ଭୁବନେଶ୍ବର,୦୪/୧୨: ଗତକାଲି ଭୁବନେଶ୍ବରରେ ପହଞ୍ଚିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ବାୟୁସେନାର ବିମାନରେ ଆସି ଅପରାହ୍ନ ସାଢ଼େ ୪ଟାରେ ବିମାନବନ୍ଦରରେ ଓହ୍ଲାଇଥିଲେ। ଏହାପରେ ସେ ବିମାନବନ୍ଦରରୁ ସିଧା ନୀଳାଦ୍ରିବିହାରକୁ ଯାଇ ସେଠାରେ ଥିବା ପଣ୍ଡିତ ରଘୁନାଥ ମୁର୍ମୁଙ୍କ ପ୍ରତିମୂର୍ତ୍ତିକୁ ଉନ୍ମୋଚନ କରିଥିଲେ । ଏହାପରେ ଆଦିବାସୀଙ୍କ ପୂଜାସ୍ଥଳୀ ‘ଆଦିମ ଅୱାର ଜାର୍ପା ଜାହେର’କୁ ଯାଇ ଦର୍ଶନ କରିଛନ୍ତି । ବିମାନବନ୍ଦରରେ ପହଞ୍ଚିବା ପରେ ରାଜ୍ୟପାଳ ରଘୁବର ଦାସ, ମୁଖ୍ୟମନ୍ତ୍ରୀ ମୋହନ ଚରଣ ମାଝି, ମୁଖ୍ୟ ଶାସନ ସଚିବ ମନୋଜ ଆହୁଜା ଓ ମେୟର ସୁଲୋଚନା ଦାସ ରାଷ୍ଟ୍ରପତିଙ୍କୁ ସ୍ୱାଗତ କରିଥିଲେ । ୫ ଦିନିଆ ଓଡ଼ିଶା ଗସ୍ତରେ ଆସିଥିବା ରାଷ୍ଟ୍ରପତି ୭ ତାରିଖ ଯାଏ ଓଡ଼ିଶାରେ ରହିବେ । ବୁଧବାର ସକାଳ ୯ଟା ୨୦ରେ ସେ ଭୁବନେଶ୍ୱରରୁ ପୁରୀ ଅଭିମୁଖେ ବାହାରିବେ । ପୁରୀ ତାଳବଣିଆ ହେଲିପ୍ୟାଡ୍ରେ ତାଙ୍କ ବିମାନ ଅବତରଣ କରିବ । ସେଠାରୁ ସିଧା ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରିବେ । ଏହାପରେ ଗୋପବନ୍ଧୁ ଆୟୁର୍ବେଦ ମହାବିଦ୍ୟାଳୟର ୭୫ତମ ବାର୍ଷିକ ଉତ୍ସବରେ ଯୋଗ ଦେବେ । କାର୍ଯ୍ୟକ୍ରମ ସାରି ସେ ପୁରୀ ରାଜଭବନକୁ ଫେରି ବିଶ୍ରାମ ନେବେ ।
ଅପରାହ୍ନରେ ବ୍ଲୁ ଫ୍ଲାଗ୍ ବେଳାଭୂମିକୁ ଯାଇ ନୌସେନା ଦିବସ ସମାରୋହରେ ମୁଖ୍ୟ ଅତିଥି ଭାବେ ସାମିଲ ହେବେ । ସେଠାରେ ନୌସେନାର ସମରାଭ୍ୟାସ ଦେଖିବେ । ୫ ତାରିଖରେ ସେ ପୁଣି ଭୁବନେଶ୍ୱର ଫେରିବେ । ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ(ଓୟୁଏଟି) ର ୪୦ତମ ସମାବର୍ତ୍ତନ ଉତ୍ସବରେ ଯୋଗ ଦେବେ । ସେଦିନ ଭୁବନେଶ୍ୱର କୋର୍ଟ ଲାଗି ତିଆରି ହୋଇଥିବା ଜୁଡିସିଆଲ୍ କମ୍ପେ୍ଲକ୍ସକୁ ଉଦ୍ଘାଟନ କରିବେ । ୬ ତାରିଖରେ ରାଷ୍ଟ୍ରପତି ମୟୂରଭଞ୍ଜ ଯିବେ । ନିଜ ଜନ୍ମସ୍ଥାନ ଉପରବେଡ଼ା ଗାଁରେ ଛାତ୍ରଛାତ୍ରୀ ଓ ଗାଁ ଲୋକଙ୍କ ସହ କଥା ହେବେ । ପରେ ରାଇରଙ୍ଗପୁର ମହିଳା ମହାବିଦ୍ୟାଳୟର ଛାତ୍ରଛାତ୍ରୀ ଓ ଶିକ୍ଷୟିତ୍ରୀଙ୍କ ସହ ମତ ବିନିମୟ କରିବେ । ୭ ତାରିଖରେ ରାଷ୍ଟ୍ରପତି ବାଙ୍ଗିରିପୋଷି-ଗୋରୁମହିଷାଣୀ, ବୁରମରାଚକୁଳିଆ ଏବଂ ବାଦାମପାହାଡ଼-କେନ୍ଦୁଝରଗଡ଼ ରେଳ ଲାଇନ୍, ଆଦିବାସୀ ଗବେଷଣା ଓ ବିକାଶ କେନ୍ଦ୍ର, ରାଇରଙ୍ଗପୁର- ଦାଣ୍ଡବୋଷ ଏୟାରଷ୍ଟ୍ରିପ୍ ଓ ରାଇରଙ୍ଗପୁର ଉପଖଣ୍ଡ ଚିକିତ୍ସାଳୟ ସମେତ ବିଭିନ୍ନ ପ୍ରକଳ୍ପର ଶିଳାନ୍ୟାସ ଓ ଉଦ୍ଘାଟନ କରିବେ ।
