ସୁକମା, ୦୯/୦୧ : ଯବାନଙ୍କ ଗାଡିକୁ ଟାର୍ଗେଟ୍ କରି ଆଇଡି ବିସ୍ଫୋରଣ ଘଟଣା। ପ୍ରତିଶୋଧ ନେଲା ସେନା। ଛତିଶଗଡ଼ ସୁକମା ଜିଲ୍ଲାରେ ଏନକାଉଣ୍ଟର। ଯବାନଙ୍କ ଗୁଳିରେ ଟଳିଲେ ୩ ନକ୍ସଲ। ଏନକାଉଣ୍ଟର ବେଳେ ଆହୁରି ଅଧିକ ମାଓବାଦୀ ପ୍ରାଣ ହରାଇଥିବା ଆଶଙ୍କା କରାଯାଉଛି। ଘଟଣାସ୍ଥଳରେ ସର୍ଚ୍ଚ ଅପରେସନ ଜାରି ରହିଛି। ଏନେଇ ସୁକମା ଏସପି କିରଣ ଚୌହ୍ଵାନ ସୂଚନା ଦେଇଛନ୍ତି।
ସୂଚନାନୁଯାୟୀ, ସୁକମା ଏବଂ ବିଜାପୁର ସୀମାବର୍ତ୍ତୀ ଅଞ୍ଚଳରେ ସୁକମା ପୋଲିସ, କୋବ୍ରା, ଡିଆରଜି ବାହିନୀ ଏବଂ ଏସଟିଏଫ୍ ପକ୍ଷରୁ କମ୍ଵିଂ ଅପରେସନ କରାଯାଇଥିଲା। ଏହ ସମୟରେ ନକ୍ସଲମାନେ ସୁରକ୍ଷା ବାହିନୀ ଉପରକୁ ଗୁଳି ଚଳାଇଥିଲେ। ସୁରକ୍ଷା ବାହିନୀ ଏହାର ପ୍ରତିଜବାବ ଦେଇଥିଲେ। ଯବାନଙ୍କ ଗୁଳିରେ ୩ ଜଣ ନକ୍ସଲ ନିପାତ ହୋଇଛନ୍ତି। ଆହୁରି ଅଧିକ ନକ୍ସଲ ମରିଥିବା ଅନୁମାନ କରାଯାଉଛି। ଘଟଣାସ୍ଥଳରେ ସର୍ଚ୍ଚ ଅପରେସନ ଜାରି ରହିଛି।
ପ୍ରକାଶ ଥାଉକି, ଜାନୁଆରୀ ୬ ତାରିଖ ଦିନ ଯବାନମାନେ ଜଏଣ୍ଟ ଅପରେସନ କରି କ୍ୟାମ୍ପକୁ ଫେରୁଥିଲେ। ପାଖାପାଖି ସାଢେ ୨ଟା ବେଳେ ବିଜାପୁର ଜିଲ୍ଲା କୁଟରୁ ଥାନା ଅନ୍ତର୍ଗତ ଅମ୍ଵେଲି ଗାଁ ନିକଟରେ ନକ୍ସଲମାନେ ଯବାନଙ୍କ ଗାଡିକୁ ଟାର୍ଗେଟ୍ କରି ଆଇଡି ବିସ୍ଫୋରଣ କରିଥିଲେ। ଏହି ଆକ୍ରମଣରେ ଦନ୍ତେୱାଡା ଡିଆରଜି ବାହିନୀର ୮ ଜଣ ଯବାନଙ୍କ ସମେତ ଜଣେ ଡ୍ରାଇଭର୍ ଶହୀଦ ହୋଇଥିଲେ। ଏହି ଘଟଣା ପରେ ଛତିଶଗଡ଼ ମୁଖ୍ୟମନ୍ତ୍ରୀ ନକ୍ସଲଙ୍କୁ କଡ଼ା ଚେତାବନୀ ଦେଇଥିଲେ। ସେ କହିଥିଲେ ଯେ, ବୀର ଯବାନଙ୍କ ପ୍ରାଣ ବଳି ବ୍ୟର୍ଥ ଯିବ ନାହିଁ। ଆମ ସରକାର ନକ୍ସଲବାଦର ମୂଳପୋଛ କରିବାକୁ ପ୍ରତିବଦ୍ଧ।
