ମାଲକାନଗିରି,୨୪/୯ (ଆପ୍ର) : ଚଳିତ ଖରିଫ ଧାନମଣ୍ଡି ରେ ପ୍ରାୟ ୩୭ହଜାରରୁ ଊର୍ଦ୍ଧ୍ବ ଚାଷୀଙ୍କଠାରୁ ଧାନ କ୍ରୟ କରିବାକୁ ଲକ୍ଷ୍ୟ ରହିଛି। ୨୪୨୪୮ ଜଣ ଚାଷୀଙ୍କୁ ଚଳିତ ଖରିଫ ଚାଷ ପାଇଁ ଲ୍ୟାମ୍ପସ ପକ୍ଷରୁ କୃଷି ଋଣ ଯୋଗାଇ ଦିଆ ଯାଇଛି।
ସୂଚନା ଅନୁସାରେ, ଖରିଫ୍ ଧାନ ଜିଲ୍ଲାର ୮ ଲ୍ୟାମ୍ପସ୍, ୫ଟି ମହିଳା ସ୍ୱୟଂ ସହାୟକଙ୍କ ଦ୍ୱାରା ଚଳିତ ବର୍ଷ ଧାନ ସଂଗ୍ରହ କରାଯିବ।ଚଳିତ ବର୍ଷ ସରକାର ଚାଷୀଙ୍କ ପାଇଁ ନୂଆ ନିୟମ ପ୍ରଣୟନ କରି ନାମ ପଞ୍ଜିକରଣକୁ ସରଳ କରିଥିବା ବେଳେ ଆଧାର କାର୍ଡ, ମୋବାଇଲ ନମ୍ବର ଦେବାକୁ କୁହାଯାଇଛି। ପୂର୍ବରୁ କେବଳ ଲ୍ୟାମ୍ପସଗୁଡିକରେ ନାମ ପଞ୍ଜିକରଣ ହେଉଥିଲା। ତେବେ ଚଳିତ ବର୍ଷ ଚାଷୀମାନେ ଲ୍ୟାମ୍ପସ ସହ ନିୟନ୍ତ୍ରିତ ବଜାର କମିଟି, କୃଷି ସମବାୟ ସମିତି କାର୍ଯ୍ୟାଳୟଗୁଡିକରୁ ଆବଶ୍ୟକୀୟ ଫର୍ମ ସଂଗ୍ରହ କରି ନାମ ପଞ୍ଜିକରଣ ବ୍ୟବସ୍ଥା କରାଯାଇଛି। ନାମ ପଞ୍ଜିକରଣ ବେଳେ ଚାଷୀ ନିଜର ବ୍ୟାଙ୍କ ପାସ୍ବୁକ, ଚାଷ ଜମିର ଦଲିଲ ଦେବାକୁ ଚାଷୀଙ୍କୁ ସଚେତନ କରାଯାଉଛି । ଗତ ବର୍ଷ ନାମ ପଜିଂକରଣ କରିଥିବା ଚାଷୀମାନେ ପୁଣିଥରେ ନୂଆ ଫର୍ମ ନେଇ ପୂରଣ କରି ପଇଠ କରିବାକୁ କୁହାଯାଇଛି। ଗତ ବର୍ଷ ଜିଲ୍ଲାର ୮ଟି ଲ୍ୟାମ୍ପସରେ ୪୦ ହଜାରରୁ ଉର୍ଦ୍ଧ ଜଣ ଚାଷୀଙ୍କ ନାମ ପଞ୍ଜିକରଣ କରିଥିଲେ। ଚଳିତ ବର୍ଷ ଏପର୍ଯ୍ୟନ୍ତ ୩୮୨୫୭ ଜଣ ଚାଷୀ ନାମ ପଞ୍ଜିକରଣ କରିଛନ୍ତି। ସେମାନଙ୍କ ମଧ୍ୟରୁ ଏବେ ସୁଦ୍ଧା ୩୭୬୨୩ ଜଣ ଚାଷୀ ଯୋଗ୍ୟ ବିବେଚିତ ହୋଇଛନ୍ତି। ସରକାରୀ ଜମିରେ ଚାଷ କରିଥିବା କିଛି ନକଲି ଚାଷୀଙ୍କ ନାମ କଟିବାର ସମ୍ଭାବନା ରହିଛି ।
ଜିଲ୍ଲାରେ ୮ଟି ଲ୍ୟାମ୍ପସ ରୁ ଚାଷୀଙ୍କୁ କୃଷି ଋଣ ଯୋଗାଇ ଦିଆଯାଇଛି। ସମସ୍ତ ଧାନ ମଣ୍ଡି ଗୁଡିକରେ ଚାଷୀଙ୍କ ପାଇଁ ନିୟନ୍ତ୍ରିତ ବଜାର କମିଟି ପକ୍ଷରୁ ସମସ୍ତ ପ୍ରକାର ସୁବିଧା କରାଯାଇଛି ବୋଲି ଏଆରସିଏସ ବିକାଶ କୁମାର ନାୟକ ସୂଚନା ଦେଇଛନ୍ତି।
