ବୌଦ୍ଧ,୨୬/୧୨: ନୁଆପାଲି ଛକ ନିକଟରେ ଚଳନ୍ତା ଟ୍ରକ୍ରୁ ଖସିଲା ଲୁହା ଇଲେକ୍ଟ୍ରି ପୋଲ୍ । ଅଳ୍ପକେ ବର୍ତ୍ତିଲେ ରାସ୍ତାରେ ଯାତାୟାତ କରୁଥିବା ଲୋକେ । ବୌଦ୍ଧ ଜିଲ୍ଲା ଖୋର୍ଦ୍ଧା-ବଲାଙ୍ଗୀର ୫୭ ନମ୍ୱର ଜାତୀୟ ରାଜପଥର ମନମୁଣ୍ଡା ଥାନା ନୁଆପାଲି ନିକଟରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଏକ ଲୁହା ଇଲେକ୍ଟ୍ରି ପୋଲ୍ ବୋଝେଇ ଟ୍ରକ୍ ସୋନପୁର ଅଭିମୁଖେ ଯାଉଥିବା ବେଳେ ଟ୍ରକ୍ର ଡାଲାରେ ବନ୍ଧା ଯାଇଥିବା ଚେନ୍ ଛିଣ୍ଡି ପଡିଥିଲା । ଫଳରେ ଚଳନ୍ତା ଟ୍ରକ୍ରୁ ବଡ ବଡ ଇଲେକ୍ଟ୍ରି ପୋଲ୍ ରାସ୍ତାରେ ପଡ଼ି ଯାଇଥିଲା । ମୁଖ୍ୟ ରାସ୍ତାରେ ଇଲେକ୍ଟ୍ରି ପୋଲ୍ ଗୁଡିକ ପଡ଼ୁଥିବା ବେଳେ ରାସ୍ତାରେ ଯାତାୟାତ କରୁଥିବା ଗାଡ଼ି ମଟର ସବୁ ଅଟକି ରହିଥିଲା । ଫଳରେ ରାସ୍ତାରେ ଯାତାୟତ କରୁଥିବା ବିଭିନ୍ନ ଯାନବାହାନ ଗୁଡିକ ସୌଭାଗ୍ୟକୁ ବଡ ଅଘଟଣରୁ ବର୍ତ୍ତି ଯାଇଥିଲେ । ରାସ୍ତା ଉପରେ ଇଲେକ୍ଟ୍ରି ପୋଲ୍ ଗୁଡିକ ପଡିଥିବା ବେଳେ କିଛି ସମୟ ପାଇଁ ଜାତୀୟ ରାଜପଥ ଅବରୋଧ ହୋଇ ରହିଥିବା ଦେଖିବାକୁ ମିଳିଛି । ତେବେ ଉକ୍ତ ଘଟଣାରେ କେହି ବ୍ୟକ୍ତି ଦୁର୍ଘଟଣାର ଶୀକାର ହୋଇନଥିବା ସୂଚନା ମିଳିଛି । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ମନମୁଣ୍ଡା ଥାନା ପୋଲିସ ପହଞ୍ଚି ତଦନ୍ତ ଜାରି ରଖିଛି ।
