ରିଆମାଳ, ୨୩/୧୧ : ଅଳିଆ ଗଦାରେ ନିଆଁ ଲଗାଇବା ବେଳେ ଜଳିଗଲେ ମହିଳା। ଦେବଗଡ଼ ଜିଲ୍ଲା ରିଆମାଳ ବ୍ଲକ ମଲେହିପଡା ପଞ୍ଚାୟତ ହରିହରପୁର ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି। ଶନିବାର ସକାଳେ ଜଣେ ମହିଳା ନିଆଁରେ ପୋଡ଼ିହୋଇ ଗୁରୁତର ହୋଇଛନ୍ତି।
ସୂଚନାନୁଯାୟୀ, ହରିହରପୁର ଗ୍ରାମର ସ୍ୱର୍ଗତ ଗଗନ ବିହାରୀ ସାହୁଙ୍କ ସ୍ତ୍ରୀ ସାଧବାଣୀ ସାହୁ (୬୧ ବର୍ଷ) ଶନିବାର ସକାଳେ ଘର ପାଖରେ ଥିବା ଅଳିଆ ଗଦାରେ ନିଆଁ ଲଗାଉଥିଲେ। ଅସାବଧାନତାବଶତଃ ତାଙ୍କ ଶାଢୀରେ ନିଆଁ ଲାଗି ଯାଇଥିଲା। ଫଳରେ ତାଙ୍କର ଦୁଇ ଜଙ୍ଘ ସହ ଶରୀରର ଅନ୍ୟ ଭାଗ ପୋଡି ଯାଇଥିଲା। ପରିବାର ଲୋକେ ତାଙ୍କୁ ଦେବଗଡ଼ ଡାକ୍ତରଖାନାରେ ଭର୍ତ୍ତି କରିଛନ୍ତି। ସାଧବାଣୀଙ୍କର ଚିକିତ୍ସା ଚାଲିଛି।
