ଭୁବନେଶ୍ବର, ୩୦।୪ ଗ୍ରୀଷ୍ମ ପ୍ରବାହରେ ଜଳୁଛି ସହର । ଦିନକୁ ଦିନ ସହର ଗୁଡିକରେ ତାପମାତ୍ରା ବୃଦ୍ଧି ପାଉଛି । ବିଭିନ୍ନ ସହରରେ ତାପମାତ୍ରା ୪୦ ଡିଗ୍ରୀ ଉପରେ ରହୁଛି । ରାଜ୍ୟରେ ବିଗତ ବର୍ଷ ଅପେକ୍ଷା ଚଳିତ ବର୍ଷ ତାପମାତ୍ରା ରେକର୍ଡ ଭାଙ୍ଗିଥିବା ବେଳେ ସର୍ବାଧିକ ପ୍ରବାହ ସହର ଗୁଡିକରେ ଦେଖିବାକୁ ମିଳିଛି । ବାଲେଶ୍ୱର ଓ ବାରିପଦାରେ ତାପମାତ୍ରା ରେକର୍ଡ ଭାଙ୍ଗି ୪୬ ଡିଗ୍ରୀରେ ପହଞ୍ଚିଛି। ଯାହାକି ଅପ୍ରେଲ ମାସର ସର୍ବୋଚ୍ଚ ଦିନ ତାପମାତ୍ରାର ସର୍ବକାଳୀନ ରେକର୍ଡ । ବାରିପଦାରେ ୪୬.୪ ଡିଗ୍ରୀ ତାପମାତ୍ରା ରେକର୍ଡ କରାଯାଇଥିବା ବେଳେ ବାଲେଶ୍ବରରେ ୪୬ ଡିଗ୍ରୀ ରେକର୍ଡ କରାଯାଇଛି। ସେହିପରି ରାଜଧାନୀ ଭୁବନେଶ୍ୱର ଚଳିତ ବର୍ଷ ପ୍ରଥମ ଥର ପାଇଁ ୪୫ ଡିଗ୍ରୀ ଅତିକ୍ରମ କରିଛି ତାତି । ଭୁବନେଶ୍ବରରେ ତାପାମାତ୍ରା ୪୫.୪ ଡିଗ୍ରୀ ରହିଛି।
ସେହିପରି ୧୫ଟି ସହରରେ ପାରଦ ୪୪ ଡିଗ୍ରୀ ଉପରେ ରହିଛି। ଅନୁଗୁଳରେ ୪୪.୭ ଡିଗ୍ରୀ, ତାଳଚେର, ଢେଙ୍କାନାଳ ଓ ଯାଜପୁରରେ ୪୪.୫, ବୌଦ୍ଧ ୪୪.୩, ଝାରସୁଗୁଡା, କଟକ ଓ କେନ୍ଦ୍ରାପଡାରେ ୪୪.୨, ଟିଟିଲାଗଡ, ନୟାଗଡ, ନୂଆପଡା, ଭଦ୍ରକରେ ୪୪ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି।
ଏଭଳି ଗ୍ରୀଷ୍ମ ଦାଉ ଆହୁରି ୩ ଦିନ ଲାଗି ରହିବ ବୋଲି ପାଣିପାଗ କେନ୍ଦ୍ର କହିଛି । ଆସନ୍ତା ୨୪ ଘଣ୍ଟା ପାଇଁ ୧୫ ଜିଲ୍ଲାକୁ ରେଡ୍ ଆଲର୍ଟ ଜାରୀ ହୋଇଛି । ଭୀଷଣ ଗ୍ରୀଷ୍ମ ପ୍ରବାହ ଅନୁଗୁଳ, ଢେଙ୍କାନାଳ, ମୟୂରଭଞ୍ଜ, କେନ୍ଦୁଝର, ବାଲେଶ୍ୱର , ଭଦ୍ରକ ,ଯାଜପୁର, କେନ୍ଦ୍ରାପଡା, କଟକ, ଖୋର୍ଦ୍ଧା, ନୟାଗଡ, ସୁନ୍ଦରଗଡ, ଝାରସୁଗୁଡା, ସୋନପୁର ଓ ବୌଦ୍ଧ ଜିଲ୍ଲାକୁ ସତର୍କ ସୂଚନା ଜାରୀ ହୋଇଛି । ସେହିପରି ୧୩ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରୀ କରିଛି ପାଣିପାଗ ବିଭାଗ । ଜିଲ୍ଲା ଗୁଡିକ ହେଲା ଜଗତସିଂହପୁର , ବରଗଡ, ସମ୍ବଲପୁର, ଦେଓଗଡ, ବଲାଙ୍ଗିର, ନୂଆପଡା,କଳାହାଣ୍ଡି, କନ୍ଧମାଳ, ନବରଙ୍ଗପୁର , ଗଞ୍ଜାମ, ଗଜପତି, ମାଲକାନଗିରି, ରାୟଗଡା । ଗରମ ଓ ଗୁଳୁଗୁଳି ପାଇଁ ପୁରୀ ଓ କୋରାପୁଟକୁ ୟେଲୋ ୱାର୍ଣ୍ଣିଂ ଜାରୀ କରିଛି ପାଣିପାଗ କେନ୍ଦ୍ର । ଆସନ୍ତା କାଲି ପାଇଁ ୧୧ ଜିଲ୍ଲାକୁ ରେଡ୍ ୱାର୍ଣ୍ଣିଂ ଜାରି କରିଛି ପାଣିପାଗ କେନ୍ଦ୍ର । ଜିଲ୍ଲା ଗୁଡିକ ମଧ୍ୟରେ ରହିଛି ମୟୂରଭଞ୍ଜ, କେଉଁଝର,ସୁନ୍ଦରଗଡ, ଝାରସୁଗୁଡା, ଅନୁଗୁଳ, ଢେଙ୍କାନାଶ, ବାଲେଶ୍ୱର, ଭଦ୍ରକ, ଯାଜପୁର, କଟକ ଓ ବୌଦ୍ଧ ଜିଲ୍ଲା । ସେହିପରି ଗ୍ରୀଷ୍ମ ପ୍ରବାହ ନେଇ ୧୨ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି ହୋଇଛି । ଜିଲ୍ଲା ଗୁଡିକ ହେଲା ଦେଓଗଡ, ସମ୍ବଲପୁର, ବରଗଡ, ବଲାଙ୍ଗିର, କଳାହାଣ୍ଡି, ସୋନପୁର, ନୂଆପଡା, ଜଗତସିଂହପୁର, କେନ୍ଦ୍ରାପଡା, ଖୋର୍ଦ୍ଧା, ନୟାଗଡ, ଓ ମାଲକାନଗିରି ।