ନୂଆଦିଲ୍ଲୀ,୩୦/୦୧: ଆଜିଠୁ ରଣଜୀ ଟ୍ରଫିର ଅନ୍ତିମ ରାଉଣ୍ଡ ଲିଗ୍ ମୁକାବିଲା । ଭାରତୀୟ ଦଳର ଷ୍ଟାର୍ ବ୍ୟାଟର ବିରାଟ କୋହଲିଙ୍କ ସମେତ କେଏଲ ରାହୁଲ, କୁଲଦୀପ ଯାଦବ ଓ ରିୟାନ ପରାଗ ଏହି ରାଉଣ୍ଡ ମ୍ୟାଚ୍ ଜରିଆରେ ଗ୍ରାଉଣ୍ଡକୁ ଓହ୍ଲାଇବେ । ୪ଜଣ ଯାକ ଖେଳାଳି ନିଜ ନିଜ ରାଜ୍ୟ ଦଳ ସହ ଯୋଗ ଦେଇ ଅଭ୍ୟାସ ଜାରି ରଖିଛନ୍ତି ।
ଦିଲ୍ଲୀ ଅନ୍ତିମ ଲିଗ୍ ମ୍ୟାଚ୍ରେ ରେଳବାଇକୁ ଭେଟିବ । ୩୦ ତାରିଖରୁ ଏହି ମ୍ୟାଚ୍ ଆରମ୍ଭ ହେବ । ୨୦୧୨ ପରେ କୋହଲି ପ୍ରଥମ କରି ରଣଜୀ ଟ୍ରଫି ଖେଳିବାକୁ ଯାଉଛନ୍ତି । ଗତ ଦୁଇ ଦିନ ଧରି କୋହଲି ଦିଲ୍ଲୀ ଦଳ ସହ ଅଭ୍ୟାସ ଜାରି ରଖିଛନ୍ତି । କୋହଲି ଖେଳୁଥିବାରୁ ଏହି ମ୍ୟାଚ ଦେଖିବା ପାଇଁ ପ୍ରବଳ ଗହଳି ଲାଗି ରହିବ । ଡିଡିସିଏ ଦର୍ଶକଙ୍କ ପାଇଁ ମାଗଣାରେ ମ୍ୟାଚ୍ ଦେଖିବାର ସୁବିଧା କରିଛି । ମାତ୍ର ଷ୍ଟାଡ଼ିୟମ୍ରେ ପ୍ରବେଶ କରିବା ପାଇଁ ଆଧାର କାର୍ଡ ସାଙ୍ଗରେ ଆଣିବାକୁ ଦର୍ଶକଙ୍କୁ ଅନୁରୋଧ କରାଯାଇଛି ।
କୁଲଦୀପ ହାର୍ନିଆ ଅସ୍ତ୍ରୋପଚାର ପରଠୁ କୌଣସି ପ୍ରତିଦ୍ୱନ୍ଦ୍ୱିତାମୂଳକ ମ୍ୟାଚ୍ ଖେଳି ନାହାନ୍ତି । ମାତ୍ର ତାଙ୍କ ଇଂଲଣ୍ଡ ବିପକ୍ଷ ଆଗାମୀ ଦିନିକିଆ ସିରିଜ ଓ ଚାମ୍ପିଅନ୍ସ ଟ୍ରଫି ଦଳରେ ସ୍ଥାନ ମିଳିଛି । ଅନ୍ତର୍ଜାତୀୟ କ୍ରିକେଟ୍କୁ ଓହ୍ଲାଇବା ପୂର୍ବରୁ ସେ ରଣଜୀ ଟ୍ରଫି ଖେଳି ମନୋବଳ ଦୃଢ କରିବାକୁ ଲକ୍ଷ୍ୟ ରଖିଛନ୍ତି । ସେ ଉତ୍ତର ପ୍ରଦେଶ ପକ୍ଷରୁ ମଧ୍ୟ ପ୍ରଦେଶ ବିପକ୍ଷରେ ଏହି ମ୍ୟାଚ ଖେଳିବେ । ହୋଲକର ଷ୍ଟାଡ଼ିୟମ୍ରେ ଏହି ମ୍ୟାଚ୍ ଖେଳାଯିବ । ଉଭୟ ଉତ୍ତର ପ୍ରଦେଶ ଓ ମଧ୍ୟ ପ୍ରଦେଶ ନକ୍ ଆଉଟ୍ ଦୌଡ଼ରୁ ବାଦ ପଡ଼ିଛନ୍ତି ।
କର୍ଣ୍ଣାଟକ ଅନ୍ତିମ ଲିଗ୍ ମ୍ୟାଚ୍ରେ ହରିଆନାକୁ ଭେଟିବ । ଏହି ମ୍ୟାଚ୍ରୁ ୧ ପଏଣ୍ଟ ହାସଲ କଲେ ମଧ୍ୟ ହରିଆନା ନକ୍ ଆଉଟ୍ରେ ପ୍ରବେଶ କରିବ । ମାତ୍ର କର୍ଣ୍ଣାଟକ ପାଇଁ ବୋନସ ପଏଣ୍ଟ ବିଜୟ ଆବଶ୍ୟକ । ନଚେତ ବିହାରକୁ ହରାଇ କେରଳ ଦ୍ୱିତୀୟ ଦଳ ଭାବେ ନକ୍ ଆଉଟ୍କୁ ଉନ୍ନୀତ ହେବ । ଆଜି ରାହୁଲ ଗ୍ରାଉଣ୍ଡକୁ ଓହ୍ଲାଇବେ।
