ଚନ୍ଦାହାଣ୍ଡି,୨୪/୭ :  ମହିଳାଙ୍କ ସନ୍ଦେହଜନକ ମୃତ୍ୟୁ । ଏଭଳି ଏକ ଘଟଣା ଘଟିଛି ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ଥାନା ଅଧିନ ଡଙ୍ଗରିଗୁଡା ଗ୍ରାମରେ । ଜଣେ ବିବାହିତା ମହିଳାଙ୍କ ସନ୍ଦେହ ଜନକ ଭାବରେ ମୃତ୍ୟୁ ହୋଇଥିବା ନେଇ ମୃତକାଙ୍କ ବାପା ନନ୍ଦ ପୂଜାରୀ ଚନ୍ଦାହାଣ୍ଡି ଥାନାରେ ଏତଲା ଦେଇଛନ୍ତି । ମୃତକା ପ୍ରେମଶିଲା ମାଝି (୨୪) । ଅନ୍ୟପଟେ ନିଜ ପିନ୍ଧା ଲୁଗା ପଣତରେ ଛାତର ଫ୍ୟାନ ହୁକରେ ଆତ୍ମହତ୍ୟା କରିଥିବା ନେଇ ମୃତକାର ସ୍ୱାମୀ ଧର୍ମୁ ମାଝି (୨୭)ଏତଲା ଦେଇଥିବା ନେଇ ଚନ୍ଦାହାଣ୍ଡି ଥାନା ଅଧିକାରୀ ପ୍ରଶାନ୍ତ କୁମାର କୋଲର୍ସ ଗଣମାଧ୍ୟମକୁ ପ୍ରକାଶ କରିଛନ୍ତି । 

ସୂଚନା ଅନୁସାରେ, ପଟଖଲିଆ ପଞ୍ଚାୟତ ଅଧିନ ଧୂରୁଆପଡା ଗ୍ରାମର ନନ୍ଦ ପୂଜାରୀଙ୍କ ଝିଅ ପ୍ରେମଶିଲା ୪ବର୍ଷ ତଳେ ଡଙ୍ଗରିଗୁଡା ଗ୍ରାମର ଧର୍ମୁ ମାଝିଙ୍କୁ ବୈଦିକ ରୀତିରେ ବିବାହ କରିଥିଲେ l ସ୍ୱାମୀ ସ୍ତ୍ରୀ ଦୁହେଁ ବେଶ ହସ ଖୁସିରେ ରହିବା ସହ ତାଙ୍କର ଏକ ୩ବର୍ଷର ଶିଶୁ କନ୍ୟା ଟିଏ ରହିଛି l ସବୁଦିନ ପରି   ମଙ୍ଗଳବାର ସନ୍ଧ୍ୟାରେ ରୋଷେଇ କାମ ସାରି ନିଜ ଛୋଟ ଝିଅ ସହ ପ୍ରେମଶିଲା ଘରେ ଥିଲେ l ସ୍ୱାମୀ ବାହାରକୁ ବୁଲିବାକୁ ଯାଇଥିଲେ l ପରେ ୭ଟା ସମୟରେ ସ୍ୱାମୀ ଘରକୁ ଆସି ଦେଖିଥିଲେ ତ ପ୍ରେମଶିଲା ଆତ୍ମହତ୍ୟା କରିଛନ୍ତି । ଏ ନେଇ ବାହାର ଲୋକଙ୍କୁ କହିବା ସହ ଶ୍ବଶୁର ଘରକୁ ଫୋନରେ କହିବା ପରେ ପ୍ରେମଶିଲାର ବାପା ଭାଇ ରାତିରେ ଡ଼ଙ୍ଗରୀଗୁଡା  ଯାଇଥିଲେ । ଝିଅର ଶବ ଝୁଲନ୍ତା ଅବସ୍ଥାରେ ନ ରହି ବାରଣ୍ଡାରେ ପଡ଼ିଥିବାରୁ ଝିଅର ଆତ୍ମହତ୍ୟାକୁ ନେଇ ସନ୍ଦେହ ହୋଇଥିଲା l ଏହାକୁ ନେଇ ସେ ଥାନାରେ ଲିଖିତ ଅଭିଯୋଗ ଦେବା ପରେ ଏଏସଆଇ ଦିଲୀପ ବାରିକ, ଲାବଣ୍ୟ ବେମାଲ ଘଟଣାସ୍ଥଳକୁ ଯାଇ ଶବ ଜବତ କରିବା ସହ ମାଜିଷ୍ଟେଟ ସହଦେବ କୁଟ୍ରୁକାଙ୍କ ଉପସ୍ଥିତିରେ ଶବ ଉଠାଇ ବ୍ୟବଚ୍ଛେଦ ପାଇଁ ପଠାଇଥିଲେ l ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି । ଚନ୍ଦାହାଣ୍ଡି ଥାନା ପୋଲିସ କେଶ ନଂ ୪/୨୪ରେ ଏକ ଅପମୃତ୍ୟୁ ମାମଲା ରୁଜ୍ଜୁ କରି ମୃତକାଙ୍କ ସ୍ୱାମୀ ଧର୍ମୁ ମାଝିଙ୍କୁ ଥାନାରେ ଅଟକ ରଖି ପଚରାଉଚୁରା କରୁଛି ।  ଶବ ବ୍ୟବଚ୍ଛେଦ ରିପୋର୍ଟ ହସ୍ତଗତ ହେବା ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ତଦନ୍ତ ଅଫିସର ଦିଲୀପ ବାରିକ ପ୍ରକାଶ କରିଛନ୍ତି l