ସାହାଜପାଲ/ଭୁବନେଶ୍ୱର,୧୨/୦୧: ବୌଦ୍ଧ ଜିଲ୍ଲା ସଦର ବ୍ଲକ ମୁଣ୍ଡିପଦର ପଞ୍ଚାୟତ ବଲାକିରା ଗାଁରେ ଶନିବାର ଘଟିଛି ହୃଦୟ ବିଦାରକ ଘଟଣା । ପାଳଗଦା ନିଆଁରେ ଜିଅନ୍ତା ଜଳିଯାଇଛନ୍ତି ଦୁଇ ନାବାଳକ । ମୃତକ ହେଲେ ବଲାକିରା ଗାଁର ସୁବଳ ଭୋଇଙ୍କ ପୁଅ କ୍ରିଷ୍ଣା (୫) ଓ ହରଭଙ୍ଗା ବ୍ଲକ ବସନ୍ତବାହାଲ ଗାଁର ସଞ୍ଜିତ ଉର୍ମାଙ୍କ ପୁଅ କ୍ରିଷ୍ଣା (୮) । ଉଭୟେ ସମ୍ପର୍କରେ ମାମୁ-ଭଣଜା । ଏଭଳି ଅଘଟଣରେ ସମଗ୍ର ଗାଁ ସ୍ତବ୍ଧ ହୋଇଯାଇଛି । ବାଉଁଶୁଣି ପୁଲିସ୍ ମୃତଦେହ ଜବତ କରି ତଦନ୍ତ ଆରମ୍ଭ କରିଛି । ଏହି ଘଟଣାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗଭୀର ଦୁଃଖ ପ୍ରକାଶ କରିଛନ୍ତି । ମୃତକଙ୍କ ପରିବାର ପାଇଁ ୪ଲକ୍ଷ ଲେଖାଏଁ ସହାୟତା ରାଶି ଘୋଷଣା କରିଛନ୍ତି । ମୃତକଙ୍କ ଆତ୍ମାର ସଦ୍ଗତି କାମନା କରିବା ସହ ପରିବାରକୁ ସମବେଦନା ଜଣାଇଛନ୍ତି ମୁଖ୍ୟମନ୍ତ୍ରୀ ।
ପରିବାର ଲୋକଙ୍କ କହିବା କଥା, ବସନ୍ତବାହାଲର କ୍ରିଷ୍ଣା ବଲାକିରାସ୍ଥିତ ମାମୁଘରକୁ ବୁଲିବାକୁ ଆସିଥିଲେ । ଅପରାହ୍ନରେ ମାମୁ-ଭଣଜା ଗାଁ ଦାଣ୍ଡରେ ଖେଳୁଥିଲେ । ଶୀତ ହେଉଥିବାରୁ ଗାଁମୁଣ୍ଡରେ ଥିବା ପାଳଗଦାରୁ ପାଳ ଆଣି ନିଆଁ ପୋଇଁବାକୁ କଥା ହୋଇ ସନ୍ଧ୍ୟାରେ ସେଠାକୁ ଯାଇଥିଲେ । ହେଲେ ପାଳ ଆଣିବା ବଦଳରେ ପାଳଗଦାରେ ନିଆଁ ଲଗାଇ ଦେଇଥିଲେ। କ୍ଷଣିକ ଭିତରେ ନିଆଁ ମାଡ଼ିଯାଇଥିଲା। ଭୟରେ ଦୁହେଁ ପାଳଗଦାକୁ ଲାଗି ଥିବା ଛୋଟ କୂଅ ଭିତରେ ପଶିଯାଇଥିଲେ । ପାଖାପାଖି ୬ ଫୁଟ ବିଶିଷ୍ଟ ଉକ୍ତ କୂଅରେ ପାଣି ନ ଥିଲା । ନିଆଁ ଉଗ୍ରରୂପ ଧାରଣ କରି ଚାରିଆଡ଼କୁ ବ୍ୟାପିଯାଇଥିଲା । ଧାସ ଏତେ ପ୍ରଖର ଥିଲା ଯେ, ସେମାନେ କୂଅ ଭିତରକୁ ବାହାରି ପାରି ନ ପାରି ଜୀବନ୍ତ ଦଗ୍ଧ ହୋଇଯାଇଥିଲେ । ସେମାନଙ୍କ ଚିତ୍କାର ମଧ୍ୟ ପଦାକୁ ଶୁଣାଯାଇ ନ ଥିଲା ।
ଅନ୍ୟପଟେ ପାଳଗଦାରେ ନିଆଁ ଲାଗିଥିବା ଦେଖି ଗାଁ ଲୋକେ ଲିଭାଇବାକୁ ଚେଷ୍ଟା କରିଥିଲେ । ଏହି ସମୟରେ ଖୋଜା ପଡ଼ିଥିଲେ ମାମୁ-ଭଣଜା । ହେଲେ ଦୁହିଁଙ୍କର ପତ୍ତା ମିଳି ନ ଥିଲା । ପାଳଗଦା ନିକଟ କୂଅ ପାଖକୁ ଆସି ଦେଖିବା ବେଳକୁ ଦୁଇଜଣ ଅର୍ଦ୍ଧଦଗ୍ଧ ଅବସ୍ଥାରେ ପଡ଼ିଥିଲେ । ଉଭୟଙ୍କୁ ଆମ୍ବୁଲାନ୍ସରେ ବାଉଁଶୁଣି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିବାବେଳେ ସେଠାରେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ ।
ସୂଚନାଯୋଗ୍ୟ, ବଲାକିରା ଗାଁର ମାମୁ କ୍ରିଷ୍ଣା ଭୋଇ ଅଙ୍ଗନବାଡ଼ିରେ ପଢୁଥିବାବେଳେ ଭଣଜା କ୍ରିଷ୍ଣା ବସନ୍ତବାହାଲ ପ୍ରାଥମିକ ବିଦ୍ୟାଳୟର ଦ୍ୱିତୀୟ ଶ୍ରେଣୀର ଛାତ୍ର ଥିଲେ । ଏହି ଘଟଣା ପରେ ଗାଁ ସ୍ତବ୍ଧ ହୋଇଯାଇଛି । ପରିବାର ଲୋକଙ୍କ କାନ୍ଦବୋବାଳିରେ ଗାଁ ଫାଟି ପଡୁଛି ।
