ନୂଆଦିଲ୍ଲୀ ୨୧/୦୬: ବଡ଼ ସହରରେ ରହିବା ପାଇଁ ଲୋକଙ୍କୁ ଅନେକ ପ୍ରକାର ଆହ୍ୱାନର ସମ୍ମୁଖୀନ ହେବାକୁ ପଡ଼େ । କେଉଁଠି ଘର ମିଳିବା ସମସ୍ୟା, ଆଉ କେଉଁଠି ଦରଦାମର ଆକାଶଛୁଆଁ ବୃଦ୍ଧି । ପୁଣି କେଉଁଠି ଟ୍ରାଫିକ୍ ସମସ୍ୟା । ନ୍ୟୁୟର୍କରେ ବି ସମାନ ସ୍ଥିତି । ଏଠାରେ ଲୋକେ ଟ୍ରାଫିକ୍ ଜାମ୍ ପାଇଁ ବହୁ ସମସ୍ୟାର ସମ୍ମୁଖୀନ ହେଉଛନ୍ତି । ଇତିମଧ୍ୟରେ ଜଣେ ନ୍ୟୁୟର୍କ ବାସିନ୍ଦା ଭାରତୀୟ ବଂଶୋଦ୍ଭବ ମହିଳା ସବୁରି ଧ୍ୟାନ ଆକର୍ଷଣ କରିଛନ୍ତି । ଖୁସି ସୁରୀ ନାମ୍ନୀ ଏହି ମହିଳା ଟ୍ୟାକ୍ସି ବଦଳରେ ହେଲିକପ୍ଟରରେ ଯାତ୍ରାକୁ ଅଧିକ ଶସ୍ତା ଓ ସହଜ ବୋଲି କହିଛନ୍ତି ।
60 min uber or 5 min helicopter ride - literally a $30 difference @flybladenow pic.twitter.com/wOZyOjjR9w
— khushi (@khushkhushkhush) June 16, 2024
ସୂଚନାଯୋଗ୍ୟ, ଆମେରିକାରେ ଟ୍ୟାକ୍ସି ଭଳି ହେଲିକପ୍ଟର ସେବା ମଧ୍ୟ ମିଳୁଛି, ଯାହାର ନାଁ ‘ବ୍ଲେଡ୍’ । ଖୁସି ଉଭୟ ଉବର୍ କ୍ୟାବ୍ ଓ ବ୍ଲେଡ୍ର ବୁକିଂ ଭଡ଼ାର ସ୍କ୍ରିନ୍ଶଟ୍ ଶେୟାର କରିଛନ୍ତି । ତାଙ୍କ ସ୍କ୍ରିନ୍ଶଟ୍ ଅନୁସାରେ, ଉବର୍ ଟ୍ୟାକ୍ସିରେ ଏକ ନିର୍ଦ୍ଦିଷ୍ଟ ସ୍ଥାନକୁ ଯିବା ଲାଗି ଭଡ଼ା ୧୩୧.୯୯ ଆମେରିକୀୟ ଡଲାର ଅର୍ଥାତ୍ ହାରାହାରି ୧୧ ହଜାର ଟଙ୍କା ଓ ସମୟ ୧ ଘଣ୍ଟା ରହିଛି । ଅନ୍ୟପକ୍ଷେ, ବ୍ଲେଡ୍ (ହେଲିକପ୍ଟର) ରେ ୧୬୫ ଡଲାର ଅର୍ଥାତ୍ ୧୩,୭୬୫ ଟଙ୍କା ଭଡ଼ା ସହିତ ମାତ୍ର ୫ ମିନିଟ୍ରେ ଲକ୍ଷ୍ୟସ୍ଥଳରେ ପହଞ୍ଚିବା କଥା ଉଲ୍ଲେଖ ହୋଇଛି । ସୁରୀ ସ୍କ୍ରିନ୍ଶଟ୍ ସହିତ କ୍ୟାପ୍ସନ ଲେଖିଛନ୍ତି ‘୬୦ ମିନିଟ୍ର ଉବର ରାଇଡ୍ ନା ୫ ମିନିଟ୍ର ହେଲିକପ୍ଟର ଯାତ୍ରା । ଖୁବ୍ କମ୍ ଟଙ୍କାର ଅନ୍ତର ।’ ତେବେ ସୁରୀଙ୍କର ଏହି ପୋଷ୍ଟ୍ ଖୁବ୍ ଭାଇରାଲ ହେଉଛି ।
