ବୌଦ୍ଧ,୩୦/୦୮: ମର୍ଯାକୁଦ ବ୍ରିଜରୁ ମହାନଦୀକୁ ଡେଇଁଲେ ନବମ ଶ୍ରେଣୀ ଛାତ୍ରୀ । ବ୍ରିଜ ଉପରେ ସ୍କୁଲ ବ୍ୟାଗ, ସାଇକେଲ ଓ ଚପଲ ରଖି ମହାନଦୀକୁ ଡେଇଁଲେ । ପରେ ଶିଶୁ ମନ୍ଦିର ସ୍କୁଲ ନିକଟରୁ ଛାତ୍ରୀଙ୍କୁ ଉଦ୍ଧାର କଲେ ଅଗ୍ନିଶମ ବାହିନୀ ଏବଂ ସ୍ଥାନୀୟଲୋକେ । ଆତ୍ମହତ୍ୟା ଉଦ୍ୟମର କାରଣ ଅସ୍ପଷ୍ଟ ରହିଥିବା ବେଳେ ବୌଦ୍ଧ ଜିଲ୍ଲାର ଆଦର୍ଶ ଥାନା ଅନ୍ତର୍ଗତ ମର୍ଯାକୁଦ ବ୍ରିଜ ଉପରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ବୌଦ୍ଧ ସହର ବ୍ରାହ୍ମଣ ସାହିର ବିଜୟ ବଗର୍ତ୍ତିଙ୍କ ନାବାଳିକା ଝିଅ ବୌଦ୍ଧ ଶିଶୁ ମନ୍ଦିର ସ୍କୁଲରେ ନବମ ଶ୍ରେଣୀରେ ପାଠ ପଢନ୍ତି । ଶୁକ୍ରବାର ସକାଳୁ ସେ ସ୍କୁଲ ଯିବାକୁ ସାଇକେଲ ନେଇ ଘରୁ ବାହାରିଥିଲେ । ସ୍କୁଲକୁ ଯିବା ସମୟରେ ସେ ମର୍ଯାକୁଦ ବ୍ରିଜ ଉପର ଦେଇ ଯାଇଥିଲେ । ଏହି ସମୟରେ ମର୍ଯାକୁଦ ସେତୁ ଉପରେ ବ୍ୟାଗ୍, ସାଇକେଲ ଏବଂ ଚପଲ ରଖି ମହାନଦୀକୁ ଡେଇଁ ପଡ଼ିଥିଲେ । ଏହି ଘଟଣାକୁ ନଦୀରେ ଶୌଚ କରୁଥିବା କିଛି ଲୋକ ଦେଖିବାକୁ ପାଇଥିଲେ । ଏହା ଦେଖି ସ୍ଥାନୀୟଲୋକେ ନାବାଳିକାକୁ ଉଦ୍ଧାର କରିବାକୁ ପ୍ରୟାସ କରିଥିଲେ ମଧ୍ୟ ବିଫଳ ହୋଇଥିଲେ । ପରେ ତୁରନ୍ତ ଅଗ୍ନିଶମ ବାହିନୀ ଏବଂ ପେଲିସକୁ ଘଟଣା ବିଷୟରେ ଖବର ଦେଇଥିଲେ । ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ବୋଟ୍‌ ଯୋଗେ ନାବାଳିକାକୁ ଉଦ୍ଧାର କରିଛି । ସେଠାରୁ ତାଙ୍କୁ ଉଦ୍ଧାର କରି ବୌଦ୍ଧ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିବା ବେଳେ ସେଠାରେ ତାଙ୍କର ଚିକିତ୍ସା ଜାରି ରହିଛି । ସେପଟେ କେଉଁ କାରଣରୁ ଛାତ୍ରୀ ଜଣକ ଆତ୍ମହତ୍ୟା କରିବାକୁ ଉଦ୍ୟମ କରିଥିଲେ ସେ ନେଇ କୌଣସି ସ୍ପଷ୍ଟ ସୂଚନା ମିଳି ପାରିନାହିଁ । ତେବେ ଖବର ପାଇ ଘଟଣା ସ୍ଥଳରେ ଆଦର୍ଶ ଥାନା ପୋଲିସ ପହଞ୍ଚି ଘଟଣାର ତଦନ୍ତ ଜାରି ରଖିଛି । ଏଥି ସହିତ ନାବାଳିକାଙ୍କ ବାପା ମାଙ୍କୁ ମଧ୍ୟ ପଚରାଉଚରା ଜାରି ରଖିଛି ପୋଲିସ ।