ଜହ୍ନାପଙ୍କ,୨୯/୧୧ : ବୌଦ୍ଧ ଥାନା ଜହ୍ନାପଙ୍କ ଫାଣ୍ଡି ଅନ୍ତର୍ଗତ ଖୁଣ୍ଟବନ୍ଧ ରାଜ ହୋଟେଲ ନିକଟରେ ଆଜି ଅପରାହ୍ନ ପ୍ରାୟ ୫ଟାବେଳେ ଜାତୀୟ ରାଜପଥ ନଂ ୫୭ରେ ଏକ ଉଇଙ୍ଗର ନଂ ଓଡି ୨୭ ବି ୭୯୩୬କୁ  କାର୍ ନଂ ଓଡି ୨୭ଇ ୦୮୮୮ ଓଭରଟେକ କରୁଥିବାବେଳେ ଦୁଇଟି ବାଇକକୁ ଧକ୍କା ଦେଇ କାର ଫେରାର ମାରିଥିଲା। ସୂଚନା ଅନୁସାରେ   ବାଉଁସୁଣୀ ପଟୁ ବୌଦ୍ଧ ଅଭିମୁଖେ ଯାଉଥିବା ଉକ୍ତ କାର୍ ଉଇଙ୍ଗରକୁ ଓଭରଟେକ କରିବାବେଳେ ରାଜ ହୋଟେଲରୁ ଚରଦା ରାସ୍ତାକୁ ଯାଉଥିବା ବାଇକ ଚାଳକକୁ ଧକ୍କା ଦେଇ ଆଉ ଗୋଟିଏ ବାଇକକୁ ଧକ୍କା ଦେଇ ଦ୍ରୁତ ଗତିରେ ଫେରାର ମାରିଥିଲା । 

ତେବେ ଉଇଙ୍ଗର ଚାଳକ ଗାଡି ଛାଡି ଘଟଣାସ୍ଥଳରୁ ଫେରାର ମାରିଛି । ସ୍ଥାନୀୟ ଲୋକ ଆହତଙ୍କୁ ଆମ୍ବୁଲାନ୍ସ ଯୋଗେ ବୌଦ୍ଧ ମୁଖ୍ୟ ଡାକ୍ତରଖାନାକୁ ପଠାଇଥିଲେ । ପ୍ରଥମ  ବାଇକ ପଛରେ ବସିଥିବା କୁମୁରସିଙ୍ଗା ଗ୍ରାମର ମହେନ୍ଦ୍ର ଭୋଇ(୫୨)ଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବାବେଳେ ଚରଦା ଗ୍ରାମର ପ୍ରମୋଦ ପରିଡା ଆହତ ହୋଇଥିଲେ । ଦ୍ୱିତୀୟ ବାଇକରେ ବସିଥିବା ବ୍ରହ୍ମଚାରୀ ଗ୍ରାମ ମେହେର ସାହିର ନାରାୟଣ ମେହେର, ଭଜମନ ମେହେର ଓ ମୁନା ମେହେର ଗୁରୁତର ହୋଇଥିଲେ । ଭଜମନ ମେହେରଙ୍କୁ ବୁର୍ଲା ସ୍ଥାନାନ୍ତର କରାଯାଇଥିବା ଡାକ୍ତରଖାନା ସୂତ୍ରରୁ ଜଣାପଡିଛି । ଜହ୍ନାପଙ୍କ ଫାଣ୍ଡି ପୋଲିସ ଘଟଣାସ୍ଥଳରେ ପହଂଚି ଉଇଙ୍ଗର ଓ ଉଭୟ ବାଇକକୁ ଜବତ କରି ତଦନ୍ତ ଚଳାଇଛି।