ବାରିପଦା, ୦୪/୦୭ : କୁରାଢୀ ଚୋଟରେ ଗଲା ବୃଦ୍ଧାଙ୍କ ଜୀବନ। ମୟୂରଭଞ୍ଜ ଜିଲ୍ଲା ବଡ଼ସାହି ବ୍ଲକ ଅନ୍ତର୍ଗତ କେନ୍ଦୁଡ଼ିହା ପଞ୍ଚାୟତ ନିଶ୍ଚିନ୍ତପୁର ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି। ପଡୋଶୀ ଯୁବକଙ୍କ କୁରାଢୀ ଚୋଟରେ ଜଣେ ବିଧବା ମହିଳାଙ୍କ ମୃତ୍ୟୁ ହୋଇଛି। ଅଭିଯୁକ୍ତ ଜଣକ ହେଲେ ବଡ଼ସାହି ଥାନା କେନ୍ଦୁଡିହା ପଞ୍ଚାୟତ ନିଶ୍ଚିନ୍ତପୁର ଗ୍ରାମର ବାବୁଲି ମହାକୁଡ (୩୫ବର୍ଷ)। 

ସୂଚନାନୁଯାୟୀ, ବଡ଼ସାହି ବ୍ଲକ ନିଶ୍ଚିନ୍ତପୁର ଗ୍ରାମର ଗୌରି ବେହେରା(୭୨ବର୍ଷ) ମନ୍ଦିରକୁ ଯାଇଥିଲେ। ଫେରିବା ବେଳେ ତାଙ୍କୁ ପଡୋଶୀ ଯୁବକ ବାବୁଲି ମହାକୁଡ ଏକ କୁରାଢୀରେ ନୃଶଂସ ଭାବେ ହାଣି ହତ୍ୟା କରିଛି। ଏହାପରେ ଗ୍ରାମବାସୀମାନେ ବାବୁଲିକୁ ଅଟକ ରଖି ପୋଲିସ ଜିମା ଦେଇଛନ୍ତି। ବଡ଼ସାହି ପୋଲିସ ଆଇଆଇସି ଉମାଶଙ୍କର ନାୟକ ଘଟଣା ସ୍ଥଳରେ ପହଞ୍ଚି ହତ୍ୟାକାରୀକୁ ଗିରଫ କରିବା ସହ ହତ୍ୟାକାଣ୍ଡରେ ବ୍ୟବହୃତ କୁରାଢୀକୁ ଜବତ କରିଛନ୍ତି। ତେବେ ଅନ୍ଧବିଶ୍ୱାସର ବଶବର୍ତ୍ତୀ ହୋଇ ବାବୁଲି ବିଧବା ମହିଳାଙ୍କୁ ହତ୍ୟା କରିଥିବା କୁହାଯାଉଛି। ଏନେଇ ପୋଲିସ ତଦନ୍ତ ଜାରି ରଖିଛି।