲ୍ ଜିତିଥିଲା । ୨୦୨୩ ମସିହାରେ ଚେନ୍ନାଇ ସୁପର କିଙ୍ଗସ୍ ଠାରୁ ପରାଜିତ ହୋଇ ରନର୍ସଅପ୍ ହୋଇଥିଲା । ୨୦୨୪ରେ ଅଷ୍ଟମ ସ୍ଥାନରେ ରହିଥିଲା ଟିମ୍ । ଗିଲ୍ ୨୦୨୫ ସଂସ୍କରଣ ପାଇଁ ମଧ୍ୟ ଦଳର ଅଧିନାୟକ ଅଛନ୍ତି ।
ଗୁଜରାଟ ଟାଇଟାନ୍ସ ଦଳ
ଶୁଭମନ ଗିଲ୍ (ଅଧିନାୟକ), ଜୋସ ବଟ୍ଲର୍ (ଓ୍ବିକେଟକିପର), ରାସିଦ ଖାନ, କାଗିସୋ ରାବାଡା, ଗ୍ଲେନ୍ ଫିଲିପ୍ସ, ସାଇ ସୁଦର୍ଶନ, ରାହୁଲ ତେୱତିଆ, ଶାହାରୁଖ ଖାନ, କରିମ ଜନତ, ଶେରଫେନ ରଦରଫୋର୍ଡ, ଜେରାଲ୍ଡ କୋଟିଜି, ମହମ୍ମଦ ସିରାଜ, ପ୍ରସିଦ୍ଧ କୃଷ୍ଣା, ନିଶାନ୍ତ ସିନ୍ଧୁ, ମହିପାଳ ଲୋମର, କୁମାର କୁଶାଗ୍ରା, ଅନୁଜ ରାୱତ (ଓ୍ବିକେଟକିପର), ମାନବ ସୂତାର, ୱାଶିଂଟନ୍ ସୁନ୍ଦର, ଅର୍ଶଦ ଖାନ, ଗୁରୁନୁର ବାର, ଆର. ସାଇ କିଶୋର, ଇଶାନ୍ତ ଶର୍ମା, ଜୟନ୍ତ ଯାଦବ, କୁଲୱନ୍ତ ଖେଜ୍ରୋଲିଆ ।
