ନୂଆଦିଲ୍ଲୀ, ୩୦/୧ : ଭାରତର ଷ୍ଟାର ବ୍ୟାଟର ବିରାଟ କୋହଲୀ ରଣଜୀ ମ୍ୟାଚ୍ ଖେଳୁଥିବା ନଜର ଆସିଲେ । ରଣଜୀ ଟ୍ରଫି ୨୦୨୪-୨୫ରେ ଦିଲ୍ଲୀ ଲାଗି ଖେଳୁଥିବା ନଜର ଆସୁଛନ୍ତି । ଦିଲ୍ଲୀ ଟିମ୍ ଟୁର୍ଣ୍ଣାମେଣ୍ଟର ଗ୍ରୁପ ଚରଣର ଶେଷ ମ୍ୟାଚ୍ ରେଲଓ୍ବେ ବିପକ୍ଷରେ ଅରୁଣ ଜେଟଲୀ ଷ୍ଟାଡିୟମରେ ଖେଳୁଛି । ଏହି ମ୍ୟାଚ୍ ମାଧ୍ୟମରେ ବିରାଟ କୋହଲୀ ୧୨ବର୍ଷରୁ ଅଧିକ ସମୟ ପରେ ରଣଜୀ ଟ୍ରଫିକୁ ଫେରିଛନ୍ତି । ମ୍ୟାଚରେ ଆୟୁଷ ବଡୋନୀ ଦିଲ୍ଲୀର ଅଧିନାୟକତ୍ବ କରୁଛନ୍ତି।
ଏହି ମ୍ୟାଚରେ ଦିଲ୍ଲୀ ଟସ୍ ଜିତି ବୋଲିଂ କରିବାର ନିଷ୍ପତ୍ତି ନେଇଥିଲା । ଯାହାପରେ କୋହଲୀଙ୍କୁ ଫିଲ୍ଡିଂ ଲାଗି ମୈଦାନରେ ଦେଖି ସେଠାରେ ଉପସ୍ଥିତ ଥିବା ଫ୍ୟାନ୍ସ ତାଙ୍କୁ ବୋଲିଂ କରାଇବାକୁ ଡିମାଣ୍ଡ କରିବା ଆରମ୍ଭ କରିଦେଇଥିଲେ । ଫ୍ୟାନ୍ସ ‘କୋହଲୀଙ୍କୁ ବୋଲିଂ ଦିଅ’ ନାରାବାଜି ଲଗାଇବା ଆରମ୍ଭ କରିଦେଇଥିଲେ । ଯାହାର ଭିଡ଼ିଓ ଏବେ ସୋସିଆଲ ମିଡ଼ିଆରେ ଖୁବ୍ ଭାଇରାଲ ହେବାରେ ଲାଗିଛି ।
ପ୍ରକାଶ ଯେ, ମ୍ୟାଚର ପ୍ରଥମ ଦିନରେ ଏବେ ପର୍ଯ୍ୟନ୍ତ ପ୍ରାୟ ଦିଲ୍ଲୀ ଲାଗି ପ୍ରାୟ ୬ଜଣ ବୋଲର ବୋଲିଂ କରିସାରିଛନ୍ତି । ଯେଉଁଥିରେ ଅଧିନାୟକ ଆୟୁଷ ବଡୋନୀ ବି ସାମିଲ ଅଛନ୍ତି । ଏବେ ଦେଖିବାକୁ ବାକି ରହିଲା କି ଫ୍ୟାନ୍ସଙ୍କ ଦାବି ପରେ ବିରାଟ କୋହଲୀ ବୋଲିଂ ଲାଗି ମୈଦାନରେ ଆସୁଛନ୍ତି କି ନାହିଁ।
ପ୍ରକାଶ ଯେ, ବିରାଟ କୋହଲୀ ଏହା ପୂର୍ବରୁ ରଣଜୀ ଟ୍ରଫିର ଶେଷ ମ୍ୟାଚ୍ ୨୦୧୨ ନଭେମ୍ବରରେ ଖେଳିଥିଲେ। ଏବେ କୋହଲୀ ୧୨ବର୍ଷରୁ ଅଧିକ ସମୟ ପରେ ରଣଜୀ ଟ୍ରଫିର ମ୍ୟାଚ୍ ଖେଳୁଛନ୍ତି ।
