ନୂଆଦିଲ୍ଲୀ: ସାଉଦି ଆରବର ମକ୍କାରେ ହଜ୍ ପାଇଁ ଯାଇଥିବା ୯୮ ଜଣ ଭାରତୀୟଙ୍କର ମୃତ୍ୟୁ ହୋଇଛି । ଭାରତର ବୈଦେଶିକ ମନ୍ତ୍ରଣାଳୟ ଏହା ନିଶ୍ଚିତ କରିଛି । ବୈଦେଶିକ ବ୍ୟାପାର ମନ୍ତ୍ରଣାଳୟ ଶୁକ୍ରବାର ଦିନ କହିଛି ଯେ, ଚଳିତ ବର୍ଷ ଭାରତରୁ ୧ ଲକ୍ଷ ୭୫ ହଜାର ଲୋକ ହକ୍ ପାଇଁ ମକ୍କା ଯାଇଛନ୍ତି । ସେଥିମଧ୍ୟରୁ ୯୮ ଜଣଙ୍କର ମୃତ୍ୟୁ ହୋଇଛି । ମନ୍ତ୍ରଣାଳୟ କହିଛି ଯେ ଏହି ମୃତ୍ୟୁ ପ୍ରାକୃତିକ କାରଣ, କ୍ରନିକ ରୋଗ ଏବଂ ବୃଦ୍ଧାବସ୍ଥା ଯୋଗୁଁ ଘଟିଛି । ଏଥିମଧ୍ୟରୁ ଆରାଫାତ ଦିନ ୬ ଜଣଙ୍କର ମୃତ୍ୟୁ ହୋଇଥିବା ବେଳେ ୪ ଜଣଙ୍କ ମୃତ୍ୟୁ ଦୁର୍ଘଟଣା କାରଣରୁ ହୋଇଛି । 

ବୈଦେଶିକ ମନ୍ତ୍ରଣାଳୟ କହିଛି ଯେ, ମକ୍କାରେ ଆମର ହଜ୍ ମିଶନ କାମ କରୁଛି। ଯାତ୍ରୀମାନଙ୍କ ପାଇଁ ସମସ୍ତ ବ୍ୟବସ୍ଥା କରାଯାଇଛି । ଏହି ପ୍ରକାର ଦୁର୍ଘଟଣା ଉପରେ ଆମେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରୁଛୁ । ସମସ୍ତଙ୍କର ଯତ୍ନ ନିଆଯାଉଛି । ମକ୍କାରେ ମଧ୍ୟ ବହୁତ ଗରମ ଅନୁଭବ ହେଉଛି । ସେଠାରେ ଲୋକମାନେ ମଧ୍ୟ ଉତ୍ତାପ ଲହରର ଶିକାର ହେଉଛନ୍ତି । ଗତ ବର୍ଷ ଭାରତରୁ ୧୮୭ ହଜ୍ ତୀର୍ଥଯାତ୍ରୀ ହଜ୍ ତୀର୍ଥଯାତ୍ରା ସମୟରେ ମୃତ୍ୟୁବରଣ କରିଥିଲେ । 

ଚଳିତ ବର୍ଷ ସାଉଦି ଆରବରେ ପ୍ରବଳ ଉତ୍ତାପ ହେତୁ ବଶ୍ବର ୯ ଶହରୁ ଅଧିକ ହଜ୍ ତୀର୍ଥଯାତ୍ରୀ ହଜ୍ ତୀର୍ଥଯାତ୍ରା ସମୟରେ ମୃତ୍ୟୁ ବରଣ କରିଛନ୍ତି । ସାଉଦି ଆରବର ରାଜ୍ୟ ଟେଲିଭିଜନ ରିପୋର୍ଟ କରିଛି ଯେ ମକ୍କାର ମସଜିଦ-ଏ-ହରାମରେ ତାପମାତ୍ରା ବୃଦ୍ଧି ପାଇବାରେ ଲାଗିଛି । ତାପମାତ୍ରା ବୃଦ୍ଧି ଏବଂ ପ୍ରବଳ ଉତ୍ତାପ ହେତୁ ଯାତ୍ରୀମାନଙ୍କୁ ଅନେକ ସମସ୍ୟାର ସମ୍ମୁଖୀନ ହେବାକୁ ପଡୁଛି । 

ତେବେ ହଜ୍ ତୀର୍ଥଯାତ୍ରା କରିବା ପୂର୍ବରୁ ତୀର୍ଥଯାତ୍ରୀ ମାନଙ୍କୁ ଏକ ଚୁକ୍ତିନାମା ସ୍ୱାକ୍ଷର କରିବାକୁ ପଡିଥାଏ । ଯେଉଁଥିରେ ଲେଖା ଅଛି ଯେ ଯଦି ଜଣେ ତୀର୍ଥଯାତ୍ରୀ ହଜ୍ ଯାତ୍ରା କରିବା ସମୟରେ ସାଉଦି ଆରବ ମାଟିରେ କୌଣସି ପ୍ରକାରେ ମୃତ୍ୟୁବରଣ କରନ୍ତି, ତେବେ ତାଙ୍କ ଶବକୁ କେବଳ ସେଠାରେ ସମାଧି ଦିଆଯିବ । ମୃତ ଶରୀରକୁ ଭାରତକୁ ପଠାଯାଏ ନାହିଁ । ମୃତଦେହ ଫେରାଇବା ପାଇଁ ପରିବାର ପକ୍ଷରୁ ଦାବି କରାଯାଇଥିଲେ ମଧ୍ୟ ସାଉଦି ଆରବ ସରକାର ଏହାକୁ ଗ୍ରହଣ କରୁନାହାଁନ୍ତି ।