ଚେନ୍ନାଇ,୧୯/୦୯: ୬ ମାସର ବ୍ୟବଧାନ ପରେ ଟିମ୍ ଇଣ୍ଡିଆ ରେଡ୍ ବଲ୍ କ୍ରିକେଟ୍କୁ ପ୍ରତ୍ୟାବର୍ତ୍ତନ କରିବାକୁ ଯାଉଛି । ଘରୋଇ ମଇଦାନ ଓ ସମ୍ମୁଖରେ ବାଂଲାଦେଶ ଦଳ । ପାକିସ୍ତାନ ଦଳକୁ ସେମାନଙ୍କ ଘରୋଇ ଗ୍ରାଉଣ୍ଡ୍ରେ(୨-୦) ମୂଳପୋଛ କରି ବାଂଲାଦେଶ ଆଉ ଏକ ସିରିଜ ବିଜୟ ଲକ୍ଷ୍ୟରେ ଭାରତ ଗସ୍ତରେ ଆସିଛି ।
ଗୁରୁବାରଠୁ ଭାରତ-ବାଂଲାଦେଶ ଦୁଇ ଟିକିଆ ଟେଷ୍ଟ ସିରିଜ୍ । ଚେନ୍ନାଇର ଚେପକ୍ ଗ୍ରାଉଣ୍ଡରେ ଖେଳାଯିବ ସିରିଜ୍ର ପ୍ରଥମ ମ୍ୟାଚ୍ । ସକାଳ ୯ ଟା ୩୦ ମିନିଟ୍ରେ ଖେଳାଯିବ ଏହି ମ୍ୟାଚ୍ । ଉଭୟ ଟିମ୍ ସିରିଜ୍ ପ୍ରଥମ ମ୍ୟାଚ୍ ଜିତିବାକୁ ଜୋରଦାର ଅଭ୍ୟାସ ଜାରି ରଖିଛନ୍ତି ।
ଗୁରୁବାରଠୁ ଚେନ୍ନାଇରେ ଆରମ୍ଭ ହେଉଥିବା ପ୍ରଥମ ଟେଷ୍ଟ ଜରିଆରେ ପାକ୍ ଗସ୍ତର ସଫଳତାକୁ ଦୋହରାଇବାକୁ ବାଂଲାଦେଶ ଯୋଜନା କରିଛି । ଇଂଲଣ୍ଡ ବିପକ୍ଷରେ ୪-୧ରେ ଟେଷ୍ଟ ସିରିଜ ଜିତିବା ପରଠୁ ଭାରତୀୟ ଦଳ ଟେଷ୍ଟ କ୍ରିକେଟ୍ ଖେଳି ନଥିଲା । ମାର୍ଚ୍ଚରୁ (ଆଇପିଏଲ୍ ଜରିଆରେ) ଭାରତୀୟ ଦଳ ଟି-ଟ୍ୱେଣ୍ଟି ବିଶ୍ୱକପ୍ ପାଇଁ ପ୍ରସ୍ତୁତି ଆରମ୍ଭ କରିଥିଲା । ୧୩ବର୍ଷର ଅପେକ୍ଷାରେ ପୂର୍ଣ୍ଣଚ୍ଛେଦ ପଡ଼ିଛି ଓ ଭାରତ ବିଶ୍ୱକପ୍ ଟ୍ରଫି ହାସଲ କରିଛି । ବେଶ୍ କିଛି ଦିନର ବିଶ୍ରାମ ପରେ ଏକ ଗୁରୁତ୍ୱପୂର୍ଣ୍ଣ ଟେଷ୍ଟ ସିଜନ ପାଇଁ ଦଳ ପ୍ରସ୍ତୁତ ହେଉଛି ।
ବାଂଲାଦେଶ ପ୍ରଥମ ପ୍ରତିଦ୍ୱନ୍ଦ୍ୱୀ ରୂପେ ଉଭା ହୋଇଛି । ଏହାପରେ ନ୍ୟୁଜିଲାଣ୍ଡ ଓ ଅଷ୍ଟ୍ରେଲିଆ ବିପକ୍ଷରେ ଦଳ ଟେଷ୍ଟ ସିରିଜ ଖେଳିବାର କାର୍ଯ୍ୟକ୍ରମ ରହିଛି। ତେଣୁ ବିଜୟ ସହ ସିଜନ ଆରମ୍ଭ କରିବାକୁ ଭାରତ ଲକ୍ଷ୍ୟ ରଖିଛି । ଘରୋଇ ଗ୍ରାଉଣ୍ଡ୍ରେ କ୍ରମାନ୍ୱୟରେ ୧୭ଟି ଟେଷ୍ଟ ସିରିଜ ଜିତି ସାରିଥିବା ଭାରତ ଆଧିପତ୍ୟ ଜାରି ରଖିବା ଏକ ପ୍ରକାର ନିଶ୍ଚିତ ରହିଥିଲେ ହେଁ ବାଂଲାଦେଶ ଏଥର କଡ଼ା ଟକ୍କର ଦେବାକୁ ଅପେକ୍ଷା କରିଛି।
୩ ସ୍ପିନର ନେଇ ଖେଳିବ ବାଂଲାଦେଶ: ପାକିସ୍ତାନ ବିପକ୍ଷ ଟେଷ୍ଟ ସିରିଜ ବିଜୟୀ ଦଳ ନେଇ ବାଂଲାଦେଶ ଭାରତ ଆସିଛି । ତେଣୁ ବିଜୟୀ ଏକାଦଶରେ ବାଂଲାଦେଶ ପରିବର୍ତ୍ତନ କରିବା ସମ୍ଭାବନା ନାହିଁ । ମଧ୍ୟକ୍ରମ ବ୍ୟାଟିଂ ଓ ସ୍ପିନ ବୋଲିଂ ବାଂଲାଦେଶ ଦଳର ମୁଖ୍ୟ ଅସ୍ତ୍ର । ଚିପକ ପିଚ୍ ମଧ୍ୟ ସ୍ପିନରଙ୍କ ପାଇଁ ସ୍ୱର୍ଗ । ତେଣୁ ସାକିବ ଅଲ୍ ହାସନ ଓ ମେହଦି ହାସାନ ମିରାଜଙ୍କ ସମେତ ତୃତୀୟ ସ୍ପିନର ଭାବେ ତାଇଜୁଲ ଇସଲାମ ଏକାଦଶରେ ସ୍ଥାନ ପାଇବା ଆଶା କରାଯାଉଛି । ଏହା ସମ୍ଭବ ହେଲେ ପେସ୍ ବିଭାଗର ୨ଟି ସ୍ଥାନ ପାଇଁ ଟସ୍କିନ ଅହମ୍ମଦ, ହାସାନ ମାହମୁଦ ଓ ନାହିଦ ରାଣାଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେବ ।
ପାକିସ୍ତାନରେ ମୁସଫିକର ରହିମ ମ୍ୟାଚ ବିଜୟୀ ଇନିଂସ ଖେଳିଥିଲେ । ଭାରତରେ ତାଙ୍କ ପ୍ରଦର୍ଶନ ସର୍ବଦା ଉନ୍ନତ ରହିଛି । ସାକିବଙ୍କ ବଳି ଦକ୍ଷ ଓ ଅଭିଜ୍ଞ ଅଲ୍ରାଉଣ୍ଡର ମଧ୍ୟ ଦଳରେ ରହିଛନ୍ତି । ମାତ୍ର ବାଂଲାଦେଶ ଯୁବ ଅଲରାଉଣ୍ଡର ମିରାଜଙ୍କ ଉପରେ ନିର୍ଭରଶୀଳ ରହିବ । ସେ ଚଳିତ ବର୍ଷ ୩୮୦ ରନ୍ ସଂଗ୍ରହ କରିବା ସହ ୨୩ଟି ୱିକେଟ୍ ନେଇ ସାରିଛନ୍ତି ।
ପନ୍ତ ପାୱାରକୁ ଅପେକ୍ଷା: ଟେଷ୍ଟ କ୍ରିକେଟ୍ରେ ଅବିଶ୍ୱସନୀୟ ସଫଳତା ଅର୍ଜନ କରିଥିବା ରିଷଭ ପନ୍ତ ଆସନ୍ତା କାଲି ଗ୍ରାଉଣ୍ଡ୍କୁ ଓହ୍ଲାଇବା ସମ୍ଭାବନା ରହିଛି । ଦୀର୍ଘ ୬୨୯ଦିନ ପରେ ପନ୍ତ ଟେଷ୍ଟ କ୍ରିକେଟ୍ ଖେଳିବାକୁ ଯାଉଛନ୍ତି । ପୂର୍ବରୁ ଅନେକ ଟେଷ୍ଟ ଜିତାଇ ସାରିଥିବା ପନ୍ତଙ୍କ ବ୍ୟାଟ୍ରୁ ବିସ୍ଫୋରକ ଇନିଂସ ଦେଖିବାକୁ ଦର୍ଶକ ଆଶା ବାନ୍ଧିଛନ୍ତି । ଭାରତରେ ପନ୍ତ ଖେଳିଥିବା ଟେଷ୍ଟ ମ୍ୟାଚ୍ରେ ସ୍ପିନରଙ୍କୁ ନିର୍ମମ ପ୍ରହାର କରିଛନ୍ତି । ସେ ସ୍ପିନରଙ୍କ ବିପକ୍ଷରେ ୭୭.୧୬ ହାର ଓ ୧୦୦.୮୭ ଷ୍ଟ୍ରାଇକ୍ ରେଟ୍ରେ ରନ୍ ସଂଗ୍ରହ କରିଛନ୍ତି ।
ଆତଙ୍କ ଖେଳାଇବେ ଜୈସ୍ୱାଲ୍, ବୁମରା: ଭାରତୀୟ ଦଳରେ ତାରକା ଖେଳାଳିଙ୍କ ଅଭାବ ନାହିଁ । କ୍ରିକେଟ୍ ପ୍ରେମୀ ହୁଏତ ବିରାଟ କୋହଲି, ଶୁଭମନ ଗିଲ୍ କିମ୍ବା ରୋହିତ ଶର୍ମାଙ୍କ ବ୍ୟାଟିଂକୁ ଅପେକ୍ଷା କରିଥାଇପାରନ୍ତି । ମାତ୍ର କ୍ରିକେଟ୍ ସମୀକ୍ଷକଙ୍କ ଠାରୁ ଆରମ୍ଭ କରି ଭାଷ୍ୟକାରଙ୍କ ନଜର ଯଶସ୍ୱୀ ଜୈସ୍ୱାଲ ଓ ଯଶପ୍ରୀତ ବୁମରାଙ୍କ ଉପରେ ରହିବ । ୨୦୨୩/୨୫ ଟେଷ୍ଟ ଚାମ୍ପିଅନ୍ସିପ୍ ସଂସ୍କରଣର ସର୍ବାଧିକ ରନ୍ ତାଲିକାରେ ଜୈସ୍ୱାଲ ଦ୍ୱିତୀୟ ସ୍ଥାନରେ ରହିଛନ୍ତି । ସେ ଇତି ମଧ୍ୟରେ ୯ଟି ଟେଷ୍ଟ ଖେଳି ୬୮.୫୩ ହାରରେ ମୋଟ୍ ୧୦୨୮ ରନ୍ ସଂଗ୍ରହ କରିଛନ୍ତି । କେବଳ ଜୋ ରୁଟ୍ (୧୬ଟି ଟେଷ୍ଟରୁ ୧୩୯୮ ରନ୍) ତାଙ୍କ ଉପରେ ରହିଛନ୍ତି । ବୁମରା ଚଳିତ ବର୍ଷ ଟେଷ୍ଟ କ୍ରିକେଟ୍ରେ ଭାରତ ପକ୍ଷରୁ ସର୍ବାଧିକ ୱିକେଟ୍ ନେଇଛନ୍ତି । ସେ ମାତ୍ର ୫ଟି ଟେଷ୍ଟ ଖେଳି ୨୭ଟି ୱିକେଟ୍ ଅକ୍ତିଆର କରିଛନ୍ତି । ପ୍ରଥମ ଟେଷ୍ଟରେ ମଧ୍ୟ ବୁମରାଙ୍କ ଘାତକ ବୋଲିଂ ଜାରି ରହିବ ।
ଟସ୍ ଜିତିଲେ ବ୍ୟାଟିଂ: ପ୍ରଥମ ଟେଷ୍ଟ ପାଇଁ ପ୍ରସ୍ତୁତ ପିଚ୍ ସ୍ପିନରଙ୍କୁ ସହାୟତା କରିବା ନିଶ୍ଚିତ । ମାତ୍ର ପ୍ରଥମ ୨ ଦିନରେ ପିଚ୍ ବ୍ୟାଟିଂ ପାଇଁ ବେଶ୍ ଅନୁକୂଳ ରହିବ । ପେସ୍ ବୋଲରମାନେ ମଧ୍ୟ ପିଚ୍ ଓ ସ୍ଥାନୀୟ ଜଳବାୟୁର ଫାଇଦା ଉଠାଇ ପାରିବେ । ନାଲି ମାଟିରେ ପ୍ରସ୍ତୁତ ପିଚ୍ରୁ ଅତିରିକ୍ତ ବାଉନ୍ସ ମିଳିବା ନିଶ୍ଚିତ । ଠିକ ସେହିପରି ପୁରୁଣା ବଲ୍ ଅପରାହ୍ଣରେ ରିଭର୍ସ ସୁଇଂ ହେବ । ଚେନ୍ନାଇରେ ସମ୍ପ୍ରତି ତାପମାତ୍ରା ୩୦ଡିଗ୍ରୀ ପାଖା ପାଖି ରହୁଛି । ତେଣୁ ୨ଦିନ ମଧ୍ୟରେ ବଲ୍ ଟର୍ଣ୍ଣ ହେବା ନିଶ୍ଚିତ । ସ୍ପିନରମାନେ ଦ୍ୱିତୀୟ ଦିବସ ଅପରାହ୍ଣରୁ ପିଚ୍ର ଫାଇଦା ଉଠାଇବା ଏକ ପ୍ରକାର ନିଶ୍ଚିତ । ଟସ୍ ବିଜୟୀ ଦଳ ବ୍ୟାଟିଂ ନିଷ୍ପତ୍ତି ନେବେ।
ସମ୍ଭାବ୍ୟ ଦଳ
ଭାରତ: ରୋହିତ ଶର୍ମା(ଅଧିନାୟକ), ଯଶସ୍ୱୀ ଜୈସ୍ୱାଲ୍, ଶୁଭମନ ଗିଲ୍, ବିରାଟ କୋହଲି, କେଏଲ ରାହୁଲ, ରିଷଭ ପନ୍ତ, ରବିନ୍ଦ୍ର ଜାଡେଜା, ରବି ଚନ୍ଦ୍ରନ ଅଶ୍ୱିନ, କୁଲଦୀପ ଯାଦବ, ଯଶପ୍ରୀକ ବୁମରା, ମହମ୍ମଦ ସିରାଜ ।
ବାଂଲାଦେଶ: ସଦମନ ଇସଲାମ, ଜାକିର ହାସାନ, ନଜମୁଲ ହୋସେନ ଶାନ୍ତୋ(ଅଧିନାୟକ), ମୋମିନୁଲ ଇସଲାମ, ମୁସଫିକର ରହିମ, ଲିଟନ ଦାସ, ସାକିବ ଅଲ୍ ହାସନ, ମେହଦି ହାସାନ ମିରାଜ, ଟସ୍କିନ ଅହମ୍ମଦ, ହାସାନ ମାହମୁଦ, ନାହିଦ ରାଣା/ତାଇଜୁଲ ଇସଲାମ ।
