ବୌଦ୍ଧ : ଗ୍ୟାସ ସିଲିଣ୍ଡରରୁ ନିଆଁ ଲାଗି ସ୍ତ୍ରୀ ମୃତ, ସ୍ୱାମୀ ଗୁରୁତର। ତାଙ୍କୁ ଭୁବନେଶ୍ୱର ସ୍ଥାନାନ୍ତରିତ କରାଯାଇଛି। ଏଭଳି ଦୁଃଖଦ ଘଟଣା ବୌଦ୍ଧ ଜିଲ୍ଲା ପୁରୁଣା କଟକ ଥାନା ଚାରି ଛକ ଠାରେ ଘଟିଛି। ମୃତ ମହିଳାଙ୍କ ପରିବାର ପକ୍ଷରୁ ପୋଲିସ ନିକଟରେ ଦିଆଯାଇଥିବା ସୂଚନା ଅନୁସାରେ, ବାଣୀଭୂଷଣପୁର ଗ୍ରାମପଞ୍ଚାୟତ ସରପଞ୍ଚ ଶ୍ରୀବନ୍ତ ମେହେର, ଗୁରୁବାର ଦିନ ବୌଦ୍ଧ ମହୋତ୍ସବକୁ ଯାଇ ରାତିରେ ଘରକୁ ଫେରିଥିଲେ। ତାଙ୍କ ପାଇଁ ରୋଷେଇ କରୁଥିବା ସମୟରେ ହଠାତ ଗ୍ୟାସ ସିଲିଣ୍ଡରରୁ ଗ୍ୟାସ ଲିକ୍ ହୋଇ ପତ୍ନୀଙ୍କ ଦେହରେ ଲାଗି ଯାଇଥିଲା। ଏହାପରେ ଘର ଭିତରୁ ଚିତ୍କାର ଶୁଣିବାକୁ ମିଳିଥିଲା।
ଏପଟେ ସ୍ତ୍ରୀ ବିଷ୍ଣୁପ୍ରିୟା ମେହେରଙ୍କ ଦେହରେ ନିଆଁଲାଗି ଜଳୁ ଥିବାର ଦେଖି ସ୍ୱାମୀ ଶ୍ରୀବନ୍ତ ମେହେର, ତାଙ୍କୁ ବଞ୍ଚାଇବାକୁ ଯାଇ ସେ ମଧ୍ୟ ଗୁରୁତର ହୋଇଥିଲେ। ସଙ୍ଗେ ସଙ୍ଗେ ଉଭୟ ସ୍ୱାମୀ - ସ୍ତ୍ରୀଙ୍କୁ ନିକଟସ୍ଥ ପୁରୁଣା କଟକ ମେଡିକାଲରେ ଭର୍ତ୍ତି କରାଯାଇଥିଲା। ସ୍ତ୍ରୀଙ୍କୁ ଡାକ୍ତର ମୃତ ଘୋଷଣା କରିଥିଲେ। ସରପଞ୍ଚ ଗୁରୁତର ଥିବାରୁ ତାଙ୍କୁ ଭୁବନେଶ୍ୱରର ଏକ ଘରୋଇ ହସ୍ପିଟାଲକୁ ନିଆଯାଇ ଥିବା ଜଣାପଡ଼ିଛି। କେମିତି ସ୍ତ୍ରୀଙ୍କ ଦେହରେ ନିଆଁ ଲାଗିଲା, ତାର କାରଣ ଅସ୍ପଷ୍ଟ ରହିଛି।
ଘଟଣାକୁ ନେଇ ପୁରୁଣା କଟକ ପୋଲିସ ତଦନ୍ତ ଜାରି ରଖିଥିବା ବେଳେ, ତଦନ୍ତ ପରେ କାରଣ ସ୍ପଷ୍ଟ ହେବ ବୋଲି ପୋଲିସ ପକ୍ଷରୁ ସୂଚନା ମିଳିଛି। ସୂଚନା ଅନୁସାରେ, ସ୍ୱାମୀ ଶ୍ରୀବନ୍ତ ମେହେର ବାଣୀଭୂସନ ସରପଞ୍ଚ ଥିବା ବେଳେ ଜଣେ ଜଣାଶୁଣା ରାଜନୈତିକ ବ୍ୟକ୍ତି ଭାବେ ଅଞ୍ଚଳରେ ପରିଚିତ। ଅନ୍ୟପଟେ ସ୍ତ୍ରୀ ବିଷ୍ଣୁପ୍ରିୟା ମେହେର ଜଣେ ଶିକ୍ଷୟତ୍ରୀ ଥିଲେ। ତାଙ୍କର ହଠାତ୍ ଏଭଳି ବିୟୋଗ ଶୁଣି ଶିକ୍ଷକ ମହଲରେ ଦୁଃଖର ଛାୟା ଖେଳି ଯାଇଥିବା ବେଳେ ଚାରି ଛକ ବଣିକ ସଙ୍ଘ ପକ୍ଷରୁ ପୂର୍ବାହ୍ନରେ ଦୋକାନ ବଜାର ବନ୍ଦ କରିଥିବା ଦେଖିବାକୁ ମିଳିଥିଲା।
