କଟକ,୦୯/୦୨: ଇଣ୍ଡିଆ-ଇଂଲଣ୍ଡ ଦ୍ୱିତୀୟ ଦିନିକିଆ । ପ୍ରସ୍ତୁତ ବାରବାଟୀ, ପ୍ରସ୍ତୁତ ଉଭୟ ଟିମ୍ । ସୁପର ସନଡେ’ରେ ହେବ ସୁପର ଫାଇଟ୍। ରବିବାର ଦିନ ଗୋଟାଏରୁ କମ୍ପିବ କଟକ । ଆଜି ବାରବାଟୀ ଷ୍ଟାଡିୟମ୍ କ୍ରିକେଟ୍ ମ୍ୟାଚ୍ ଦେଖିବେ ଯିବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଏଥିପାଇଁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରଯାଇଛି।
ସୂଚନା ମୁତାବକ, ରବିବାର ମୁଖ୍ୟମନ୍ତ୍ରୀ ହେଲିକପ୍ଟର ଯୋଗେ କଟକ ଆସିବେ । ଏଥିଲାଗି ବାଲିଯାତ୍ରା ତଳ ପଡ଼ିଆରେ ଏକ ହେଲିପ୍ୟାଡ୍ ନିର୍ମାଣ କରାଯାଇଛି । ଦିନ ୧୨ଟା ୩୦ ମିନିଟ୍ ସମୟରେ ସେ ହେଲିପ୍ୟାଡ୍ରେ ଅବତରଣ କରିବେ ବୋଲି କଟକ କମିସନରେଟ୍ ପୁଲିସ୍ ପକ୍ଷରୁ ସୂଚନା ଦିଆଯାଇଛି । ଏଠାରୁ ତାଙ୍କୁ କାରକେଡ୍ରେ କଡ଼ା ସୁରକ୍ଷା ବଳୟରେ ଷ୍ଟାଡିୟମ୍କୁ ନିଆଯିବ । ଏଥିଲାଗି ପୁଲିସ୍ ପକ୍ଷରୁ ବାଲିଯାତ୍ରା ତଳ ପଡ଼ିଆରେ ପୃଥକ ସୁରକ୍ଷା ବନ୍ଦୋବସ୍ତ କରାଯାଇଛି । ମୁଖ୍ୟମନ୍ତ୍ରୀ ଖେଳ ଆରମ୍ଭରୁ ଶେଷ ହେବା ପର୍ଯ୍ୟନ୍ତ ମ୍ୟାଚ୍ ଦେଖିବେ ବୋଲି ପୁଲିସ୍ ସୂତ୍ରରୁ ସୂଚନା ମିଳିଛି ।
ଅନ୍ୟପକ୍ଷରେ ମ୍ୟାଚ୍ ଦେଖିବାକୁ ରାଜ୍ୟ କ୍ୟାବିନେଟ୍ର ପ୍ରାୟ ଅଧିକାଂଶ ମନ୍ତ୍ରୀ, ବିଧାୟକ, ସାଂସଦଙ୍କଠାରୁ ଆରମ୍ଭ କରି ବହୁ ଭିଭିଆଇପି ଆସୁଥିବାରୁ କଟକ-ଭୁବନେଶ୍ୱର ଏନ୍ଏଚ୍ ସମେତ ବାରଙ୍ଗ- ତ୍ରିଶୁଳିଆ ରାସ୍ତା, ମହାନଦୀ ରିଂ ବନ୍ଧ ଓ କାଠଯୋଡ଼ି ରିଂ ବନ୍ଧ ରାସ୍ତାରେ ଟ୍ରାଫିକ୍ ନିୟନ୍ତ୍ରଣ ଲାଗି ଫୋର୍ସ ସଂଖ୍ୟା ବଢ଼ାଇ ଦିଆଯାଇଛି । ସେହିପରି ହାଓଡା ମୋଟର ଛକ, କ୍ୟାଣ୍ଟନମେଣ୍ଟ ରୋଡ଼, ବକ୍ସିବଜାର ରାସ୍ତା, ବିଜୁ ପଟ୍ଟନାୟକ ଛକ ରାସ୍ତା ଆଦି ଷ୍ଟାଡିୟମ୍ ଆଖପାଖରେ ଭିଡ଼ ଅସମ୍ଭାଳ ହେବାର ଆଶଙ୍କା ରହିଛି । ତେଣୁ ଉକ୍ତ ଅଞ୍ଚଳରେ କିପରି ଗହଳି ନିୟନ୍ତ୍ରଣ କରାଯାଇପାରିବ ତାହା ଏବେ ପୁଲିସ୍ ପାଇଁ ଚିନ୍ତା ବଢ଼ିଛି । କାରଣ ଶନିବାର ନେଟସ୍ ସମୟରେ ଭାରତୀୟ କ୍ରିକେଟ୍ ତାରକାଙ୍କୁ ଦେଖିବାକୁ ଷ୍ଟାଡିୟମ୍ ଭିତରେ ଏବଂ ବାହାରେ ଯେପରି ଟ୍ରାଫିକ୍ ସ୍ଥିତି ବିପର୍ଯ୍ୟସ୍ତ ହୋଇପଡ଼ିଲା ତାହାକୁ ନିୟନ୍ତ୍ରଣକୁ ଆଣିବାକୁ ଯାଇ ପୁଲିସ୍ ଅଧିକାରୀମାନେ ନାକେଦମ୍ ହୋଇପଡ଼ିଥିଲେ । ତେଣୁ ଶନିବାର ଏହି ସମସ୍ୟା ଯେପରି ରବିବାର ପୁନରାବୃତ୍ତି ନହୁଏ ସେଥିଲାଗି କମିସନରେଟ୍ ଅଧିକାରୀମାନେ ଗୁରୁତ୍ୱ ଦେଇଛନ୍ତି ।
ବାରବାଟୀ ଲଢ଼େଇ: ସୁପର ସନ୍ଡେ'ରେ ଭାରତ-ଇଂଲଣ୍ଡ ଦ୍ୱିତୀୟ ଦିନିକିଆ, ଟିମ୍କୁ ଫେରିବେ କୋହଲି, ରିଷଭ
