ମାଲକାନଗିରି,୨୦/୬ : ମାଲକାନଗିରି ଏସପି ନୀତେଶ ୱାଧାନୀ ଙ୍କ ନିକଟରେ ଛତିଶଗଡ଼ ବସ୍ତର ମାଓ ଡିଭିଜନର ୩ ମାଓବାଦୀ ମିଲିସିଆ ସଦସ୍ୟ ଆତ୍ମସମର୍ପଣ  କରିଛନ୍ତି। ମାଲକାନଗିରି ଏସପି ଏକ ପ୍ରେସ ବିଜ୍ଞପ୍ତି ମାଧ୍ୟମରେ ସୂଚନା ଦେଇଛନ୍ତି। ବସ୍ତର ମାଓଡ଼ିଭିଜନର ତିନି ଜଣ ମିଲିସିଆ ସଦସ୍ୟ ମାଲକାନଗିରି ଜିଲ୍ଲା ପୁଲିସ କାର୍ଯ୍ୟାଳୟ ଠାରେ ଆତ୍ମସମର୍ପଣ କରିଛନ୍ତି । ଏମାନେ ସମସ୍ତେ ହେଉଛନ୍ତି ଛତିଶଗଡ ଦକ୍ଷିଣ ବସ୍ତର ମାଓ ସଂଗଠନର ସଦସ୍ୟ ବୋଲି ଜଣାପଡିଛି। 

ଛତିଶଗଡରେ ଏବେ ସୁରକ୍ଷାକର୍ମୀଙ୍କ ପକ୍ଷରୁ ଯୋରଦାର ଅପରେସନ କରାଯାଇଥିବା ବେଳେ ଭୟଭୀତ ହୋଇ ଏମାନେ ମାଲକାନଗିରି ପୁଲିସ ପାଖରେ ଆତ୍ମସମର୍ପଣ କରିଛନ୍ତି ।ଆତ୍ମସମର୍ପଣ କରିଥିବା ତିନି ଜଣ ମିଲିସିଆ ମାଓବାଦୀ ହେଉଛନ୍ତି ଦେବା ମାଡଭି, ଆଡମା ମାଡକାମି ଓ ମୁକା ସୋଡି । ତିନି ଜଣଙ୍କ ଘର ଛତିଶଗଡ ସୁକୁମା ଜିଲ୍ଲାର ଚିନ୍ତାଗୁମ୍ଫା ଅଞ୍ଚଳରେ ବୋଲି ଜଣାପଡ଼ିଛି। ଛତିଶଗଡ ଏବଂ ଆନ୍ଧ୍ର କ୍ୟାଡରର ନିର୍ଯାତନା ମୂଳକ ଆଚରଣ ଯୋଗୁଁ ସକ୍ରିୟ ମାଓବାଦୀ କ୍ୟାଡର ମାନେ   ମଧ୍ୟ ଆତ୍ମସମର୍ପଣ କରି ସମାଜର ମୁଖ୍ୟ ସ୍ରୋତରେ ଯୋଗଦେବାକୁ ଇଛୁକ। କିନ୍ତୁ ସେମାନଙ୍କୁ ଦଣ୍ଡକାରଣ୍ୟ ଦକ୍ଷିଣାଞ୍ଚଳଜୋନ ଓ ଆନ୍ଧ୍ର ଓଡିଶା ବୋର୍ଡର ଜୋନ  ର ବରିଷ୍ଠ ମାଓବାଦୀ ନେତାମାନେ ଆତ୍ମସମର୍ପଣ କରିବାକୁ ଅନୁମତି ଦେଉ ନାହାଁନ୍ତି ଏବଂ ସେମାନଙ୍କ ପରିବାର ସଦସ୍ୟଙ୍କୁ ହତ୍ୟା କରିବାକୁ ଧମକ ଦେଉଥିବା ପୋଲିସ ଆଗରେ ପ୍ରକାଶ କରିଛନ୍ତି। ଆତ୍ମସମର୍ପଣ ପରେ ଏମାନଙ୍କୁ ଓଡ଼ିଶା ସରକାରଙ୍କ ନିୟମ ଅନୁଯାୟୀ ଥଇଥାନ କରାଯିବ ବୋଲି ମାଲକାନଗିରି ଏସପି ୱାଧାନୀ ସୂଚନା ଦେଇଛନ୍ତି।