ବୌଦ୍ଧ,୦୯/୦୯ : ଶ୍ୱଶୁର ଘରକୁ ଆସି ସ୍ତ୍ରୀକୁ ହତ୍ୟା କଲା ସଇତାନ ସ୍ୱାମୀ । ମୃତକ ଚାରବାଟି ଗ୍ରାମର ଅଞ୍ଜଳି ତରିଆ ଏବଂ ତାଙ୍କ ସ୍ୱାମୀ ସର୍ବେ ନାୟକ ବୋଲି ଜଣାପଡ଼ିଛି । ବୌଦ୍ଧ ଜିଲ୍ଲା କଣ୍ଟାମାଳ ଥାନା ଅନ୍ତର୍ଗତ ଚାରବାଟି ଗ୍ରାମରେ ଏଭଳି ଅଘଟଣ ଘଟିଛି । 

ସୂଚନା ମୁତାବକ, ନୂଆଖାଇ ପାଇଁ ଅଞ୍ଜଳି ତରିଆ ତାଙ୍କ ବାପଘରକୁ ଯାଇଥିଲେ । ଏହି ସମୟରେ ତାଙ୍କ ସ୍ୱାମୀଙ୍କ ସହ କୌଣସି ବ୍ୟକ୍ତିଗତ କାରଣରୁ ତାଙ୍କର ବଚସା ହୋଇଥିଲା । ପରେ ଅଞ୍ଜଳିଙ୍କ ସ୍ୱାମୀ ସର୍ବେ ମଧ୍ୟ ନୂଆଖାଇ ପାଇଁ ଶ୍ୱଶୁର ଘରକୁ ଆସିଥିଲେ । ସେଠାରେ ଉଭୟ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ପୁଣି ଝଗଡ଼ା ହୋଇଥିଲା । ଏଥିରେ ଉତ୍ୟକ୍ତ ହୋଇ ସ୍ତ୍ରୀର ଗଳା କାଟି ହତ୍ୟା କଲା ସଇତାନ ସ୍ୱାମୀ । ଏଭଳି ନୃଶଂସ ହତ୍ୟାକାଣ୍ଡ କରି ଘଟଣାସ୍ଥଳରୁ ଫେରାର୍‌ ହୋଇଥିଲା ସ୍ୱାମୀ । ପରେ ରକ୍ତ ଜୁଡୁବୁଡୁ ଅବସ୍ଥାରେ ଝିଅର ମୃତଦେହ ଦେଖିବାକୁ ପାଇଥିଲେ ଅଞ୍ଜଳିଙ୍କ ପରିବାର ଲୋକେ । ଏହା ଦେଖି ଆତ୍ମହରା ଅବସ୍ଥାରେ ପୋଲିସକୁ ଏହି ଘଟଣା ସମ୍ପର୍କରେ ଅବଗତ କରାଇଥିଲେ । ଖବର ପାଇ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଛି କଣ୍ଟାମାଳ ଥାନା ପୋଲିସ । ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ପୋଲିସ । ଏଥି ସହିତ ହତ୍ୟାକାରୀ ସ୍ୱାମୀକୁ ଖୋଜି ଘଟଣାର ତଦନ୍ତ କରୁଛି ପୋଲିସ।