ମହାବିରୋଡ଼,୩୦/୦୭: ଜଙ୍ଗଲରୁ ବାହାରି ଗାଁ ଦାଣ୍ଡରେ ବୁଲିଲାଣି କଲରାପତରିଆ ବାଘ । ଅନ୍ୟପଟେ ବାଘକୁ ଠାବ କରିପାରୁନି ବନ ବିଭାଗ । ଜଙ୍ଗଲରେ ଟ୍ରାପ୍ କ୍ୟାମେରା ଖଞ୍ଜିଥିବା ବେଳେ ବାଘ ଗାଁ’ରେ ବୁଲୁଛି । ଘାଗରାମୁଣ୍ଡା ଗ୍ରାମର ଏକ ସିସିଟିଭି ଫୁଟେଜ୍ରେ ଗାଁ ରାସ୍ତାରେ ବାଘ ବୁଲୁଥିବା ଚିତ୍ର କଏଦ୍ ହୋଇଛି । ଏହାକୁ ନେଇ ଅଞ୍ଚଳବାସୀ ଆତଙ୍କିତ ହୋଇପଡ଼ିଛନ୍ତି ।
ପ୍ରକାଶ ଯେ, ମହାବିରୋଡ଼ ରେଞ୍ଜ୍ କେନ୍ଦୁମୁଣ୍ଡା ଖେସେରା ଜଙ୍ଗଲରେ ଗତ ୧୬ ତାରିଖରେ କଲରାପତରିଆ ବାଘ ଆକ୍ରମଣରେ ବ୍ରାହ୍ମଣଧରା ଗାଁର ପୁଇନ ନାଏକ ଆହତ ହୋଇଥିଲେ । ଛେଳି ଚରାଇବାକୁ ଯାଇଥିବା ପୁଇନଙ୍କୁ ବାଘ ଆକ୍ରମଣ କରି ଲହୁଲୁହାଣ କରିଥିବା ବେଳେ ସାଥୀ ଛେଳି ଚରାଳିଙ୍କ ଉପସ୍ଥିତି ବୁଦ୍ଧି ଯୋଗୁଁ ସେ ବର୍ତ୍ତି ଯାଇଥିଲେ । ଏହାର ଦିନକ ପରେ ଅର୍ଥାତ୍ ୧୮ ତାରିଖରେ ଗଡ଼ପଳାଶୁଣି ବଡ଼ ଖୁଣ୍ଟିଆ ଜଙ୍ଗଲରେ ବାଘ ପାଦଚିହ୍ନ ଠାବ ହୋଇଥିଲା । ୧୯ ତାରିଖରେ ଅସନବାହାଳି ଗ୍ରାମ କେନ୍ଦୁପଶି ଜଙ୍ଗଲରେ ବାଘ ଆକ୍ରମଣରେ ଦୁଇ ଗାଈ ଆହତ ହୋଇଥିଲେ ।
ଜଙ୍ଗଲରେ ବାଘ ଉପସ୍ଥିତି ଜଣାପଡ଼ିବା ପରେ ଲୋକେ ଆତଙ୍କିତ ହୋଇପଡ଼ିଥିଲେ । ଜଙ୍ଗଲକୁ ନଯିବାକୁ ବନ ବିଭାଗ ପକ୍ଷରୁ ଡାକବାଜି ଯନ୍ତ୍ର ଯୋଗେ ଲୋକଙ୍କୁ ସଚେତନ କରାଯିବା ସହ ବାଘ ଠାବ କରିବାକୁ ଉଦ୍ୟମ ଚଳାଇଥିଲା । ବନଖଣ୍ଡ ଅଧିକାରୀଙ୍କ ନିର୍ଦ୍ଦେଶକ୍ରମେ ଜଙ୍ଗଲର ବିଭିନ୍ନ ସ୍ଥାନରେ ଟ୍ରାପ୍ କ୍ୟାମେରା ଖଞ୍ଜା ଯାଇଥିଲା । ଇତି ମଧ୍ୟରେ ଦୁଇ ସପ୍ତାହ ପୂରିଥିବା ବେଳେ ବାଘକୁ ଠାବ କରିବାରେ ବନ ବିଭାଗ ବିଫଳ ହୋଇଛି । ରବିବାର ବନ ବିଭାଗର ଏକ ଟିମ୍ ଟ୍ରାପ୍ କ୍ୟାମେରାର ଫୁଟେଜ୍ ଚେକ୍ କରିବାକୁ ମେମୋରୀ କାର୍ଡ ଖୋଲି ନେଇଥିବା ଜଣାଯାଇଛି ।
ବାଘ ସମ୍ପର୍କରେ ବନ ବିଭାଗ କୌଣସି ସୂଚନା ଦେଇନଥିବା ବେଳେ ରବିବାର ରାତିରେ ବାଘ ଘାଗରାମୁଣ୍ଡା ଗାଁରେ ବୁଲୁଥିବା ସିସିଟିଭି ଫୁଟେଜ୍ରେ ଦେଖାଯାଇଛି । ରାତି ପ୍ରାୟ ୨ଟା ସମୟରେ ଗାଁ ଏକ ଦୋକାନର ସିସିଟିଭିରେ ବାଘ ରାସ୍ତାରେ ବିଚରଣ କରୁଥିବା ଦେଖାଯାଇଛି । ବାଘଟି ରାସ୍ତାରେ ଗାଁ ଆଡ଼କୁ ମୁହାଁଇଥିଲା । ଏ ସମ୍ପର୍କରେ ଆଜି ପୂର୍ବାହ୍ନରେ ଖବର ପ୍ରଚାରିତ ହେବା ପରେ ଗ୍ରାମବାସୀ ଆତଙ୍କିତ ହୋଇପଡ଼ିଛନ୍ତି । ସମ୍ଭାବ୍ୟ ବାଘର ଆକ୍ରମଣକୁ ନେଇ ସନ୍ଧ୍ୟା ହେବା ମାତ୍ରେ ଗ୍ରାମରେ ତାଟିକବାଟ ପଡ଼ି ଯାଇଛି । ଦିନସାରା ଲୋକେ ଜଙ୍ଗଲ ଆଡ଼କୁ ଯିବାକୁ ସୁରକ୍ଷିତ ମଣିନଥିଲେ । ଶିକାର ଉଦ୍ଦେଶ୍ୟରେ ବାଘ ଗାଁ ମୁହାଁ ହୋଇଥିବା ଆଲୋଚନା ହେଉଛି । ତୁରନ୍ତ ବାଘକୁ ଟ୍ରାଙ୍କୁଲାଇଜ୍ କରି ସ୍ଥାନାନ୍ତର କରିବାକୁ ଅଞ୍ଚଳବାସୀ ଦାବି କରିଛନ୍ତି ।
ଏ ସମ୍ପର୍କରେ ମହାବିରୋଡ଼ ରେଞ୍ଜ ଅଧିକାରୀ ହରେଶ ଚନ୍ଦ୍ର କିଷାନ କହିଛନ୍ତି, ବାଘକୁ ଠାବ କରାଯାଇପାରିନି । ଏକ ଟିମ୍ ଟ୍ରାପ୍ କ୍ୟାମେରାରୁ ମେମୋରୀ କାର୍ଡ ଖୋଲି ନେଇଛନ୍ତି । ତାହାକୁ ଯାଞ୍ଚ କରାଯିବା ପରେ ବାଘ କ୍ୟାମେରାରେ କଏଦ୍ ହୋଇଛି କି ନାହିଁ ଜଣାପଡ଼ିବ । ସିସିଟିଭି ଫୁଟେଜ୍ରେ ବାଘ ଚିତ୍ର ଉତ୍ତୋଳନ ହୋଇଥିବା ସୂଚନା ପାଇଛି । କିନ୍ତୁ ତାହା ବାଘ କି ନାହିଁ ତଦନ୍ତ ପରେ ସ୍ପଷ୍ଟ ହେବ । ବାଘ ଠାବ ହେବା ପରେ ତାକୁ ଧରି ସ୍ଥାନାନ୍ତର କରାଯିବା ଦିଗରେ ପଦକ୍ଷେପ ନିଆଯିବ । ଏଥିପାଇଁ ଏକ ସ୍ୱତନ୍ତ୍ର ଟିମ୍ ଆସିବେ ବୋଲି ଶ୍ରୀ କିଷାନ କହିଛନ୍ତି ।
