ନୂଆଦିଲ୍ଲୀ,୧୮/୦୩:ଆମେରିକାର ଫ୍ଲୋରିଡାରେ ମର୍ମନ୍ତୁଦ ସଡ଼କ ଦୁର୍ଘଟଣା । କାର୍ ସହ ମୁହାଁମୁହିଁ ଧକ୍କା ହେଲା ଆଉ ଏକ କାର୍ । ଫଳରେ ଗୋଟିଏ ପରିବାରର ତିନି ଜଣଙ୍କ ମୃତ୍ୟୁ ହୋଇଛି। ତେବେ ମୃତକମାନେ ତେଲେଙ୍ଗାନାର ବୋଲି ଜଣାପଡ଼ିଛି । ଏନେଇ ମହିଳାଙ୍କ ବାପା ମୋହନ ରେଡ୍ଡୀ ଘଟଣାକୁ ନେଇ କହିଛନ୍ତି ଯେ, ଦୁର୍ଘଟଣାରେ ପ୍ରଗତି ରେଡ୍ଡୀ, ତାଙ୍କ ପୁଅ ଏବଂ ତାଙ୍କ ଶାଶୁଙ୍କ ମୃତ୍ୟୁ ହୋଇଥିବା ବେଳେ ସ୍ୱାମୀ ଗୁରୁତର ଆହତ ହୋଇଛନ୍ତି ।
ଏହା ମଧ୍ୟ ପଢନ୍ତୁ- ପୁଣି ରକ୍ତର ଖେଳ ଆରମ୍ଭ; ଗାଜାରେ ଇସ୍ରାଏଲର ବଡ ଏୟାରଷ୍ଟ୍ରାଇକ୍, ୨୦୦ ମୃତ
ଏହି ପରିବାର ରଙ୍ଗା ରେଡ୍ଡୀ ଜିଲ୍ଲାର ଟେକୁଲାପାଲି ଗାଁର ବାସିନ୍ଦା ଥିଲେ। ପ୍ରଗତି ରେଡ୍ଡୀ ଆମେରିକାରେ କାମ କରୁଥିବା ସିଦ୍ଧିପେଟର ରୋହିତ ରେଡ୍ଡୀଙ୍କୁ ବିବାହ କରିଥିଲେ। ଏହି ଦମ୍ପତିଙ୍କର ଦୁଇଟି ପୁଅ ଥିଲେ। ପରିବାରର ସମସ୍ତେ ଫ୍ଲୋରିଡାରେ ରହୁଥିଲା। ରୋହିତ ରେଡ୍ଡୀଙ୍କ ମାଆ ସୁନିତା ମଧ୍ୟ ତାଙ୍କ ସହିତ ରହୁଥିଲେ। ମିଳିଥିବା ସୂଚନା ଅନୁଯାୟୀ, ପରିବାରର ସମସ୍ତେ ମିଶି ଏକ କାରରେ ଯାତ୍ରା କରୁଥିଲେ । ସେହି ସମୟରେ ଫ୍ଲୋରିଡାରେ ଆଉ ଏକ କାର ସହିତ ଧକ୍କା ହୋଇଥିଲା। ଫଳରେ ଘଟଣାସ୍ଥଳରେ ୩ ଜଣଙ୍କର ମୃତ୍ୟୁ ହୋଇଥିଲା । ଏନେଇ ଖବର ପାଇ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପ୍ରକାଶ ଥାଉକି, ପ୍ରଗତି ରେଡ୍ଡୀ MPTCର ପୂର୍ବତନ ସଦସ୍ୟ ମୋହନ ରେଡ୍ଡୀ ଏବଂ ପୂର୍ବତନ ସରପଞ୍ଚ ପବିତ୍ରା ଦେବୀଙ୍କ ଦ୍ୱିତୀୟ ଝିଅ ଥିଲେ। ଝିଅ ଏବଂ ନାତିକୁ ହରାଇ ଦମ୍ପତି ଦୁଃଖରେ ଭାଙ୍ଗି ପଡ଼ିଛନ୍ତି। ସେପଟେ ୩ ଜଣଙ୍କ ମୃତ୍ୟୁରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।
