ନୂଆଦିଲ୍ଲୀ: ସନ୍ଦେଶଖାଲି ମାମଲାରେ ମମତା ସରକାରଙ୍କୁ ଝଟକା ଦେଇଛନ୍ତି ସୁପ୍ରିମକୋର୍ଟ । ସିବିଆଇ ତଦନ୍ତ ବିରୋଧରେ ରାଜ୍ୟ ସରକାରଙ୍କ ଆବେଦନ ଖାରଜ କରିଛନ୍ତି ସର୍ବୋଚ୍ଚ ଅଦାଲତ । ଶୁଣାଣି ସମୟରେ ଆବେଦନ ଉପରେ ଆପତ୍ତି ଉଠାଇବା ସହ ଏହି ମାମଲାରେ ରାଜ୍ୟ ସରକାରଙ୍କ ଏତେ ଉତ୍କଣ୍ଠା କାହିଁକି ? ମାମଲାରେ ରାଜ୍ୟ ସରକାର କାହାକୁ ରକ୍ଷା କରିବାକୁ ଚାହୁଁଛନ୍ତି ବୋଲି ସୁପ୍ରିମକୋର୍ଟ ପ୍ରଶ୍ନ କରିଛନ୍ତି ।
ଏହା ପୂର୍ବରୁ ଏପ୍ରିଲ ୨୯ରେ ଏହି ମାମଲାର ଶୁଣାଣି ସୁପ୍ରିମକୋର୍ଟରେ ହୋଇଥିଲା । କୋଲକାତା ହାଇକୋର୍ଟଙ୍କ ରାୟ ଉପରେ ରୋକ ଲଗାଇବକୁ ସୁପ୍ରିମକୋର୍ଟ ମନା କରିଥିଲେ । କୌଣସି ବ୍ୟକ୍ତିଙ୍କ ହିତ ପାଇଁ ରାଜ୍ୟ ସରକାର କିଭଳି ସୁପ୍ରିମକୋର୍ଟଙ୍କ ପାଖକୁ ଆସୁଛନ୍ତି ବୋଲି ସର୍ବୋଚ୍ଚ ଅଦାଲତ ପ୍ରଶ୍ନ କରିଥିଲେ । ଏହା ପରେ ଗ୍ରୀଷ୍ମ ଛୁଟି ପରେ ମାମଲାର ଶୁଣାଣି କରାଯିବ ବୋଲି ଶୀର୍ଷ କୋର୍ଟ କହିଥିଲେ ।
ସନ୍ଦେଶଖାଲିରେ ଜମି ହଡ଼ପ ଏବଂ ଯୌନ ଉତ୍ପୀଡନ ମାମଲାରେ ସିବିଆଇ ତଦନ୍ତ ବିରୋଧରେ ପଶ୍ଚିମବଙ୍ଗ ସରକାର ସୁପ୍ରିମକୋର୍ଟରେ ଆବେଦନ କରିଥିଲେ । କୋଲକାତା ହାଇକୋର୍ଟ ସିବିଆଇ ତଦନ୍ତ ଲାଗି ନିର୍ଦ୍ଦେଶ ଦେଇଥିଲେ । ସୂଚନାଯୋଗ୍ୟ, ରାସନ ଦୁର୍ନୀତି ମାମଲାରେ ଇଡି ଟିମ୍ ସନ୍ଦେଶଖାଲି ଯାଇଥିଲା । ସେଠାରେ ଶତାଧିକ ଲୋକେ ଟିମ୍ ଉପରେ ଆକ୍ରମଣ କରିଥିଲେ । ଏହାର ୫୫ ଦିନ ପରେ ମାମଲାର ଅଭିଯୁକ୍ତ ଶାହାଜାହାଁକୁ ଗିରଫ କରାଯାଇଥିଲା । ଶାହାଜାହାଁ ଶେଖ ବିରୋଧରେ ହତ୍ୟା, ମହିଳାଙ୍କୁ ଯୌନ ଉତ୍ପୀଡନ, ଜମି ହଡ଼ପ ଏବଂ ଇଡି ଟିମ୍ ଉପରେ ଆକ୍ରମଣ ଭଳି ସଂଙ୍ଗୀନ ଅଭିଯୋଗ ରହିଛି ।