ରିଆମାଳ, ୦୩/୧୨ : ଦେବଗଡ଼ ଜିଲ୍ଲା ରିଆମାଳ ଥାନା ନାଉଲିପଡା ପଞ୍ଚାୟତ ବାଲିଜୁରୀରେ ବିଦେଶୀ ମଦ କାରଖାନା ଠାବ। ୧୦୫ ଲିଟର ମଦ ଜବତ କରିବା ସହ ୩ ଜଣଙ୍କୁ ଗିରଫ କଲା ରିଆମାଳ ପୋଲିସ। 

ସୂଚନାନୁଯାୟୀ, ରିଆମାଳ ଥାନା ନାଉଲିପଡା ପଞ୍ଚାୟତ ବାଲିଜୁରୀରେ ବିଦେଶୀ ମଦ କାରଖାନା ଚାଲିଥିବା ନେଇ ପୋଲିସକୁ ଖବର ମିଳିଥିଲା। ସୋମବାର ରିଆମାଳ ପୋଲିସ ବାଲିଜୁରୀର ଶ୍ରୀଧର ପ୍ରଧାନଙ୍କ ଘରେ ଚଢାଉ କରି ୧୦୫ ଲିଟର ନକଲି ମଦ ଏବଂ ଏକ ଗାଡି ଜବତ କରିଥିଲା। ଏହା ସହ ୩ ଅଭିଯୁକ୍ତଙ୍କୁ ପୋଲିସ ଗିରଫ କରିଥିଲା। ଗିରଫ ହୋଇଥିବା ଅଭିଯୁକ୍ତମାନେ ହେଲେ ଶ୍ରୀଧର ପ୍ରଧାନ, ଭିତରପଦ ଗ୍ରାମର ପ୍ରଶାନ୍ତ ସୁନା (୪୪ ବର୍ଷ) ଏବଂ ଗାଡି ଡ୍ରାଇଭର ଫୁଲସରନାଲି ଗ୍ରାମର ତପନ ସାହୁ। ଆଜି ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି। ରାଉରକେଲାରୁ ସ୍ପିରିଟ୍ ଏବଂ ବିଭିନ୍ନ ସ୍ଥାନରୁ ଖୋଲା ମଦ ବୋତଲ ଆଣି ବାଲିଜୁରୀରେ ମଦ ତିଆରି କରି ବିଭିନ୍ନ ସ୍ଥାନରେ ବିକ୍ରି କରାଯାଉଥିବା ଜଣାପଡ଼ିଛି।