ନୂଆଦିଲ୍ଲୀ ୨୪/୦୬: ବଡ଼ ବଡ଼ ଟେକ୍ନୋଲୋଜି କଂପାନିର କଲ୍ ସେଣ୍ଟରରେ କାମ କରୁଥିବା କର୍ମଚାରୀମାନେ ପ୍ରତିଦିନ ଅନେକ ବିରକ୍ତିଭରା ଫୋନ୍ କଲ୍ ପାଇଥାନ୍ତି । ଗ୍ରାହକମାନେ ସେମାନଙ୍କର ସମସ୍ତ ରାଗକୁ ସେହି କର୍ମଚାରୀମାନଙ୍କ ଉପରେ ହିଁ ଶୁଝାଇଥାନ୍ତି । ଚିତ୍କାର କରି କଡ଼ା ଭାଷାରେ ନିଜର ଅଭିଯୋଗ କହିବା ସହିତ କିଛି କ୍ଷେତ୍ରରେ ମନଇଚ୍ଛା ଗାଳି ବି ଦିଅନ୍ତି । ଏଭଳିସ୍ଥଳରେ କର୍ମଚାରୀମାନେ ହତାଶାବୋଧ କରିଥାନ୍ତି । ସେମାନଙ୍କର ବ୍ୟକ୍ତିଗତ ଜୀବନ ଉପରେ ବି ଏହାର ପ୍ରଭାବ ପଡି଼ଥାଏ । ଅତି ଚିଡ଼ଚିଡ଼ା ସ୍ୱଭାବର ହୋଇଯାଆନ୍ତି ସେମାନେ । ଏହି କଥାକୁ ଦୃଷ୍ଟିରେ ରଖି ଆଜିକାଲି ବହୁ ଟେକ୍ନୋଲୋଜି କଂପାନି କଲ୍ ସେଣ୍ଟର କର୍ମଚାରୀମାନଙ୍କର ହତାଶାବୋଧକୁ ଦୂର କରିବାକୁ ମାନସିକ ଚାପ ପରିଚାଳନା କର୍ଯ୍ୟକ୍ରମମାନ ଆୟୋଜନ କରୁଛନ୍ତି ।
କାର୍ଯ୍ୟକ୍ରମରେ କର୍ମଚାରୀମାନଙ୍କୁ ଯୋଗ, ଧ୍ୟାନ ପ୍ରଭୃତି ଶିଖାଯାଉଛି । ମନକୁ ଶାନ୍ତ ରଖିବା ଭଳି ବିଭିନ୍ନ ପ୍ରକାର ଥେରାପି ବି ପ୍ରଦାନ କରାଯାଉଛି । ତେବେ ଜାପାନର ଏକ କଂପାନି ସଫ୍ଟବ୍ୟାଙ୍କ୍ ଏହି ପରିପ୍ରେକ୍ଷୀରେ ଏକ ନିଆରା ସମାଧାନ ନେଇ ଆସିଛି । କଂପାନି ଏକ ଏଭଳି ଏଆଇ ଭଏସ୍ ଫିଲଟର ପ୍ରସ୍ତୁତ କରିଛି ଯାହାକି ଗ୍ରାହକଙ୍କର କଡ଼ା କଥାକୁ ମୃଦୁ ଭାଷାରେ ପରିଣତ କରିଦେବ । ଏହି ଏଆଇ ଭଏସ୍ ଫିଲଟର ପ୍ରସ୍ତୁତି ପାଇଁ କଂପାନିକୁ ତିନିବର୍ଷ ସମୟ ଲାଗିଛି । ତାହା ଗ୍ରାହକଙ୍କ ଚିତ୍କାରକୁ ଚିହ୍ନଟ କରିବା ସହିତ ଆପେ ଆପେ ନରମ କଥାରେ ପରିଣତ କରିବ ବୋଲି କୁହାଯାଉଛି ।
ଏଆଇ ଫିଲଟର ବିକଶିତ କରିଥିବା ଟିମ୍ର ଜଣେ ସଦସ୍ୟ କହିଛନ୍ତି, କଲ୍ ସେଣ୍ଟର କର୍ମଚାରୀମାନଙ୍କୁ ଗ୍ରାହକଙ୍କ ଉତ୍ପୀଡ଼ନ ଭଳି ସମସ୍ୟାର ସମାଧାନ କରିବା ଲାଗି ଆମେ ଏକ ‘ଇମୋସନ୍ ସପ୍ରେସନ୍ ସିଷ୍ଟମ’ ବିକାଶ କରିଛୁ । ଏହି ଭଏସ୍ ଫିଲ୍ଟରର ୨ଟି ପର୍ଯ୍ୟାୟ ରହିଛି । ପ୍ରଥମ ପର୍ଯ୍ୟାୟରେ ଏଆଇ କ୍ରୋଧପୂର୍ଣ୍ଣ ସ୍ୱରକୁ ଚିହ୍ନଟ କରି ସେହି କଥାର ଗୁରୁତ୍ୱପୂର୍ଣ୍ଣ ଦିଗକୁ ବାଛିଥାଏ । ଦ୍ୱିତୀୟ ପର୍ଯ୍ୟାୟରେ ତାକୁ ଏକ ଅପେକ୍ଷାକୃତ ବିନମ୍ର ସ୍ୱରରେ ପରିଣତ କରିଥାଏ । ଗୁରୁତ୍ୱପୂର୍ଣ୍ଣ କଥା ହେଲା ଗ୍ରାହକ କହିଥିବା କୌଣସି ଶବ୍ଦକୁ ଫିଲ୍ଟର ପରିବର୍ତ୍ତନ କରେନାହିଁ । କେବଳ ତାଙ୍କର ଶାଣିତ ସ୍ୱରକୁ ମୃଦୁ କରିଥାଏ । ଏହାଦ୍ୱାରା କଲ୍ ସେଣ୍ଟର କର୍ମଚାରୀ ଗ୍ରାହକମାନଙ୍କର ସମାନ ଅପମାନମୂଳକ କଥା ଶୁଣିଥାନ୍ତି । କିନ୍ତୁ ନରମ ସ୍ୱରରେ ଶୁଣୁଥିବାରୁ ସେମାନଙ୍କର ମଧ୍ୟରେ ଏ ସଂପର୍କରେ ସେତେ ଅଧିକ ପ୍ରତିକ୍ରିୟା ସୃଷ୍ଟି ହୋଇନଥାଏ । ଫଳରେ ସେମାନଙ୍କ ମନରେ ଆସୁଥିବା ବିରକ୍ତି ଭାବ, ମାନସିକ ଉଦ୍ବିଗ୍ନତା ବହୁ ପରିମାଣରେ କମିଯାଇଥାଏ ।
ଏଆଇକୁ ପ୍ରଶିକ୍ଷିତ କରିବା ଲାଗି ସଫ୍ଟବ୍ୟାଙ୍କର ଇଞ୍ଜିନିୟରମାନେ ୧୦ ଜଣ ଅଭିନେତାଙ୍କ ସହିତ ଯୋଗାଯୋଗ କରିଥିଲେ । ସେମାନଙ୍କୁ ଚିଲ୍ଲାଇବା, ଅନ୍ୟ ଉପରେ ଦୋଷ ଲଦିବା, ଧମକ ଦେବା, କ୍ଷମା ପ୍ରାର୍ଥନା ଦାବି କରିବା ପାଇଁ ବ୍ୟବହୃତ ହେଉଥିବା ଅତି କମ୍ରେ ୧୦୦ଟି ଲେଖାଏଁ ସାଧାରଣ ବାକ୍ୟାଂଶ ରେକର୍ଡ କରିବାକୁ କୁହାଯାଇଥିଲା । ଏହାଛଡ଼ା ଅନ୍ୟମାନଙ୍କ ଦ୍ୱାରା ମଧ୍ୟ କିଛି ବାକ୍ୟାଂଶ ରେକର୍ଡ କରାଯାଇଥିଲା । ଏଆଇ ଫିଲଟରକୁ ପ୍ରଶିକ୍ଷିତ କରିବାକୁ ମୋଟ ୧୦ ହଜାରରୁ ଅଧିକ ଭଏସ ଡେଟା ବ୍ୟବହାର କରାଯାଇଛି । ସେପଟେ ସଫ୍ଟ ବ୍ୟାଙ୍କ୍ ତାର ସମସ୍ତ କଲ୍ ସେଣ୍ଟରରେ ଏହି ଏଆଇ ଫିଲଟର ଟେକ୍ନୋଲୋଜି ବ୍ୟବହାର କରିବାକୁ ଚାହୁଁଛି କି ନାହିଁ ତାହା ସ୍ପଷ୍ଟ ହୋଇନାହିଁ ।