ବୌଦ୍ଧ,୧୬/୦୯: ରାସ୍ତାରେ ବାଟୋଇଙ୍କୁ ଧକ୍କା ଦେଇ ଗଛକୁ ପିଟିଲା ପିକ୍ଅପ୍ ଭ୍ୟାନ୍ । ରାସ୍ତା ତଳେ ଚାଷ ଜମିରେ ଓଲଟି ଚୂରମାର ହେଲା ଗାଡ଼ି । ଏହି ଦୁର୍ଘଟଣାରେ ୩ ଜଣଙ୍କ ଅବସ୍ଥା ସଙ୍କଟାପନ୍ନ ହୋଇଥିବାବେଳେ ୬ ଜଣ ଗୁରୁତର ହୋଇଛନ୍ତି । ୫୭ ନମ୍ୱର ଜାତୀୟ ରାଜପଥ ବୁରକଟା ନିକଟରେ ଏହି ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି ।
ସୂଚନା ମୁତାବକ, ଗଞ୍ଜାମ ହିଞ୍ଜିଳି ଅଞ୍ଚଳରୁ ଇଲେକ୍ଟ୍ରି କାର୍ଯ୍ୟ ପାଇଁ ୭ଜଣ ଶ୍ରମିକଙ୍କୁ ନେଇ ଏକ ପିକ୍ଅପ୍ ଭ୍ୟାନ୍ ସୋନପୁର ଯାଉଥିଲା । ବୁରକଟା ଅଞ୍ଚଳରେ ଡ୍ରାଇଭରର ଆଖି ଲାଗି ଯିବାରୁ ଗାଡ଼ିଟି ବାମ ପାର୍ଶ୍ଵରେ ଜଣେ ବାଟୋଇକୁ ଧକ୍କା ଦେଇ ଏକ ଗଛରେ ପିଟି ହୋଇଥିଲା । ଗଛରେ ପିଟି ହୋଇ ରାସ୍ତା କଡ଼ ଚାଷ ଜମିରେ ଓଲଟି ପଡ଼ିଥିଲା ଗାଡ଼ି । ଯାହା ଫଳରେ ଗାଡ଼ିଟି ସମ୍ପୂର୍ଣ ଭାବେ ଚୂରମାର ହୋଇ ଯାଇଥିବା ବେଳେ ଡ୍ରାଇଭର ସମେତ ୭ ଜଣ ଶ୍ରମିକ ଓ ଜଣେ ବାଟୋଇ ଗୁରୁତର ହୋଇଛନ୍ତି । ଏହା ଦେଖି ସ୍ଥାନୀୟଲୋକେ ତୁରନ୍ତ ୧୦୮ ଆମ୍ବୁଲାନ୍ସକୁ ଡାକିବା ସହ ପୋଲିସକୁ ମଧ୍ୟ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଆହତଙ୍କୁ ବୌଦ୍ଧ ମୁଖ୍ୟ ଚିକିତ୍ସାଳୟରେ ଚିକିତ୍ସା ପାଇଁ ଭର୍ତ୍ତି କରାଇଛି । ତେବେ ୩ ଜଣଙ୍କ ଅବସ୍ଥା ସଙ୍କଟାପନ୍ନ ହୋଇଥିବା ବେଳେ ଅନ୍ୟ ୬ ଜଣ ଅବସ୍ଥା ଗୁରୁତର ହୋଇଛନ୍ତି । ପରେ ଘଟଣାସ୍ଥଳରେ ରହି ଅଧିକ ତଦନ୍ତ ଚଳାଇଛି ପୋଲିସ ।
