ମାହାଙ୍ଗା, ୨୩/୦୭ : ପଟ୍ଟାମୁଣ୍ଡାଇ କେନାଲ ଠାରେ ମର୍ମନ୍ତୁଦ ଦୁର୍ଘଟଣା। ଭାରସାମ୍ୟ ହରାଇ ଏକ କାର୍ କେନାଲକୁ ଖସିପଡିଛି। ଫଳରେ କାର୍‌ରେ ଫସି ଜଣେ ଯୁବକଙ୍କ ମୃତ୍ୟୁ ଘଟିଛି।

ସୂଚନାନୁଯାୟୀ, ମାହାଙ୍ଗା ଥାନା ଯଇପୁର ଫାଣ୍ଡି ଅଧୀନ ସାହାପୁର ପଞ୍ଚାୟତ ଅରିଲୋ ଗ୍ରାମର ବ୍ରହ୍ମାନନ୍ଦ ରାଉତଙ୍କ ପୁଅ ଅନିଲ କୁମାର ରାଉତ (୪୯ ବର୍ଷ) ନିଜ କାର୍ ଯୋଗେ ଭୁବନେଶ୍ୱରରୁ ଘର ଅଭିମୁଖେ ଆସୁଥିଲେ। ଏହି ସମୟରେ କାର୍‌ଟି ଭେଡା ଠାରେ ଭାରସାମ୍ୟ ହରାଇ ପଟ୍ଟାମୁଣ୍ଡାଇ କେନାଲ ମଧ୍ୟକୁ ଖସି ପଡିଥିଲା। କେନାଲରେ ପାଣି ଅଧିକ ଥିବାରୁ କାରଟି ବୁଡ଼ିବାକୁ ଲାଗିଥିଲା। ନିକଟରେ କାମ କରୁଥିବା କିଛି ଚାଷୀମାନେ ଦୌଡ଼ି ଆସି କାର୍ କାଚ ଭାଙ୍ଗି ଉକ୍ତ ଯୁବକକୁ ଉଦ୍ଧାର କରିଥିଲେ। ଘଟଣା ସ୍ଥଳରେ କୁଆଁପାଳ ଅଗ୍ନିଶମ ବାହିନୀ ପହଞ୍ଚି ଯୁବକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରିବା ସହ ମାହାଙ୍ଗା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ଘଟଣାସ୍ଥଳରେ ମାହାଙ୍ଗା ପୋଲିସ୍ ପହଞ୍ଚି ତଦନ୍ତ ଆରମ୍ଭ କରିଛି।