ଭବାନୀପାଟଣା,୧୩/୦୯: ପଶ୍ଚିମ ଓଡ଼ିଶାର  ମହାନ ଗଣ ପର୍ବ ନୂଆଁଖାଇ । କଳାହାଣ୍ଡି ଜିଲ୍ଲାରେ  ୩ଟି ପର୍ଯ୍ୟାୟରେ ନୂଆଁଖାଇ ପାଳନ ହୋଇଆସୁଛି । ଭାଦ୍ରବ ପଞ୍ଚମୀ ତିଥିରେ ଜିଲ୍ଲାର କେତେକ ଅଞ୍ଚଳରେ  ନୂଆଁଖାଇ ସରିଛନ୍ତି । ହେଲେ ଭାଦ୍ରବ ଦଶମୀ ତିଥିରେ  ଶୁକ୍ରବାର ଦ୍ୱିତୀୟ ପର୍ଯ୍ୟାୟରେ କଳାହାଣ୍ଡି ଗଡ଼ଜାତ  ଅଞ୍ଚଳ ଗୁଡ଼ିକରେ ନୂଆଁଖାଇ ପାଳନ କରାଯିବ ।  

କଳାହାଣ୍ଡିର ଇଷ୍ଟଦେବୀ ମା’ ମାଣିକେଶ୍ୱରୀଙ୍କଠାରେ ପରମ୍ପରା ଅନୁଯାୟୀ ପ୍ରତି ବର୍ଷ ଭାଦ୍ରବ ଶୁକ୍ଲପକ୍ଷ ଦଶମୀ  ତିଥି ସକାଳ ୮ଟା ୨୦ ମିନିଟ୍‌ ଗତେ ୯ଟା ୪୦ ମିନିଟ  ମଧ୍ୟେ ନବାନ୍ନ ଲାଗି ହେବ । ସେହିପରି ପୂର୍ବାହ୍ନ ୧୦ଟାରୁ  ଅପରାହ୍ନ ୧୨ଟା ୪୦ମିନିଟ୍‌ ମଧ୍ୟେ ସର୍ବସାଧାରଣ  ନୂଆଁ ଖାଇବା ପାଇଁ ଲଗ୍ନ ଧାର୍ଯ୍ୟ ହୋଇଛି । ଏହି ଲଗ୍ନ  ଅନୁସାରେ କଳାହାଣ୍ଡି ଜିଲ୍ଲା ଭବାନୀପାଟଣା ସମେତ  ଗଡ଼ଜାତର ପୁରାତନ ଜମିଦାରୀ ଅଞ୍ଚଳ ମହୁଲ ପାଟଣା,  କର୍ଲାପାଟ, ଥୁଆମୂଳ ରାମପୁର, ଲାଞ୍ଜିଗଡ଼, ଜୟପାଟଣା  ଓ ମ.ରାମପୁର ଅଞ୍ଚଳର ଜନସାଧାରଣ ନୂଆଁଖାଇ ପାଳନ  କରିବେ । 

କଳାହାଣ୍ଡିରେ ଭାଦ୍ରବ ଶୁକ୍ଲ ପ୍ରତିପଦାଠାରୁ  କାର୍ତ୍ତିକ ମାସର ଗିରିଗୋବର୍ଦ୍ଧନ ପୂଜା ପର୍ଯ୍ୟନ୍ତ ବିଭିନ୍ନ  ପର୍ଯ୍ୟାୟରେ ନୂଆଁଖାଇ ପାଳିତ ହେବାର ପରମ୍ପରା ଚାଲି  ଆସିଛି । ଜୁନାଗଡ଼ ଅଞ୍ଚଳରେ ଜୁନାଗଡ଼ର ଦଧିବାମନ  ପୀଠରେ ଏବଂ ଲଙ୍କେଶ୍ୱରୀ ପୀଠରେ ଭାଦ୍ରବ ଶୁକ୍ଲ ପଞ୍ଚମୀ  ତିଥିରେ ନୂଆ ଅନ୍ନ ଭୋଗ ଲାଗି ହୋଇଥିଲା । ପରେ  ସାର୍ବଜନୀନ ନୂଆଁଖାଇ ପାଳନ କରାଯାଇଥିଲା । 

ସେହିପରି  ପ୍ରତି ଗାଁଗଣ୍ଡାରେ ଥିବା ଦେବାଦେବୀ ପୀଠରେ ପୂର୍ବ ଦିନ  ନୂଆ ଅନ୍ନ ଭୋଗ ଲାଗି ହେବା ପରେ ଗ୍ରାମବାସୀ ନୂଆଁଖାଇ  ପାଳନ କରିଥିଲେ । ପୂର୍ବପରମ୍ପରା ଅନୁଯାୟୀ ପ୍ରତିବର୍ଷ  ଭାଦ୍ରବ ଶୁକ୍ଲପକ୍ଷ ଦଶମୀ ତିଥିରେ ମା’ମାଣିକେଶ୍ୱରୀଙ୍କୁ  ନବାନ୍ନ ଲାଗିହୁଏ ଓ ଗଡ଼ଜାତବାସୀ ନୂଆଁଖାଇ ପାଳନ  କରନ୍ତି। ଏଥିସହ କଳାହାଣ୍ଡିର ମହାରାଜା, ଜମିଦାର  ଏବଂ ସେମାନଙ୍କ ସହ ଜଡ଼ିତ ପରିବାରମାନେ ଦଶହରା  ବିଜୟା ଦଶମୀ ତିଥିରେ ନୂଆଁଖାଇ ପାଳନ କରିଥାନ୍ତି ।